Itorero na Leta ku Rugamba

Itorero na Leta ku Rugamba
Ubwo Yobu yumvaga ijwi ry’Imana mu nkubi y’umuyaga, yaravuze ati: “Ni cyo kinteye
kwizinukwa, nkaba nihannye, nigaragura mu mukungugu no mu ivu.” 660 Igihe Yesaya
yabonaga ubwiza bw’Imana maze akumva ijwi rirenga ry’abakerubi basingiza Imana bati:
“Uwiteka Nyiringabo arera, arera, arera, . . .” ni bwo yatatse ati: “Mbonye ishyano, ndapfuye,
kuko nanduye.” Pawulo amaze kuzamurwa akajyanwa mu ijuru rya gatatu maze akumva
ibintu umuntu atabasha kurondora, yiyise “uworoheje hanyuma y’abera bose.” Yohana
ukundwa wahoraga mu gituza cya Yesu kandi witegereje ikuzo rye, ni we waguye imbere ya
marayika maze amera nk’upfuye. 661
Abagendera munsi y’umusaraba w’i Kaluvari ntibashobora na rimwe kwishyira hejuru
cyangwa kwirata ko bamaze gucika ingoyi y’icyaha. Bazirikana ko ibyaha byabo ari byo
byateje umubabaro ukomeye wamenye umutima w’Umwana w’Imana, kandi iki gitekerezo
kizabatera kwicisha bugufi. Ababa hafi ya Yesu basobanukirwa neza intege nke ndetse
n’ubunyacyaha (kamere ihora ihengamiye ku cyaha) by’inyokomuntu, bityo ibyiringiro
byabo rukumbi biri mu byo Umukiza wabambwe akazuka yakoze.
Muri iki gihe ukwezwa kwamamaye mu isi ya Gikristo kujyanirana n’umwuka wo
kwishyira hejuru no kwirengagiza amategeko y’Imana. Bene uko kwezwa ntikugaragara mu
byo Bibiliya yigisha. Abamamaza uko kwezwa bigisha ko ari umurimo ukorwa mu kanya
gato bikaba birangiye, kandi ko kubwo kwizera konyine, uwo murimo ubageza ku butungane
bwuzuye. Baravuga bati: “Izere gusa, bityo umugisha ni uwawe.” Uwakira uko kwezwa nta
wundi mwete asabwa kugira. Na none kandi bahakana ububasha bw’amategeko y’Imana,
bakavuga ko babatuwe ku nshingano yo kubahiriza amategeko. Ariko se, byashoboka ko
umuntu yaba uwera, ahuje n’ubushake bw’Imana n’imico yayo nyamara atagendana
n’amategeko agaragaza kamere yayo n’ubushake bwayo, ndetse akerekana ibiyishimisha?
Kwifuza idini ryorohereza abantu, ridasaba umuhati, kwigomwa no kwiyanga ndetse no
kwitandukanya n’iby’isi, byatumye habaho imyizerere yabaye gikwira ari yo myizerere yo
kwizera, kwizera gusa. Ariko se ijambo ry’Imana ryo ryavuze iki? Intumwa Yakobo aravuga
ati: “Mbese bene Data, byavura iki, niba umuntu avuga yuko afite kwizera, nyamara akaba
ari nta mirimo akora? Bene uko kwizera kwabasha kumukiza?. . . Wa muntu utagira imirimo
we, ntuzi yuko kwizera kutagira imirimo ari imfabusa? Mbese sogokuruza Aburahamu
ntiyatsindishirijwe n’imirimo, ubwo yatangaga Isaka umwana we ngo atambwe ku gicaniro?
Ubonye yuko kwizera kwafatanije n’imirimo ye, kandi ko kwizera kwe kwatunganijwe rwose
n’imirimo ye? . . . Mubonye yuko umuntu atsindishirizwa n’imirimo, adatsindishirizwa no
kwizera gusa.” 662
Ibyo ijambo ry’Imana rihamya bivuguruza iyi nyigisho igusha abantu mu mutego ivuga
ibyo kwizera kutagira imirimo. Ntabwo ukwizera ari ko gusaba guhabwa ibyiza by’ijuru
nyamara nta kuzuza ibyangombwa bishingirwaho mu gutanga imbabazi. Ukwibeshya ni ko
gukora ibyo kuko ukwizera nyakuri gushingiye ku masezerano y’Ibyanditswe Byera ndetse
no ku cyo byigisha.
346