ADRODDIAD BLYNYDDOL MERCHED Y WAWR 2006-2007 - Netring

wyllgor Chwaraeon gweithgar sydd bob mis Medi yn trefnu'r dyddiadau ar gyfer yr ornestau
rhanbarthol. Mae'r pwyllgor yma yn trefnu taith gerdded yn flynyddol hefyd - ac un noson
arbennig yn eu calendr yw'r 'Noson Bowlio Deg' - sy'n llwyddo i ddenu dros gant o aelodau i
gymryd rhan. Dyna rwy’n credu oedd prif bwyntiau ein rhanbarth ni - nid yw'r gofod yn
caniatáu i mi ddweud rhagor!
RHANBARTH MÔN
Bu aelodau Merched y Wawr Môn yn brysur yn ystod y flwyddyn a aeth heibio yn cynnal
gweithgareddau yn lleol ac yn genedlaethol. Cymerodd 16 o dimau ran yn y Cwis Hwyl ym
mis Tachwedd. Cynhaliwyd gwasanaeth carolau yn Llangefni, yr elw o £375 yn cael ei
drosglwyddo i gymdeithas clefyd ‘Motorneurone’.
Croesawyd Mrs. Mary Price i bwyllgor rhanbarth mis Ionawr. Yn ystod ei hymweliad
cyflwynodd dusw o flodau i Jane Owen a enwebwyd gan ei changen yng nghystadleuaeth
Syrpreis, Syrpreis, cylchgrawn ‘Y Wawr’, aelod ffyddlon sydd wedi rhoi gwasanaeth
clodwiw i’r mudiad ers ei gychwyn. Cafwyd achlysur arbennig i ni ym Môn pryd y bu Mrs.
Mary Price ein Llywydd Cenedlaethol gyda Mrs. Marged Jones ein Llywydd Anrhydeddus yn
dadorchuddio plac er cof am Miss Gwyneth Evans ein Llywydd cyntaf ym mynwent Salem,
Bryngwran.
Cyfraniad rhanbarth Môn i Rhialtwch y Rhuddem yn y Bela oedd Sioe Ffasiwn dros y
deugain mlynedd diwethaf. Cafodd ambell aelod wisgo dillad ffasiynol am yr eildro yn eu
hanes. Cafwyd diwrnod i’w gofio.
Ym mis Mehefin cynhaliwyd y daith gerdded flynyddol, tro hyn yn ardal Moelfre a sicrhawyd
elw o £2,127 er budd apêl Cancr yr wygelloedd. Ymunodd Gwyneth M. Jones Cyn Lywydd
Cenedlaethol ag aelodau ar y daith gerdded genedlaethol yn y Dingle, Llangefni a chafwyd
picnic i ddilyn. Bu cynrychiolaeth o gangen Maelog yn Sioe Llanelwedd am y tro cyntaf ers
rhai blynyddoedd. Bu amryw o’r aelodau yn gweini ym mhabell Merched y Wawr yn Sioe
Môn ym mis Awst. Cafwyd arddangosfa o luniau a dillad o’r blynyddoedd a fu.
Llawenydd yw cofnodi fod Clwb Gwawr wedi ei ddechrau yng Nghaergybi, Clwb Lawd, ond
yn anffodus daeth un clwb a dwy gangen i ben ar yr ynys ond mae amryw o’r aelodau wedi
ymuno â changhennau eraill.
Cafwyd cynrychiolaeth o’r rhanbarth yng Ngŵyl y Pum Rhanbarth, Cinio’r Llywydd yn y
gogledd a’r Penwythnos Preswyl. Cafwyd llwyddiant ym myd chwaraeon, Margaret Môn
Jones a Jenny Fleck o gangen Amlwch yn gyntaf yn y dominos a Margaret Jones, cangen
Cemaes yn gyntaf yn y golff.
Diolch i swyddogion cenedlaethol am eu cymorth a’u cefnogaeth inni yn y rhanbarth yn ystod
y flwyddyn a aeth heibio.
RHANBARTH PENFRO
Yn anffodus, rhaid dechrau’r adroddiad hwn eleni ar nodyn trist, sef ein colled fel rhanbarth
ac yn wir yn genedlaethol, ym mherson y diweddar Eirlys Peris Davies. Fel y gwyddoch,
roedd Eirlys yn berson llawn bwrlwm ac afiaith, yn ifanc ei meddylfryd, ac yn frwd tu hwnt o
gefnogol i’r ‘pethe da’. Mae’n anodd credu ei bod wedi cael ei chymryd mor annisgwyl o
ganol ei gwaith, fel petai. Ar nodyn personol, rydw i wedi colli ffrind da a theyrngar, a oedd
yn gwmni bendigedig. Ar raddfa sirol, teimlaf ein bod wedi colli arweinyddes gadarn ei barn,
a gweithwraig ddiflino dros y mudiad. Mae Cymru’n dlotach o’i cholli.
24