ADRODDIAD BLYNYDDOL MERCHED Y WAWR 2006-2007 - Netring

Eisteddfod Genedlaethol Yr Wyddgrug, Pwyllgor blynyddol Ffermwyr Ifanc, Pwyllgor yr
Urdd, Pwyllgor trefnu Gŵyl Ranbarth Glyn Maelor.
Pleser oedd croesawu ein Cyfarwyddwr Tegwen Morris a’r Llywydd Cenedlaethol Mary
Price i’r pwyllgor Rhanbarth yng Ngholwyn a Glyn Maelor yn yr Hydref. Diolch i holl
swyddogion y canghennau a’r rhanbarthau am eu dycnwch, eu dyfalbarhad a’u gwaith caled
bob amser.
Bu cyfnod y Gwanwyn a’r Haf yn un hynod o gyffrous a phrysur eleni yn sgil “Dathliadau’r
Deugain”, a chafwyd digwyddiadau cofiadwy a diddorol yn rhanbarthol a Chenedlaethol. Y
prif weithgaredd a chyfrifoldeb oedd paratoi a chroesawu’r Eisteddfod Genedlaethol i’r
Wyddgrug ym mis Awst a chafwyd cydweithio hapus rhwng swyddogion ac aelodau'r ddau
ranbarth sef Colwyn a Glyn Maelor i sicrhau llwyddiant Y Babell. Hefyd cafwyd nifer o
weithgareddau eraill yn lleol, rhanbarthol a Chenedlaethol a chefais lawer o bleser a
mwynhad yn mynychu, cynorthwyo a threfnu.
O ran gweithgareddau cenedlaethol cynhaliwyd Cwrs Crefft yn Llysfasi. Bu’r Cinio’r
Llywydd yn y Ganolfan Gynhadledd yn Llandudno. Braf oedd croesawu nifer fawr o’r
aelodau a’n gwraig wadd sef Nerys Jones o Faldwyn ac adloniant gan grŵp ifanc o Fro Ddyfi.
Mynychais y Cyfarfod Blynyddol ym Machynlleth ym mis Mai, a braf oedd cael bod yn rhan
o’r bwrlwm cystadlu a’r gweithgareddau gydol y dydd. Carwn longyfarch canghennau
Bryneglwys a Llandegla ar ddod yn drydydd yng nghystadleuaeth Llyfr Lloffion a chlod
uchel i gangen Uwchaled. Daeth cangen Abergele yn drydydd yn y gystadleuaeth Adloniant.
Yn y cystadlaethau chwaraeon daeth Rhuthun yn gyntaf yn y Chwist; Tenis Bwrdd -1af: Tîm
Rhanbarth Glyn Maelor - 3ydd: Llangwm, Badminton -1af : Dinbych; Dewis Dau Ddwrn -
3ydd: Pentrefoelas Diolch hefyd i’r holl aelodau eraill fu’n cystadlu.
Cafwyd diwrnod gwych yn Y Bala ar ddechrau Mehefin pan berfformiwyd “Pasiant Y
Dathlu” yn Ysgol Y Berwyn, a’r Gymanfa Ganu yng Nghapel Tegid i ddilyn. Pleser oedd
cael bod yno yn cynorthwyo a chymryd rhan fel arweinydd côr Rhanbarth Colwyn. Ymunais
â Rhanbarth Colwyn ar eu taith gerdded genedlaethol ar y glannau o Abergele i Landdulas.
Taith ddiddorol a chwmni difyr gyda phicnic blasus a chacen Y Dathlu ar ddiwedd y daith
(diolch i Diane y Llywydd!) Bu Rhanbarth Glyn Maelor yn cerdded hefyd yn ardal Maesglas
Treffynnon a chael pnawn pleserus.
Mynychais y Sioe yn Llanelwedd, a bu nifer dda o’r aelodau yn cystadlu yno yng
nghystadlaethau’r Mudiad Yr uchafbwynt mwyaf i’r ddau ranbarth eleni oedd croesawu’r
Eisteddfod Genedlaethol i’r Wyddgrug ym mis Awst. Bu cryn baratoi a gweithio diwyd am
rai misoedd i sicrhau llwyddiant i’r Ŵyl. Bu’r babell yn fwrlwm gydol yr wythnos a
channoedd o ymwelwyr yn mwynhau croeso twymgalon Merched y Wawr. Cafwyd
arddangosfa arbennig o safon uchel o waith llaw unigryw nifer o aelodau o’r ddau ranbarth.
Llawer o ddiolch i’r swyddogion ac aelodau a fu’n gweithio’n ddiwyd ac yn fy nghynorthwyo
gyda’r paratoadau i sicrhau llwyddiant y babell. Hefyd llawer o ddiolch i’r holl aelodau a
fu’n cynorthwyo gyda’r bar te ac am eu rhoddion o GANNOEDD o gacennau cri!. Bu rhai
hefyd yn cynorthwyo ym mhabell Y Dysgwyr, yn cynnal Gweithdai Crefft, ac eraill yn
sgwrsio a chwarae gemau Iaith , diolch i bawb. Ar y dydd Mercher cafwyd perfformiad eto
o’r Pasiant (rhanbarthau’r Gogledd) ar lwyfan Y Brifwyl, a chael mwynhau Te Mefus wrth
feini’r Orsedd. Mae’n siŵr mae’r “syrpreis” mwyaf oedd deall fod y babell wedi ennill y
wobr gyntaf am y babell orau yn y sector gwirfoddol a derbyniwyd tlws Sefydliad Y Merched
i’w dal am flwyddyn
28