Itorero na Leta ku Rugamba

Itorero na Leta ku Rugamba
Igice Cya 24 – Ahera Cyane
Ingingo ivuga iby’ubuturo bwera ni yo yabaye urufuguzo rw’ubwiru bwo gucika intege
gukomeye kwabayeho mu mwaka wa 1844. Iyo ngingo yashyize ahagaragara ukuri kuzuye
gufitanye isano kandi kutanyuranya kwerekanaga ko ukuboko kw’Imana kwari kwarayoboye
itsinda rikomeye ryigishaga ubutumwa bwo kugaruka kwa Kristo. Iyo ngingo kandi
yahishuye inshingano y’umurimo wagombaga gukorwa kubera ko yagaragazaga uko ubwoko
bw’Imana bumeze muri icyo gihe ndetse n’umurimo wabwo. Nk’uko nyuma ya rya joro ribi
ry’umubabaro no kwiheba abigishwa ba Yesu bari “basabwe n’ibyishimo ubwo babonaga
Umukiza,” ni ko abari bategereje kugaruka kwa Kristo buzuye kwizera bari bishimye. Bari
bariringiye kuzamubona aje mu ikuzo aje kugororera abagaragu be. Ubwo ibyiringiro byabo
byabaga ubusa, ntibari bakibona Yesu maze igihe bari bahagaze ku gituro cye, bafatanya na
Mariya kurira bati: “Bakuyemo Umwami wanjye, sinzi aho bamushyize.” Nuko bongeye
kumwitegereza ari ahera cyane, we Mutambyi wabo mukuru wuzuye impuhwe wagombaga
kuza bidatinze nk’umwami wabo n’umucunguzi. Umucyo waturukaga mu buturo bwera
warabamurikiye basobanukirwa ibihe byashize, ibiriho n’ibizaza. Bari bazi ko Imana
yabayoboje uburinzi bwayo budakebakeba. Nk’uko byagendekeye abigishwa ba mbere,
nubwo bo ubwabo batasobanukiwe neza n’ubutumwa bavugaga, ariko bwari ukuri mu ngingo
zose. Ubwo babwamamazaga, basohoje umugambi w’Imana, kandi umurimo wabo ntiwabaye
imfabusa ku Mwami. “Bavutse bushya bagira ibyiringiro bizima,” kandi bishimye “ibyishimo
bitavugwa ndetse buzura ikuzo.”
Ubuhanuzi bwa Daniyeli 8:14, buvuga ngo: “Bizageza iminsi ibihumbi bibiri na magana
atatu uko bukeye bukira, nyuma ubuturo bwera buzabone kwezwa,” n’ubutumwa bwa
marayika wa mbere buvuga ngo: “Nimwubahe Imana muyihimbaze, kuko igihe cyo gucira
abantu urubanza gisohoye,” bwombi bwerekezaga ku murimo Kristo akorera ahera cyane, ku
rubanza rw’igenzura, ntabwo bwerekezaga ku kugaruka kwa Kristo aje gucungura ubwoko
bwe no kurimbura abanyabyaha. Ntabwo ikosa ryari ryarabaye mu buryo basobanuraga ibihe
by’ubuhanuzi, ahubwo ryari ku cyagombaga kubaho ku iherezo ry’iminsi 2300. Bitewe n’iryo
kosa, abizera bari barahuye no gucika intege, nyamara ibyari byaravuzwe n’ubuhanuzi byose
ndetse n’ibindi byose byari byaravuzwe n’Ibyanditswe, byari byarasohoye. Igihe barizwaga
n’uko ibyiringiro byabo bitasohoye, nibwo habayeho icyari cyaravuzwe n’ubutumwa bari
barizeye kandi kigomba kubaho mbere y’uko Umukiza aza kugororera abagaragu be.
Kristo yari yaraje, ariko ntiyaje ku isi nk’uko bari babyiteze, ahubwo nk’uko byajyaga
bigaragazwa mu buryo bw’ibishushanyo, Kristo yagiye ahera cyane h’ingoro y’Imana mu
ijuru. Daniyeli amwerekana nk’uwaje icyo gihe agasanga Umukuru nyir’ibihe byose agira ati:
“Hanyuma nkitegereza ibyo neretswe nijoro, mbona haje usa n’umwana w’umuntu, aziye mu
bicu byo mu ijuru, aza umujyo umwe, ntiyaje ku isi ahubwo “yasanze wa Mukuru nyir’ibihe
byose, bamumugeza imbere.” 573
312