Leviathan dari Bangsa Bangsa_

Ireo hevi-dison’ ny teolojia ankafizin’ ny besinimaro dia nitarika fanahy sesehena ho
amin’ ny toe-tsaina fatra-pisalasala ny amin’ ny zavatra rehetra, kanefa dia nety ho tonga
mpino ny Soratra Masina izy ireny. Tsy azony atao ny hanaiky foto-pinoana izay manao
tsinontsinona izay heveriny ho fahamarinana, famindrampo ary fahalemem-panahy ; ary koa
satria aseho ho fampianaran’ ny Soratra Masina ireo dia laviny ny handray ny Baiboly ho
tenin’Andriamanitra.
Ary io indrindra no zavatra tadiavin’ i Satana hotanterahina. Tsy misy iriny kokoa noho
ny handrodana ny fahatokisana an’ Andriamanitra sy ny teniny. Mitarika ilay tafika
makadirin’ ny mpisalasala i Satana, ary mampiasa ny faraheriny rehetra izy mba hisarika
fanahy ka hirotsaka eo amin’ny laharany. Manjary «lamaody» ny misalasala. Misy antokon’
olona maro izay mihevitra ny tenin’ Andriamanitra ho tsy azo itokisana noho ny antony tsy
itokisany koa Ilay niavian’ io Soratra Masina io dia noho izy manakiana sy manameloka ny
fahotana. Miezaka ny handrava ny fahefany ireo izay tsy ta-hankatò ny fitakiany. Mamaky
ny Baiboly izy, na mihaino ny fampianarana momba izany araka ny itoriana izany avy eny
amin’ ny polipitra masina, mba hahitany fotsiny fahadisoana ao amin’ ny Soratra Masina na
ao amin’ ny toriteny. Tsy vitsy no manjary tsy mpino mba hanamarinany na hanalany tsiny
ny tenany noho ny fanaovany an-tsirambina ny adidiny. Ny sasany indray manaraka ireo
foto-kevitra feno fisalasalana ny amin’ ny zavatra rehetra noho ny avonavona sy ny
fahalainana. Tia loatra ny fahafinaretana izy ka tsy te-hiavaka amin’ny fanaovana na inona
na inona izay mendri-kaja, izay mitaky fiezahana sy fahafoizan-tena, ka miezaka ny
hampahalaza ny tenany ho manana fahendrena ambony kokoa amin’ ny fitsikerany ny
Baiboly. Betsaka ny zavatra izay tsy mety ho takatry ny saina voafetra raha tsy hazavain’ ny
fahendren’ Andriamanitra ; koa izany no antony ahitany zavatra hodisoina. Maro ny olona
toa mahatsapa fa mariky ny fahambonian-toetra ny fiandaniana amin’ ny tsy finoana, ny
fisalasalana sy ny tsy fahatokisana amin’ Andriamanitra. Nefa ao ambanin’ ny toa
fahatsoram-po isalorany dia hita fa fahatokian-tena sy avonavona no manetsika ireo olona
toy izany. Misy betsaka no finaritra mahita zavatra ho enti-mampikorontana ny sain’ ny hafa
ao amin’ ny Soratra Masina. Misy avy hatrany dia mitsikera sy misaina amin’ ny fomba diso
noho ny fitiavany adi-hevitra fotsiny. Tsy tsapany akory fa mampiditra ny tenany ao amin’
ny fandriky ny mpihaza izy amin’ izany fomba izany. Rehefa nambarany ampahibemaso
anefa ny tsy finoany, dia heveriny fa tsy maintsy mitana ny heviny izy. Amin’ izay dia
tafaray amin’ izay tsy tia vavaka izy ary manakatona ny varavaran’ ny Paradisa tsy hidirany.
Ampy ny porofo nomen’ Andriamanitra ao amin’ ny teniny ny amin’ ny maha-avy amin’
Andriamanitra azy. Aseho mazava ao ireo fahamarinana lehibe mikasika ny fanavotana
antsika. Mety ho takatry ny olona tsirairay ho an’ ny tenany ireo fahamarinana lehibe ireo
noho ny fanampian’ ny Fanahy Masina, Izay nampanantenaina ho an’ izay rehetra
mikatsaka izany amin’ ny fo madio. Nanome fanorenana azo antoka ny olombelona
hametrahany ny finoany Andriamanitra.
Na dia izany aza, ny saina voafetra ananan’ ny olombelona dia tsy ampy hahatakatra
tanteraka ny drafitra sy ny fikasan’ Ilay tsy voafetra. Tsy ho azontsika atao na oviana na
400