Ibintu by'Ukuri

Ibintu By'Ukuri
Igice Cya 16 – Abakurambere B’Abimukira
Ubwo Abagorozi bo mu Bwongereza bangaga inyigisho z’i Roma, bakomeje gukora imwe
mu migenzo y’itorero ry’i Roma. Bityo, nubwo bari baranze ubutegetsi n’indangakwemera
bya Roma, hari byinshi mu migenzo n’imihango byinjijwe mu buryo bwo gusenga bw’Itorero
ry’Ubwongereza. Bavugaga ko ibyo atari ikibazo kireba umutimanama; ko nubwo ibyo bitari
bitegetswe n’Ibyanditswe Byera kandi bikaba bitari na ngombwa, nyamara kandi ntibibe
bibuzanyijwe, ntabwo byo ubwabyo byari bibi. Kubikurikiza byerekezaga ku kugabanya
umworera watandukanyaga itorero ry’i Roma n’amatorero avuguruwe, ndetse bavugaga ko
ibyo bishobora gutuma abayoboke b’itorero ry’i Roma bemera ukwizera
kw’Abaporotesitanti.
Ibyo bitekerezo byanogeye abadashaka kuva ku izima kandi bashaka ubwumvikane.
Nyamara hari hariho irindi tsinda ritabibonaga rityo. Uko babibonaga, kuba iyo migenzo ”
yarerekezaga ku kubaka iteme rihuza Roma n’Ubugorozi”, 329 iyo yari impamvu ihagije yo
gutuma barwanya kuyigumana. Bafataga iyo migenzo nk’ibimenyetso by’uburetwa bari
barakuwemo kandi batashoboraga kongera gusubiramo rwose. Batekerezaga ko mu Ijambo
ryayo Imana yashyizemo amabwiriza agenga uko ikwiriye gusengwa, kandi ko abantu
badafite umudendezo wo kugira icyo bongeraho cyangwa bagabanyaho. Itangiriro
ry’ubuhakanyi bukomeye ryatangiriye ku gushaka gufata ubutegetsi bw’Imana
bugasimbuzwa ubw’Itorero. Roma yatangiye ibuzanya ibyo Imana itigeze ibuzanya maze
iherukiriza ku kubuzanya ibyo Imana yategetse.
Abantu benshi bashakaga cyane kugaruka ku butungane no kwiyoroshya byarangaga
itorero rya mbere. Bafataga byinshi mu migenzo yahawe intebe mu Itorero ry’Ubwongereza
nk’aho ari amashusho yo gusenga ibigirwamana, bityo mu mutimanama wabo ntibashoboraga
kwifatanya n’iryo torero mu masengesho yaryo. Ariko kubera ko itorero ryari rishyigikiwe
n’ubutegetsi bwa Leta, ntiryashoboraga kwemera ko habaho ibitekerezo bihabanye biba mu
mihango yaryo. Itegeko ryasabaga ko abantu bose baboneka mu gihe cyo gusenga kandi
rikabuzanya amateraniro yose mu by’idini atatangiwe uburenganzira, ubirenzeho wese akaba
yahanishwa igifungo, gucibwa mu gihugu, cyangwa kwicwa.
Mu itangira ry’ikinyejana cya cumi na karindwi, umwami wari umaze kwima ingoma mu
Bwongereza yatangaje ko yiyemeje guhatira “Abaharanira Ubutungane” 330 “gukurikiza
amategeko y’Itorero ry’Ubwongereza, bitaba ibyo bakameneshwa mu gihugu cyangwa
bakagerwaho n’ishyano.” 331 Kubera ko bahigwaga, bagatotezwa kandi bagafungwa,
ntibabonaga ko ahazaza hazigera haba heza ku buryo benshi muri bo bageze ubwo babona
“ko Ubwongereza butakiri ahantu ho guturwa n’abantu bashaka gukorera Imana bakurikije
ibyo umutimanama wabo ubategeka.” 332 Amaherezo bamwe biyemeje guhungira mu
Buholandi. Bahuye n’ingorane, ibihombo, ndetse no gufungwa. Imigambi yabo yakomwaga
mu nkokora maze bakagambanirwa bagashyikirizwa abanzi babo. Nyamara amaherezo
209