ADRODDIAD BLYNYDDOL MERCHED Y WAWR 2006-2007 - Netring

Fachynlleth ymhle dyfarnwyd y drydedd wobr iddi. Daeth llwyddiant i ganghennau Pwllheli
(cyntaf) ac Abersoch (ail) yn y gystadleuaeth llyfr lloffion ym Machynlleth hefyd.
Cafodd y cerddwyr sy'n ein plith amrywiol deithiau trwy'r flwyddyn, ynghyd â mwynhau eu
hunain yn ardal Caerdydd a'r Fro ar eu penwythnos cerdded ym mis Hydref. Cafwyd cwmni
Esyllt Jones, Is-lywydd Cenedlaethol, a Beth Leyshon ar y daith gyntaf.
Mae'n anodd credu efallai bod deugain mlynedd ers bodolaeth Merched y Wawr ond dyna
sy'n wir a dathlodd y mudiad yn genedlaethol gydol y flwyddyn a Rhanbarth Dwyfor hefyd
wedi gwneud ei siâr.
Ffurfiwyd y gangen gyntaf yn y Parc yn Sir Feirionnydd ym Mai 1967 a buan y lledodd y
brwdfrydedd drwy Gymru. Cricieth gafodd y weledigaeth gyntaf yn Nwyfor pan ffurfiwyd
cangen yno ym Medi 1967 ac Abersoch yn dynn wrth ei sodlau yn Nhachwedd yr un
flwyddyn. Erbyn diwedd 1968 roedd cangen ym Mynytho, Pwllheli, Pistyll, Pwllheli a
Threfor.
Cyfarfu'r holl ranbarthau yn Y Bala fis Mehefin eleni i ddathlu a chyflwynwyd pasiant mewn
dau eisteddiad a recordiwyd cymanfa ganu i'w darlledu ar Dechrau Canu, Dechrau Canmol.
Cyfraniad Rhanbarth Dwyfor oedd ffurfio côr i ganu cân wladgarol a gyfansoddwyd gan
Anna Jones o gangen Abersoch. Yr arweinydd oedd y Llywydd Rhanbarth, Enid Owen,
cangen Llaniestyn, a'r cyfeilydd, Elsie Roberts o gangen Mynytho. Gwahoddwyd
rhanbarthau'r gogledd i gyflwyno eu rhan hwy o'r pasiant ar lwyfan yr Eisteddfod yn Yr
Wyddgrug hefyd. Yn ddiweddarach yn y pnawn, mwynhawyd te mefus ger Cerrig yr Orsedd,
ynghyd â rhyddhau 800 o falwnau coch gyda'r arian yn mynd at Gymorth i Fenywod.
Ar Orffennaf 14eg cynhaliodd pob rhanbarth daith gerdded ac, yn wyrthiol, cafwyd tywydd
braf i ni yn Nwyfor gerdded taith gylch o amgylch Porth Dinllaen a gychwynnodd yn Nefyn.
Cafwyd cwmni un o'r Swyddogion Cenedlaethol, sef Einir Wyn o gangen Abersoch, Isysgrifennydd
y Mudiad.
Penderfynu beicio rownd canghennau'r rhanbarth oedd syniad Einir Wyn, Abersoch, a Meryl
Davies, cangen Llaniestyn, i ddathlu'r deugain ac os oedd hi'n braf i'r cerdded, bwrw fel o
grwc oedd hi pan aethant rownd canghennau Llŷn ond cawsant groeso a chinio gan Ann
Stephens Jones ym Morfa Nefyn a chroeso a chlamp o de gan aelodau cangen Trefor pan
ddiweddwyd y daith yno - a hithau'n dal i fwrw!
Roedd hi'n well tywydd pan aethant o amgylch canghennau Eifionydd ac ymunodd Elsie o
gangen Mynytho â nhw. Rhwng y beicio, cafwyd croeso a choffi yn Nant Gwynant, panad
yng Ngolan, gwledd a threiffl ym Mhencaenewydd a chwmni aelodau heini rhai o'r
canghennau i'w hybu ymlaen ar eu taith - diwrnod arall i'w gofio.
Penderfynodd y Rhanbarth mai taith ac oedfa yn Soar-y-Mynydd oedd y ffordd i ddathlu a
ffwrdd â ni ar un o'r ychydig ddyddiau braf a gafwyd ym mis Gorffennaf.
Cymerwyd rhan yn yr oedfa gan Enid Owen, Llaniestyn; Margiad Elias, Cricieth; Ann Jones,
Bryncroes; Ann Shilvock, Pencaenewydd; Eirlys Jones, Pwllheli; Anna Jones, Abersoch;
Megan Lloyd Williams, Golan, ac Agnes Hill, Mynytho. Traddodwyd anerchiad effeithiol
gan y Parch. Eirlys Gruffydd, Yr Wyddgrug, ar wahanol fynyddoedd y Beibl a llanwodd y
canu digyfeiliant y capel a theimlai pawb mai da oedd i ni gael bod yno. Bu'n rhaid siopa yn
Nhregaron wedyn a swpera yn Aberystwyth cyn dychwelyd i Ddwyfor ar ôl treulio diwrnod
yn dathlu.
20