Ibintu by'Ukuri

Ibintu By'Ukuri
Igihe ukuri kw’Isabato kwashyirwaga ku mugaragaro, abantu benshi batanze ibitekerezo
byabo bashingiye ku myumvire y’ab’isi. Baravuze bati: “Igihe cyose tumaze twubahirizaga
umunsi wa mbere (icyumweru), ndetse na basogokuruza bacu ni wo bubahirizaga, kandi
abantu beza b’inyangamugayo mu idini, bapfuye bafite ibyishimo kandi bawubahiriza. Niba
bari bafite ukuri, natwe turagufite. Kubahiriza iyo Sabato nshya, byazatujugunya hanze
ntitugendane n’ab’isi, bityo ntitube hari impinduka twabagiraho. Ni iki itsinda ry’abantu bake
bubahiriza umunsi wa karindwi ryageraho ugereranyije n’abatuye isi bose bubahiriza umunsi
wa mbere w’icyumweru?” Urwitwazo nk’urwo ni rwo Abayahudi batangaga kugira ngo
berekane impamvu yo kwanga Kristo. Ba sekuruza bari baragiye bemerwa n’Imana binyuze
mu gutanga amaturo y’ibitambo, none se kuki abana babo batashoboraga kubona agakiza
bakurikije iyo nzira ya ba sekuruza? Muri ubwo buryo, mu gihe cya Luteri, ubupapa
bwavugaga ko Abakristo nyakuri bapfuye bafite imyizerere y’idini Gatolika, bityo bakavuga
ko iryo dini rihagije kugira ngo umuntu abone agakiza. Imitekerereze nk’iyo igaragara ko ari
inzitizi ikomeye y’iterambere mu myizerere mu by’itorero cyangwa se mu mikorere.
Abantu benshi batanze impamvu z’uko kubahiriza umunsi wa mbere w’icyumweru ari
ihame ryashinze imizi ndetse bikaba n’umugenzo w’itorero wakwiriye hose mu myaka
amagana menshi. Ibihabanye n’iki gitekerezo ni uko byagaragajwe ko Isabato ndetse no
kuyubahiriza ari ibya kera cyane kandi byamamaye ndetse binganya ubukuru n’isi ubwayo,
kandi ko byemerwa n’Imana n’abamarayika. Igihe imfatiro z’isi zashyirwagaho, igihe
inyenyeri zo mu ruturutura zaririmbaga, abana b’Imana baranguruye ijwi ry’ibyishimo, ubwo
ni bwo urufatiro rw’Isabato rwashinzwe. 635 Dukwiriye kubahiriza iyi Sabato; ntabwo
yashyizweho n’ububasha bw’umuntu kandi ntishingiye ku migenzo y’abantu. Yashyizweho
n’Umukuru Nyiribihe byose kandi itegekwa n’ijambo rye rihoraho.
Ubwo abantu bakangurirwaga ingingo y’ivugurura ryerekeye Isabato,
ababwirizabutumwa b’ibirangirire bagoretse ijambo ry’Imana, bagatanga ubusobanuro
bw’ibyo iryo jambo rihamya baganisha ku gucubya ibibazo bajyaga kubazwa. Bityo
abatarisomeraga Ibyanditswe Byera bashimishwaga no kwemera imyanzuro ihuje n’ibyifuzo
byabo. Kubera ibitekerezo batangaga, ubucurabwenge n’imigenzo by’abapadiri ndetse
n’ububasha bw’itorero, byatumye abantu benshi bashishikarira gutsemba ukuri.
Abaharaniraga kuvuga ukuri bo bihutiraga gushakashaka muri Bibiliya zabo kugira ngo
bashyigikire ukuri kw’itegeko rya kane. Abantu boroheje, bitwaje ukuri kw’ijambo ry’Imana
gusa nk’intwaro yabo, bahanganye n’ibitero by’abanyabwenge baje gutungurwa kandi bagira
umujinya babonye kuba intyoza kwabo kubaye ubusa imbere y’abo bantu boroheje, bafite
imitekerereze idakebakeba bari barirunduriye mu Byanditswe Byera kuruta inyigisho
z’urujijo zigishirizwaga mu mashuri.
Kubera kubura igihamya cyo muri Bibiliya gishyigikira uruhande rwabo, benshi bibagiwe
ko imitekerereze imeze nk’iyabo yakoreshejwe n’abantu barwanyaga Yesu n’intumwa maze
bakomeza kwinangira bavuga bati: “Kuki abakomeye muri twe badasobanukiwe n’ikibazo
334