jamhuri ya muungano wa tanzania - Ministry of Livestock and ...

D: MAPITIO YA UTEKELEZAJI WA MPANGO WA MWAKA 2010/2011
NA MWELEKEO WA BAJETI YA MWAKA 2011/2012
Matukio Muhimu
(i) Mkutano wa Wadau wa Sekta ya Mifugo
14. Mheshimiwa Spika, mkutano wa Wadau wa Sekta ya Mifugo nchini
ulifanyika mjini Dodoma tarehe 24 na 25 Januari, 2011 na ulishirikisha wadau
300. Mkutano huo ulitoa maoni na michango mbalimbali iliyotumika
kuboresha rasimu ya mwisho ya Programu ya Kuendeleza Sekta ya Mifugo
Nchini.
(ii) Mkutano wa Wadau wa Sekta ya Uvuvi
15. Mheshimiwa Spika, mkutano wa Wadau wa Sekta ya Uvuvi nchini
ulifanyika mjini Dodoma tarehe 26 hadi 28 Januari, 2011. Mkutano huu
uliwashirikisha wadau 270 na uliweka mikakati ya kuimarisha usimamizi,
uhifadhi, ulinzi na uendelezaji wa rasilimali za uvuvi na uboreshaji wa
ukusanyaji wa maduhuli ya Serikali. Aidha, mkutano huo ulitoa maoni na
michango iliyowezesha kuboresha rasimu ya mwisho ya Programu ya
Kuendeleza Sekta ya Uvuvi nchini.
(iii) Ukame
16. Mheshimiwa Spika, kutokana na ukame mkali uliojitokeza mwaka
2008/2009 katika mkoa wa kaskazini mwa nchi yetu, Serikali ilifanya tathmini
kubaini athari zilizotokana na ukame huo. Tathmini hiyo ilionyesha kuwa
baadhi ya wafugaji walipoteza mifugo yao yote katika mkoa wa Arusha na
hasa katika Wilaya za Longido, Monduli na Ngorongoro. Serikali kupitia
Hotuba ya Mhe. Waziri Mkuu akihitimisha hotuba yake hapa Bungeni tarehe 1
Julai, 2011, imeahidi kutoa kifuta machozi kwa kaya 4,336 zilizopoteza
mifugo yote katika wilaya hizo ambapo kila kaya itapatiwa ng’ombe watano
(5) ikiwa ni mitamba minne (4) wenye umri wa miaka miwili na dume
mmoja wa miaka mitatu. Jumla ya ng’ombe 21,680 kama mbegu
wanatarajiwa kununuliwa na zoezi hili litagharimu shilingi bilioni 8.7 ambazo
zimetengwa chini ya Kitengo cha Maafa, Ofisi ya Waziri Mkuu. Zoezi la
kuwakusanya na kuwasambaza ng’ombe watakaonunuliwa litafanywa na
wananchi wenyewe watakaochaguliwa kutoka maeneo hayo. Inashauriwa
ng’ombe hao wapatikane kutoka wilaya husika na wilaya jirani zenye
mazingira yanayowiana na hali iliyopo katika maeneo yaliyoathirika. Aidha,
Wizara yangu itashirikiana na Halmashauri husika na wadau wengine
kuhakikisha kuwa zoezi hili linatekelezwa kwa ufanisi.
15