EUSKADIKO KOOPERATIBEN LEGEAREN GAINEKO IRUZKINAK

KOOPERATIBA SORTZEA
2.3.3. Beste arau aplikagarri batzuk
Kooperatiben 27/1999 Legearen 9. artikuluak sortzen ari den kooperatiba-sozietatea
arautzen du, baina askoz era laburragoan eta orokorragoan, eta ez du ezer berririk
ekartzen.
2.4. Estatutu-proiektuaren aldez aurretiko kalifikazioa
9. artikulua.– Estatutu-proiektuaren aldez aurretiko kalifikazioa.
1.– Sortze-eskritura eman baino lehen, eta batzar sortzaileak aurkako erabakirik hartu
ezean, kudeatzaileek estatutu-proiektuaren aurretiko kalifikazioa egin dezala eskatu
ahal izango diote Euskadiko Kooperatiben Erregistroari, zeinak hogeita hamar
eguneko epean ebatzi beharko baitu eskaria egiten denetik.
2.– Euskadiko Kooperatiben Erregistroak zuzen daitekeen akatsik aurkituko balu,
kudeatzaileei emango die haren berri; kudeatzaileek, salbu eta batzar sortzaileak
kontrakoa erabakitzen duenean, baimena izango dute akatsak hilabeteko epean
zuzentzeko.
Ez dago artikulu honi eragiten dion lege-berritasunik.
2.4.1. Manuaren izaera edo indar juridikoa
Bide hori erabiltzea, egiatan, hautazkoa da, betiere batzar sortzailearen aurkako agindurik
ez badago.
2.4.2. Esanahi praktikoa
Bide hori oso tresna baliagarria da etorkizunean estatutuen edukia zuzentzeko eskaera edo,
okerrenean ere, ukatzeko ebazpena saihestu ahal izateko.
Egia da gaur egun erregistroei buruzko legeria betetzen duten estatutu-ereduen mota asko
daudela; hala eta guztiz ere, eredu horiek eduki ezean edo ezohiko artikuluak edo xedapenak,
berriak edo zalantzazkoak ageri badira, hobe da kontsulta hori egitea.
2.4.3. Beste arau aplikagarri batzuk
Kooperatibei buruzko 27/1999 Legearen 11.2 artikuluak ere aukera hori jasotzen du, baina
haren erregulazioa oso txikia da eta ez du ezer berririk ekartzen.
2.5. Kooperatiba irregularra
10. artikulua.– Kooperatiba irregularra.
1.– Sozietatea Euskadiko Kooperatiben Erregistroan ez inskribatzeko borondatea
egiaztatzen denean eta, betiere, eskritura egiletsi denetik urtebete igaro denean
33