jamhuri ya muungano wa tanzania - Ministry of Livestock and ...

Tanga. Mfumo huu utasaidia kujua mtandao wa vyanzo vya maji na
mahitaji.
Udhibiti wa Magonjwa ya Mifugo
Magonjwa ya Mlipuko
71. Mheshimiwa Spika, katika mwaka 2010/2011 Wizara kwa kushirikiana
na wadau wa ndani na nje imeendelea kutekeleza mikakati mbalimbali ya
kudhibiti magonjwa ya mifugo na hasa ya mlipuko. Jumla ya dozi milioni 2.8
za chanjo dhidi ya ugonjwa wa Homa ya Mapafu ya Ng’ombe zilinunuliwa
kupitia mradi wa Vaccines for Control of Neglected Animal Diseases in Africa
(VACNADA) unaofadhiliwa na Jumuia ya Ulaya, na kutumika kuchanja
ng’ombe milioni 2.7 dhidi ya ugonjwa huo katika mikoa ya Arusha,
Kilimanjaro na Manyara. Aidha, dozi milioni 5 zilinunuliwa kupitia mpango wa
Roll back Vaccination mwishoni mwa mwaka 2009/2010 ambapo ng’ombe
milioni 4.5 walichanjwa katika mikoa ya Shinyanga na Kagera. Pia, kupitia
mpango huo, dozi milioni 3 za chanjo zilinunuliwa mwaka 2010/2011 kwa
ajili ya kuendelea kuchanja mifugo dhidi ugonjwa huo katika mikoa ya Kagera
na Shinyanga. Vilevile, tathmini ya awali ya ugonjwa wa Homa ya Mapafu ya
Ng’ombe imefanyika katika mikoa ya Singida, Kigoma na Tabora na
imeonesha kuwa ugonjwa huo umepungua.
Katika mwaka 2011/2012, Wizara itawezesha na kuendelea kuratibu uchanjaji
wa ng’ombe milioni 5 katika mikoa ya Kanda ya Ziwa na Kaskazini chini ya
mpango wa Roll back Vaccination.
72. Mheshimiwa Spika, kupitia mradi wa VACNADA mbuzi na kondoo
milioni 1.25 wamechanjwa dhidi ya ugonjwa wa Sotoka ya Mbuzi na
Kondoo (PPR) katika mikoa ya Arusha na Mara. Kazi nyingine zilizotekelezwa
kupitia mradi huu ni:-
(i) Kujengea uwezo wataalam 33 wa maabara kutoka vituo vyote 7 vya
uchunguzi wa magonjwa ya mifugo (VICs) na Maabara Kuu ya Mifugo
(CVL) Temeke;
(ii) Kuwezesha mafunzo kwa watumishi 20 kutoka Halmashauri zote za
mkoa wa Arusha na Halmashauri za Tarime, Rorya na Serengeti mkoa
wa Mara;
(iii) Kununua vifaa vya maabara na dawa kwa ajili ya uchunguzi wa
magonjwa ya Homa ya Mapafu ya Ng’ombe na Sotoka ya Mbuzi na
Kondoo kwa maabara za CVL, VIC Mwanza na Arusha; na
(iv) Kugharimia huduma za chanjo na kutengeneza vipeperushi 11,000 kwa
ajili ya kuhamasisha udhibiti wa magonjwa ya mlipuko.
41