Shqip

Plani i Veprimit për negocimin e Marrëveshjes së Stabilizim-Asociimit
3.7.7. Transporti
Në sektorin e transportit është miratuar një pjesë e konsiderueshme e legjislacionit sektorial
duke shënuar një progres thelbësor sa i përket përafrimit të kornizës legjislative me acquis
communautaire. Në këtë kontekst, disa nga ligjet esenciale të miratuara në fushën e transportit
janë: Ligji mbi Rrugët, Ligji për Sigurinë në Komunikacion Rrugor, Ligji për Aviacion Civil dhe
Ligji mbi Hekurudha. Më tej, me qëllim të zbatimit të kornizës legjislative, janë miratuar një
numër i konsiderueshëm aktesh nënligjore. Po ashtu, në funksion të hartimit të politikave
efektive në fushën e transportit, Ministria e Infrastrukturës (MI) është duke rifreskuar dhe
implementuar paralelisht Strategjinë e Transportit Multimodal. Me këtë strategji synohet të
krijohet një ambient i përshtatshëm për zhvillim të sigurt, kualitativ dhe funksional të sistemeve
të transportit dhe kapaciteteve njerëzore.
Po ashtu, në ndjekje të modeleve evropiane të zhvillimit të hekurudhave, janë shënuar
zhvillime pozitive me ndarjen e Hekurudhave të Kosovës në dy kompani publike, përkatësisht
ne InfraKos dhe TrainKos. Për me tepër, MI në konsultim të ngushtë me Autoritetin Rregullativ
të Hekurudhave (ARH), TrainKos-in dhe InfraKos-in ka miratuar Ekspozeun e Rrjetit për
hekurudha për vitin 2013. Në këtë kontekst si rezultat i zhvillimeve pozitive institucionale është
duke zbatuar korniza ligjore për hapjen graduale të tregut të transportit hekurudhorë.
Në anën tjetër, përmes përfshirjes aktive në Marrëveshjen për Hapësirën e Përbashkët
Evropiane të Aviacionit (HPEA), Kosova ka avancuar dukshëm në miratimin e standardeve të
BE-së sa i përket aviacionit civil. Në këtë kontekst, MI dhe Autoriteti i Aviacionit Civil (AAC)
kanë bërë hapa progresiv në miratimin e rregulloreve ekonomike dhe atyre të sigurisë, si
kërkesa të drejtpërdrejta nga faza e parë e marrëveshjes së HPEA-së. Ndërkaq, me qëllim të
përmirësimit të sigurimit të aviacionit civil Ministria e Punëve të Brendshme (MPB) ka miratuar
tri Programe Kombëtare për Sigurimin e Aviacionit Civil, dhe ka hartuar Manualin për
Inspektorët e Sigurimit të Aviacionit Civil si dokument praktik i cili mundëson inspektorëve
njohjen me teknikat bashkëkohore të hetimit. Si rezultat i angazhimeve koherente, Kosova ka
kompletuar hartimin e legjislacionit nga faza e parë e marrëveshjes për HPEA, dhe është e
gatshme për kalim në fazën e dytë të kësaj marrëveshje.
Sa i përket organizmit dhe përgjegjësive institucionale sektoriale, institucion kyç në sektorin e
transportit është MI, ku përmes krijimit të politikave dhe zbatimit te ligjeve synon të
kontribuojë në rritjen ekonomike duke mundësuar shërbime cilësore dhe të qëndrueshme,
mjedis ekologjik dhe integrim ndërkombëtar. Me qëllim të zvogëlimit të numrit të aksidenteve
në komunikacionin rrugor, Qeveria ka themeluar Këshillin për Siguri në Komunikacionin
Rrugor, si trup ndërinstitucionale që udhëhiqet nga MI, dhe ka për synim që përmes
aktiviteteve të përbashkëta dhe gjithëpërfshirëse të përmirësoj sigurinë dhe zvogëloj shkallën e
aksidenteve në komunikacionin rrugor.
Ndërsa, në sektorin e hekurudhave MI përcakton politikat dhe harton legjislacionin duke ofruar
orientimet strategjike për sfidat afatgjata me të cilat ballafaqohen hekurudhat, kurse ARH është
organ përgjegjës për rregullimin, mbikëqyrjen, organizimin e sektorit hekurudhor, përkatësisht
ARH vepron si organ licencues, organ përgjegjës për çështjet e interoperabilitetit, organ për
rregullimin e tregut dhe organ për sigurinë e hekurudhave.
76