ADRODDIAD BLYNYDDOL MERCHED Y WAWR 2006-2007 - Netring

yn cymryd rhan yn y Cwis Hwyl Cenedlaethol a gynhaliwyd yng ngwesty Meifod,
Bontnewydd. Cyflwynodd yr Is-bwyllgor Anabl y swm o £3,000 i Uned Therapi Cyflenwol,
Ward Alaw, Ysbyty Gwynedd, sef yr elw a wnaed trwy gynnal distawrwydd noddedig ym
mis Ionawr, gyda ffair haf a bore goffi ym mis Mehefin.
Cynhaliwyd noson Bowlio Deg yng nghanolfan Glasfryn ym mis Ionawr gyda chwe thîm yn
cymryd rhan ac aeth pump o’r timau hyn ymlaen i gystadlu yn erbyn timau o Ddwyfor a
Meirionnydd mewn twrnament a gynhaliwyd ym mis Chwefror. Cynhaliwyd noson
Chwaraeon ym Methel ym mis Mawrth. Aeth nifer dda o aelodau’r rhanbarth i Ginio’r
Llywydd yn y Venue, Llandudno ym mis Mawrth.
Yn rhifyn y gwanwyn o’r Wawr ymddangosodd gwaith dwy o’n haelodau - stori fer gan Mary
Hughes, Y Groeslon ac erthygl gan Margaret Wyn Roberts, Caernarfon. Aeth nifer o
aelodau’r rhanbarth i Basiant Dathlu’r Deugain yn y Bala ym mis Mehefin a bu parti canu’r
rhanbarth o dan arweinyddiaeth Einir Wyn, Rhiwlas yn cymryd rhan yn y pasiant.
Cynhaliwyd noson Dathlu’r Deugain ym Mynydd Gwefru, Llanberis ym mis Mehefin. Bu
pedwar ugain o’r aelodau yn blasu gwin a siocled wrth wrando ar awduron o’r rhanbarth yn
darllen eu gwaith - Meg Elis, Angharad Tomos, Angharad Price, Beryl Stafford Williams,
Alys Jones, Eurgain Haf, Manon Wyn - ynghyd ag aelodau cangen Bethel yn darllen rhan o
‘Te yn y Grug’ Kate Roberts a Mary Hughes, y Llywydd yn darllen englyn a gyfansoddwyd
yn arbennig ar gyfer Dathlu’r Deugain gan Annes Glynn. Roedd hefyd yn gyfle i
gymdeithasu a mwynhau cwmni Mary Price a Tegwen ac roedd torri cacen y dathlu yn goron
ar y cyfan. Yn ogystal bu’r noson yn gyfle i gyhoeddi buddugwyr cystadleuaeth y Llyfr
Lloffion - cangen Bethel a ddaeth ar y brig y tro hwn.
Ym mis Gorffennaf cynhaliwyd taith gerdded Genedlaethol y rhanbarth ym Meddgelert gyda
Jean Evans yn arwain y daith. Derbyniodd canghennau Bethel, Y Groeslon a Chaernarfon
arian o gronfa’r Loteri, Arian i Bawb.
RHANBARTH CAERFYRDDIN
Yn ystod y flwyddyn collodd y rhanbarth ddwy aelod weithgar. Ar ddechrau’r flwyddyn y
Cyn-Lywydd rhanbarth (2003-2005) Sara Leyshon, ac yna wythnos Sioe Llanelwedd Mair
James, fu’n stiwardio yn y Sioe Frenhinol am flynyddoedd. Mair hefyd wnaeth fathodyn
Llywydd y Rhanbarth.
Dechreuwyd y flwyddyn gydag Ysgol Undydd yn Ysgol Nantgaredig. Cymerodd unarddeg o
ganghennau ran yn y Cwis Hwyl Cenedlaethol a dwy gangen yn dod yn gydradd gyntaf sef
Geler a Chaerfyrddin.
Un o’r uchafbwyntiau oedd cael paratoi’r babell erbyn Eisteddfod yr Urdd a chael croesawu
cyd aelodau a ffrindiau i gymdeithasu gyda ni ac aelodau Clybiau Gwawr y Sir. Daeth
llwyddiant hefyd yn yr Ŵyl Haf ym Machynlleth gyda gwobrau yn dod i ganghennau Bro
Alma, Pencader a Llandeilo. Bu rhai o’r aelodau yn cymryd rhan yn y Pasiant yn y Bala, a
phawb oedd wedi teithio yno wedi mwynhau’r diwrnod. Prynhawn Sadwrn, 14 Gorffennaf
aeth rhai aelodau ar daith gerdded ar Lwybr yr Arfordir yn Llanelli a chael prynhawn hyfryd.
RHANBARTH CEREDIGION
Trefnodd pwyllgor Celf a Chrefft Ceredigion wibdaith i Gaer. Daeth 22 o dimoedd ynghyd i
gymryd rhan yn y Cwis Hwyl. Yng Ngheredigion y rhai a ddaeth i’r brig oedd Bro
Cranogwen ag Aberystwyth (tri) - 49 o farciau; Llanfarian - 47 o farciau; Aberystwyth (un) -
45 o farciau. Cynhaliwyd y chwaraeon yng Ngwesty Llanina, Llanarth ac fe gafwyd dwy
16