NAI VOLA TABU - GospelGo

9. O ira oqo na tamata dauvuki tani, ka gone
lasulasu, na gone e ra sega ni dau via rogoca na i
vunau i Jiova;
10. Era tukuna vei ira na daurairai, “Dou kakua ni
raica,” vei ira talega na parofita, “Kakua ni tukuna
vei keimami na ka dodonu; tukuna ga vei
keimami na ka e sega ni yaga, parofisaitaka mai na
ka lasu.
11. Dou lako tani ena sala, lako vakatikitiki e
gaunisala me lako mai na Le Dua Yalosavasava e
Isireli de tarovi na Nona lako mai vei keimami.”
12. O koya oqo sa tukuna na Le Dua
Yalosavasava i Isireli: “Ni dou sa beca na vosa
oqo, ka vakararavi kina veivakasaurarataki kei na
ka vereverea mo dou bula kina,
13. O koya oqo na ca sa na tarai kemudou ena
vaka e dua na bai vatu kaukauwa sa vakarau bale,
ka sa vakalakala tu ena kasura ga vakasauri.
14. Ena basuka o koya me vaka na kavoro ni bilo
vua na dautuli bilo, ena kakavorovoro
vakamatailalai; ena sega ni dua me vo, sa sega
kina ni kune na kena i caca me buka ena
matadravu, se me vakayagataki me taki kina na
wai ena i keli.”
15. Ni sa tukuna o Jiova, na Le Dua Yalosavasava
i Isireli: “Ni dou sa lesu mai ka tiko malua dou na
vakabulai; ena vakanomodi kei na lomadina me
nomudou kaukauwa,” ia dou sa qai bese ga,
16. Dou a tukuna, “E sega, keimami na dro ena
ose”― dou sa dro ga! “Keimami na vodo lako ena
ose totolo”― ia e ra na totolo sara o ira e ra cemuri
kemudou!
17. Ena dro e lewe dua na udolu ni dua ga e bolei
ira, ni bolei kemudou e lewe lima dou na dro, me
yacova ni dou sa vaka e dua na duru ena dela ni
ulunivanua kei na dua na kuila ena delana.
Na Kalou Ena Qai Yalololoma
18. O koya oqo ena qai wawa kina o Jiova me
yalovinaka vei kemudou; ena ka oqo ena laveti
kina o Koya, me rawa ni lomani kemudou mai
kina. Ni sa lewa vakadodonu na Kalou o Jiova; e
ra kalouvinaka o ira kecega e ra sa waraki Koya.
19. O ira na tamata e ra tiko mai Saioni e
Jerusalemi; dou na sega tale ni tagi. Ena lomani
iko o Koya ni rogoca na domo ni nomu tagi; ni sa
rogoca o Koya ena sauma mai vei iko.
20. E dina na Turaga ena solia mai vei iko na
madrai ni rarawa kei na wai ni
veivakasaurarataki, o ira na nomu qasenivuli e ra
na sega ni vunitaki tale, o na raici ira tikoga na
nomu qasenivuli.
21. Na daligamudou ena rogoca na domo mai
dakumudou, ka vaka, “Oqo na sala, mai lako
kina,” ni dou sa vuki kina ligamudou i matau se
kina i mawi.
22. Dou na qai vakacacana na i botani siliva ni
matakau siliva, kei na i ukuuku koula ni nomudou
matakau koula, o na biuta laivi me vaka na
dukadukali; o na tukuna kina, “Mo lako tani!”
590
AISEA
23. Ena qai vakatauca na uca me baleta na nomu
sore ni kau o sa kaburaka kina qele, na madrai na
vua ni qele; ena vakalewe ka lelevu, ena siga o ya
na nomu bulumakau e ra na kana ena veico
drokadroka.
24. Na bulumakau talega kei na luve ni asa e ra
daucakacaka ena were e ra na daukania na ka
tuituina, ka sa vakasavasavataki ena i sivi ka iriva
na i irinicagi.
25. E ra na tiko ena vei ulunivanua cecere kei na
vei ulu ni delana ena uciwai kei na veibasogana
lalai, ena siga ni veivakamatei levu, ena bale na
vale cecere.
26. Ena qai vaka na rarama ni siga na rarama ni
vula, kei na rarama ni matanisiga ena qai
vakavitu, me tautauvata kei na rarama ni siga e
vitu, ena gauna sa vauca kina o Jiova na nodra
mavoa na Nona tamata ka vakabula na we ni
kedra kuita.
Na Lewai Nei Asiria
27. Raica, na Yaca i Jiova sa lako vakayawa mai,
sa katakata tu na Nona cudru, ka bibi na Nona i
colacola; na tebenigusuna sa cudru vakalevu, kei
na yamena sa kama voli me vaka na bukawaqa.
28. Na Nona i cegu sa vaka na uciwai sa vuabale
ka lako cake me yaco ki domodra, me tavulona na
vei matanitu ena vulo lasu; ena dua na i tacori ena
gusudra, me ra vakacalai kina.
29. Ena qai dua na nomudou sere me vaka ena
bogi sa ia kina na solevu tabu, kei na reki vakayalo
me vaka e dua sa uvu bitu ni sa lako tiko mai kina
ulunivanua i Jiova, kivei Koya na kaukauwa
Isireli.
30. Ena vakarogoya na domona vakaTuraga o
Koya me rogoci, ena vakaraitaki o Koya na ligana
ni sa tau mai, ena cudru katakata kei na
yameyame ni bukawaqa sa veisebayaki kei na
cava kei na uca cevata.
31. Ni qai rogo na domo i Jiova, ena qai samuti
Asiria sobu ena Nona i titoko.
32. Ena tikina kece e tau kina na titoko ni cudru,
me vaka sa vakatauca vua o Jiova, ena ia vata kei
na tibereli kei na qiri api; ia ena i valu rerevaki ena
vala tukuna o Koya.
33. Ni sa vakarautaki mai e liu o Tofeci, ia sa
vakarautaki oqori me nona tui. Sa cakava me
titobu ka rabailevu; a kena i binibini bukawaqa
kena buka drokadroka sa levu; a i cegu i Jiova, me
vaka na sulifure, sa dave tu ena vakacaudreva.
Na Sakasaka Ena Basika Ni Sega Ni Vakabauti
Na Kalou
31. Ena ca o ira sa lako sobu ki Ijipita me
kerea na veivuke, ka vakararavi kina ose, kina qiqi
ni valu baleta ni ra sa rui levu, na kena tamata i
valu dauvodo ose e ra sa kaukauwa sara, ia e ra
sega ni bau golevi Koya na Le Dua Yalosavasava i
Isireli, e ra sega ni vakasaqarai Jiova!