jamhuri ya muungano wa tanzania - Ministry of Livestock and ...

C: UTEKELEZAJI WA ILANI YA UCHAGUZI YA CCM YA MWAKA 2010
11. Mheshimiwa Spika, katika kutekeleza majukumu ya sekta za mifugo na
uvuvi, Wizara imezingatia maelekezo yaliyomo katika Ilani ya Uchaguzi ya
CCM ya Mwaka 2010. Ilani inatambua mchango mkubwa unaoweza kutolewa
na sekta hizi katika kuwapunguzia wananchi umaskini na kuongeza Pato la
Taifa.
12. Mheshimiwa Spika, ili Sekta ya Mifugo iweze kutoa mchango mkubwa
kwenye Pato la Taifa, Serikali imeelekezwa kutekeleza yafuatayo:-
Mapinduzi ya Ufugaji
(i) Serikali iandae programu kabambe ya kuendeleza sekta ya mifugo na
ufugaji. Programu hiyo ijumuishe pamoja na mambo mengine masuala ya
uendelezaji wa maeneo ya malisho, kuchimba na kujenga malambo,
mabwawa, majosho na huduma za ugani ili hatimaye wafugaji
waondokane na ufugaji wa kuhamahama.
Utekelezaji:
Wizara kwa kushirikiana na wadau wa sekta ya mifugo imekamilisha rasimu ya
Programu ya Kuendeleza Sekta ya Mifugo ambayo itatekelezwa kwa kipindi
cha mwaka 2011/2012 hadi 2015/2016. Programu hii, imeainisha pamoja na
mambo mengine masuala ya uendelezaji wa maeneo ya malisho, kuchimba na
kujenga malambo, mabwawa, majosho na huduma za ugani ili hatimaye
wafugaji waondokane na ufugaji wa kuhamahama. Aidha, Programu
imeainisha maeneo ya kipaumbele yatakayotekelezwa kwa kila mwaka.
(ii) Benki ya Kilimo itakayoanzishwa iwe pia Benki ya Mifugo ili iweze kutoa
mikopo kwa wasomi wenye nia ya kufuga na kuwawezesha kuingia kwa
wingi katika ufugaji wa kisasa.
Utekelezaji:
Wizara inaendelea kuhamasisha wafugaji hususan wasomi kutumia uwepo wa
dirisha dogo katika Benki ya Taifa ya Rasilimali kukopa fedha kwa ajili ya
kuendeleza ufugaji wa kisasa.
(iii) Kuelimisha wafugaji kuhusu umuhimu wa uwiano kati ya idadi ya mifugo
na eneo.
5