Raport - Romet dhe Riciklimi i Mbetjeve ne Korce - EPER Center

6
Raport “Romët dhe Riciklimi i Mbetjeve në Korçë”
Nga intervistimi i kryer me kolektorët Rom, u vu re se të ardhurat ditore dhe rrjedhimisht ato
mujore të tyre variojne në një gamë të gjerë. Kështu, të ardhurat ditore të kolektorëve Rom
madhorë fillojnë nga minimumi prej 200 lekë/dita deri në maksimumi 4000 lekë/dita. Një
familje Rome në të cilën punojnë të paktën dy anëtarë fiton mesatarisht rreth 50000 lekë në
muaj. Duke marrë në konsideratë të dhënat e mbledhura nga intervisitimi mbi numrin
mesatar të anëtarëve të një familje Rome që punon me mbetjet e riciklueshme, prej 6
anëtarësh, të ardhurat mujore për frymë do të ishin vetëm 8333 lekë/muaj ose 277 lekë/ditë,
një e ardhur kjo e ulët për të përballuar jetesën e shtrenjtuar.
Të gjitha palët e interesit të përfshira në industrinë e riciklimit duhet të luajnë një rol të
rëndësishëm me qëllim përmirësimin e kushteve të jetesës së kolektorëve Rom në të gjitha
aspektet, duke kontribuar në këtë mënyrë në përmbushjen e objektivave të mijëvjeçarit dhe
dekadës Rome. Disa nga detyrat që dalin para palëve të interesit mund të përmblidhen si
më poshtë:
Pushteti qendror dhe ai vendor, duhet të hartojnë strategji afatgjata për sektorin e riciklimit
për gjithëpërfshirjen formale të kolektorëve Rom në këtë sektor, duke krijuar skema të
përshtatshme punësimi dhe po kështu të nxisë arsimimin e tyre sidomos të fëmijëve dhe të
rinjve nëpërmjet programeve specifike të edukimit.
Donatorët duhet të hartojnë programe nga të cilat mund të përfitojnë kolektorët Rom, si për
ngritjen e kapaciteteve të tyre në aspekte të ndryshme lidhur me riciklimin, ashtu edhe në
krijimin e skemave të garancisë në bashkëpunim me institucionet mikrofinanciare për të
mundësuar dhe lehtësuar kolektorët Rom të marrin mikrokredi.
Shoqatat Rome dhe ajo e Ricikluesve të Shqipërisë duhet të shërbejnë si katalizator dhe
ndërmjetësues midis kolektorëve Rom dhe bizneseve të riciklimit me qëllim shpërndarjen e
informacionit të nevojshëm dhe nënshkrimin e kontratave midis palëve për t’u siguar kështu
kolektorëve Romë, çmime më të favorshme dhe rrjedhimisht më shumë të ardhura.
Kolektorët Rom duhet të organizohen në grupime sipas lidhjeve fisnore apo zonave ku
jetojnë që të mund të grumbullojnë më shumë materiale të riciklueshme dhe t’i shesin më
shumicë tek kompanitë e riciklimit. Gjithashtu, ata duhet të ngrenë kapacitetet e tyre
nëpërmjet pjesëmarrjes në aktivitete informuese, në lidhje me llojet e materialeve që
riciklohen, ku mund të gjenden ato, çmimet e tyre, pajisjet dhe mjetet mbrojtëse të
nevojshme, si dhe ku mund të aplikojnë për mikrokredi.
Në të njëjtën kohë edhe media duhet të kontribuojë në sensibilizimin e mbarë opinionit për
rëndësinë e riciklimit si edhe rëndësisë së largimit të fëmijëve Rom nga puna me mbetjet
nëpërmjet emisioneve të ndryshme duke sjellë shembuj pozitive nga familjet Rome.