M E D I C U S - Shoqata e Mjekëve Shqiptarë të Maqedonisë-Hipokrati

REZYME: Qëllimi: Të hulumtohet efikasiteti i tri protokoleve të trefishta të bazuara në
pantoprazol, në shërimin dhe eliminimin e Helicobacter Pylori (HP) nga ulçera.
Materiali dhe metoda: Në këtë studim prospektiv, janë përfshirë 123 të sëmurë me
ulçerë duodenale. Të gjitha grupet janë trajtuar me Pantoprazol 40 mg dy herë në ditë;
grupit të parë i është ordinuar edhe amoksicilina 1.0 gr dy herë në ditë dhe klaritromicina
500 mg dy herë në ditë (protokoli PAC), grupit të dytë metronidazoli 400 mg tri herë në
ditë dhe klaritromicina 500 mg dy herë në ditë (protokoli PMC) dhe grupit të tretë
amoksicilinë 1.0 gr dy herë në ditë dhe metronidazol 400 mg tri herë në ditë (protokoli
PAM). Rezultatet: Rezultati i shërimit me protokolin PAC ka qenë 91%, PMC 90% dhe
PAM 88%. Rezultati i çrrënjosjes me protokolin PAC ishte 91%, PMC 90% dhe PAM
71%. Përfundimi: Protokoli PAC ishte më efektiv se sa protokoli PAM.
Fjalë bosht: terapia e trefishtë, shërimi, çrrënjosja, pantoprazoli, ulçera
Medicus 2009, Vol. XI (1):
HYRJE
Terapia e trefishtë e bazuar në një inhibitor të pompës protonike (IPP) dhe dy
antimikrobikë aktualisht paraqet terapinë e zgjedhjes për eliminimin e infeksionit me HP
dhe shërimin më të shpejtë të kraterit ulçeroz. Eliminimi, definohet si mungesë e HP nga
mukoza e lukthit, e vërtetuar pas më së paku katër javë, ose edhe më vonë, pas
përfundimit të terapisë eliminuese me antimikrobikë. Kërkesa primare është efikasiteti i
barnave, të cilat për një kohë sa më të shkurtër, me sa më pak efekte anësore dhe më pak
shpenzime, do të bëjnë çrrënjosjen në më tepër se 90 % të rasteve me infeksion me këtë
bakterie (1).
Terapitë bashkëkohore të trefishta kanë në vete një barë antisekretorë të
pazëvendësueshëm, IPP (omeprazoli, lanzoprazoli, pantoprazoli, rabeprazoli) ndërsa
amoksicilina ose klaritromicina plotësohen me metronidazolin (2). Eliminimi i infeksionit
me HP me këtë protokol sillet rreth 85-90 %, ndërkohë që efektet anësore janë të vogla.
Marrja e pantoprazolit përcillet me rritjen e pH-së së ambientit gastrik në mënyrë
sinjifikante, ku sipas shumë autorëve (1,2,3), pH rritet deri në 5.1 me çka krijohen kushte
më të mira për epitelizim më të shpejtë dhe mbyllje të kraterit ulçeroz.. Me zbulimin e
HP, kanë ndryshuar jo vetëm konceptet mbi etiopatogjenezën e sëmundjes ulçeroze
peptike, por edhe konceptet mbi trajtimin e kësaj patologjie (8,12,13,14,15,16,17).
Qëllimet kryesore terapeutike me rastin e trajtimit të sëmundjes ulçeroze janë: humbja e
simptomeve, shërimi i ulçerës, parandalimi i rishfaqjeve dhe i komplikimeve (18,19). Për
këtë qëllim aplikohet terapia e çrrënjosjes për të gjithë të sëmurët me ulçerë peptike me
prani të infeksionit me HP.
Pas përfundimit të terapisë me antimikrobikë në kuadër të skemave, shumë
hulumtues preferojnë të vazhdohet me dhënien e terapisë antisekretore, edhe për 4-6 javë,
deri te shërimi i plotë i ulçerës në lukth ose duoden (3).
Nëse nuk trajtohet, infeksioni me HP do të zgjatë tërë jetën (4), por janë të
mundshme edhe rishfaqjet e këtij infeksioni pas një çrrënjosje të suksesshme.