jamhuri ya muungano wa tanzania - Ministry of Livestock and ...

82. Mheshimiwa Spika, Wizara imeendelea kudhibiti magonjwa ya mifugo
yanayoambukiza binadamu yakiwemo Kichaa cha Mbwa, Homa ya Bonde la
Ufa, Kimeta, Kutupa Mimba na Kifua Kikuu cha Ng’ombe kwa kutekeleza
yafuatayo:-
(a) Kichaa cha Mbwa
Katika mwaka 2010/2011, Wizara kwa kushirikiana na Wizara ya Afya na
Ustawi wa Jamii kupitia Mradi unaofadhiliwa na Taasisi ya Bill and Melinda
Gates imeendelea kutekeleza mkakati wa kudhibiti Kichaa cha Mbwa katika
Halmashauri 24 za Mikoa ya Dar-es-Salaam, Pwani, Mtwara, Lindi, Morogoro
kwa Tanzania Bara na Kisiwa cha Pemba kwa upande wa Serikali ya
Mapinduzi ya Zanzibar. Jumla ya mbwa 61,895 na paka 6,098 wamechanjwa
na zoezi la kuchanja bado linaendelea. Pia, Pikipiki 17 zilinunuliwa na
kusambazwa katika Halmashauri zinazotekeleza mradi. Aidha, Wizara ilinunua
na kusambaza dozi 100,000 za chanjo katika Halmashauri 97 (Jedwali
Na.11) zilizopo nje ya eneo la Mradi huo ambapo jumla ya mbwa 93,280
walichanjwa. Vilevile, Halmashauri 17 na sekta binafsi walinunua na
kusambaza dozi 49,736 ambapo mbwa 35,153 na paka 6,589 walichanjwa.
Katika mwaka 2011/2012, Wizara itaendelea kudhibiti Kichaa cha Mbwa kwa
kutekeleza yafuatayo:-
(i) Kuendelea kutekeleza Mradi wa kudhibiti Kichaa cha Mbwa kwa kununua
na kusambaza dozi 100,000 za chanjo katika Halmashauri 24 zilizopo
kwenye mradi;
(ii) Kuhamasisha na kuratibu kampeni za uchanjaji kwa lengo la kuchanja
mbwa na paka 200,000 kwenye maeneo ya nje ya mradi; na
(iii) Kuandaa maadhimisho ya Siku ya Kichaa cha Mbwa Duniani
yanayofanyika tarehe 28 Septemba ya kila mwaka.
(b) Homa ya Bonde la Ufa
83. Mheshimiwa Spika, kinga dhidi ya ugonjwa wa Homa ya Bonde la Ufa
iliendelea kutolewa kwa ng’ombe, mbuzi na kondoo katika Halmashauri
zilizokuwa katika hatari ya kupata ugonjwa huo kufuatia mlipuko wa ugonjwa
huo uliotokea mwezi Januari, 2007. Katika mwaka 2010/2011, Wizara ilinunua
jumla ya dozi 500,000 za chanjo na kuzisambaza katika Halmashauri sita
(6) za Simanjiro, Mpwapwa, Babati, Ngorongoro, Chamwino, na Monduli.
Jumla ya ng’ombe 149,409, mbuzi 154,835 na kondoo 160,414
walichanjwa. Aidha, elimu kuhusu ugonjwa huo na hatua za kuchukua ili
kuudhibiti ilitolewa kwa wananchi katika maeneo hayo.
46