NAI VOLA TABU - GospelGo

22. Nai votavota vei Isireli na Nona tamata, Ni sa
sega ni mudu na Nona yalololoma.
23. Sa nanumi keda, ena noda vakaloloma tu, Ni
sa sega ni mudu na Nona yalololoma;
24. Sa vakabulai keda mai vei ira na meca, Ni sa
sega ni mudu na Nona yalololoma;
25. Sa solia na kakana ki vei ira kecega na bula, Ni
sa sega ni mudu na Nona yalololoma.
26. Io, vakavinavinaka Vua na Kalou ni lomalagi!
Ni sa sega ni mudu na Nona Yalololoma.
Same 137 Vakanananu Ki Saioni Mai Na
Vanua Tani
1. Ena bati ni uciwai mai Papiloni, Keimami a
dabe tiko kina, ka tagi, Keimami qai nanumi
Saioni.
2. Keimami vakaliliga tu kina na neimami api
ena loma ni vei wilou.
3. Mai kea, o ira sa kauti Keimami vakavesu, era
kerea me dua na sere, kei ira sa vakalolomataki
keimami tiko, era sa vinakata na marau, ka
tukuna, “Mo ni lagata mada mai e dua na sere kei
Saioni!”
4. Me Keimami lagata vakacava na sere i Jiova
ena vanua tani?
5. Kevaka, au sa guilecavi Jerusalemi, me qai
guilecava na ligaqu i matau na ka e dodonu me
caka!
6. Kevaka, au sa guilecavi iko, Jerusalemi me qai
kabi na yamequ e lomaqu – Kevaka au sa sega ni
vakacerecerei Jerusalemi na usutu ni noqu reki.
7. Mo Ni nanuma Jiova ena vukudra na luvei
Itomi, na siga kei Jerusalemi, era sa tukuna, “Dou
basuka dou basuka, na kena yavu talega!”
8. Oi kemudou na goneyalewa ni Papiloni, dou
na vakarusai, ena marau o koya ena na
veisausaumi vei kemudou me vaka ga sa dau
cakava vei Keimami!
9. Sa ka ni marau vei Koya ena tauri kemudou
ka viritaki kemudou kei ira na nomudou lalai ki
na veivatu!
Same 138 Na Vinaka Nei Jiova Vei Ira Na
Yalodina
1. Au na vakacerecerei Kemuni ena yaloqu
taucoko;
Ena matadra kecega na veikalou au na lagata
na vakavinavinaka vei Kemuni.
2. Au na cuva vaka ki na Nomuni Vale Tabu, ka
vakavinavinaka vei Kemuni,
Ena vuku ni Nomuni yalovinaka kei na
Nomuni yalodina; ni Kemuni sa vakacerecerea na
Nomuni Vosa me uasivia na Yacamuni.
3. Ena siga au a tagi yani kina, o Ni sa rogoci au,
Ka cakava me’u doudou ka kaukauwa ena yaloqu.
4. O ira kece na tui e vuravura era na
vakavinavinaka vei Kemuni Jiova, ni ra sa rogoca
na vosa mai na Gusumuni.
5. Io, era na lagata na sala i Jiova, ni sa levu ga
nai ukuuku i Jiova.
531
SAME
6. E dina ni sa tiko e cake o Jiova, ia, sa dau
nanumi ira na tiko e ra. o ira na dokadoka sa dau
raici ira vakayawa o Koya.
7. E dina ni’u na lakova na loma ni leqa, o Ni na
vakabulabulataki au; o Ni na dodoka na Ligamuni
me veivorati kei na nodra cudru na Kequ meca,
Kei na Ligamuni i matau ena vakabulai au.
8. O Jiova ena vakataucokotaka na ka kece e
baleti au; Na Nomuni yalololoma Jiova sa sega ni
mudu. Mo Ni kua ni vakamaumautaka na
cakacaka ni ligamuni.
Same 139 Na Kalou Sa Kilai Ira Vakavinaka
Na Tamata
1. I Jiova o Ni sa dikevi au ka kilai au.
2. O Ni sa kila na noqu tiko sobu kei na noqu
tucake; o ni sa kila na lomaqu, ni sa yawa tiko.
3. O Ni sa vakaraica vinaka na noqu i lakolako
kei na noqu davo sobu, o Ni sa kila deivaki na
noqu i valavala kecega.
4. Sa sega ni dua na vosa ni yamequ, Jiova, o Ni
sa sega ni kila, o Ni sa kila kecega.
5. O Ni sa tiko e liu, o Ni sa tiko talega e dakuqu,
sa tabaki au tikoga na ligamuni.
6. Na vuku vaka o ya sa rui dua tani sara, sa rui
cecere, au sa sega ni yacova rawa.
7. Me’u lako tani vakacava mai na Yalomuni?
Me’u dro tani vakacava mai na Matamuni?
8. Kevaka, au sa lako cake ki lomalagi, o Ni sa
tiko mai kina;
Kevaka, au sa kauta sobu na noqui mocemoce
ki Eli, o Ni sa tiko mai kina.
9. Kevaka au sa vakatabana me vaka e dua na
mataka ka me’u la’ki tiko vakayawa sara ena taba
ni wasawasa ka dua,
10. Mai kea, na Ligamuni ena liutaki au kei na
Ligamuni i matau ena tauri au.
11. Kevaka, au sa tukuna, sa dina, na butobuto
ena ubi au, na bogi sa na qai noqu rarama sara;
12. Io, na butobuto ena sega ni vuni mai vei
Kemuni, na bogi mada ga ena rarama me vaka na
siga; na butobuto kei na rarama sa tautauvata vei
Kemuni.
13. O Ni sa buli au e loma ka ubi au ena loma ni
ketei tinaqu.
14. Au na vakavinavinaka vei Kemuni, ni’u sa
buli vakavinaka ka vakamatau.
Sa totoka na cakacaka ni Ligamuni
Na yaloqu sa kila vinaka na ka o ya.
15. Na kequ i bulibuli sa sega ni vuni vei Kemuni,
Ni’u sa buli vakavuni tiko, ka buli tiko
vakamatau mai na ruku i vuravura.
16. Na Matamuni sa raica rawa tiko na veika au
na buli mai kina, era sa volai kece ena Nomuni i
Vola, me caka tiko veisiga, e dina ga ni ra se bera
ni buli.
17. Sa ka taleitaki talega vei au na Nomuni
vakanananu, noqu Kalou!
Sa sivia na kenai wiliwili kece!
18. Kevaka me’u na wilika, ena levu cake ka lailai
na mata ni nuku;