NAI VOLA TABU - GospelGo

69. O ira na dokadoka era sa tukuna na lasu me
baleti au. Ia, au na maroroya na Nomuni vakaro
ena yaloqu taucoko.
70. O ira sa urouro na yalodra, ia, oi au, au sa
taleitaka ga na Nomuni vakaro.
71. Sa yaga ka vinaka me tarai au na dredre ni
bula, me rawa ni’u vulica kina na Nomuni lewa
dodonu.
72. Nai vunau mai na Gusumuni e vinaka cake
vei au mai na dua na udolu na tikini koula kei na
siliva.
Yota - J - 10
Dei Ki Na Vosa Ni Kalou
73. Na Ligamuni sa buli au ka tuli au, Mo Ni solia
vei au na loma kasa, me’u vulica kina na Nomuni
vakaro.
74. O ira sa rerevaki kemuni era na marau ni raici
au, baleta ni’u sa nuitaka tikoga na Nomuni vosa.
75. I Jiova, au sa kila ni sa dodonu dina ga na
Nomuni lewa, kei na Nomuni dau dina o Ni sa
vakatovolei au kina ena ka rarawa.
76. Na Nomuni yalololoma kei na Nomuni
yalovinaka sa yaco me’u vinaka kina, me vaka na
Nomuni vosa vua na Nomuni tamata.
77. Me lako mai vei au na Nomuni yalololoma
dina, me’u bula kina; Ni’u sa rui taleitaka dina na
Nomuni vunau.
78. Me ra vakamaduataki na daubeitaki au
vakailasu ka cala talega; au sa dau vakanananu tu
ga ki na Nomuni vakaro.
79. O ira sa rerevaki Kemuni, me ra gole mai vei
au, o ira sa kila na Nomuni tukutuku.
80. Me sa sega ni cala na yaloqu me vaka na
Nomuni lesilesi, me’u kua ni madua kina.
Kafa - K - 11
Gadreva Na Vosa Ni Kalou
81. Sa malumalumu na lomaqu ki na Nomuni
veivakabulai, ia au sa vakanananu tu ga ki na
Nomuni vosa.
82. Na mataqu sa malumu mai ni vakasaqara tiko
na Nomuni vosa, au sa taroga kina, ni naica o Ni
na vakacegui au kina?”
83. Au sa vaka na taga ni waini ena kubou ni
kama, ia, au sa sega ga ni guilecava na Nomuni
lesilesi.
84. Sa vo beka e vica na veisiga ni Nomuni
tamata? O Ni na vakayacora na Nomuni vosa vei
ira sa vakacacani au?
85. O ira na dokadoka era sa kelia na kequ qara,
oqori sa sega ni vaka nai vunau.
86. Na Nomuni vakaro kecega sa dau dina; o ira
oqo era sa vakacacani au vakailasu; Mo ni vukei
au!
87. Sa voleka sara ni ra vakaoti au mai vuravura,
raica, au na sega ga ni lako tani mai na Nomuni
vakasala.
88. Mo Ni vakabulabulataki au me vaka na
Nomuni yalololoma vakaidina, me rawa ni’u
525
SAME
maroroya tiko ga kina nai tukutuku mai na
Gusumuni.
Lameta - L - 12
Vosa Ni Kalou E Sega Ni Veisau
89. Sa tudei ka sega ni mudu Jiova, sa vakadeitaki
mai lomalagi na Nomuni vosa.
90. Na Nomuni dau dina sa tudei ki nai
tabatamata kecega; o Ni sa tauyavutaki vuravura
ka sa vakarorogo.
91. Era sa vakarorogo tikoga me vaka na Nomuni
veivakaroti, era sa Nomuni dauveiqaravi kecega.
92. Baleta ga ni’u sa rui taleitaka na Nomuni
vunau, e dodonu me’u a sa rusa sara ena noqu
vakararawataki.
93. Au na sega ni guilecava na Nomuni vakaro, ni
Kemuni a solia kina vei au na bula.
94. Au sa Nomuni, mo Ni vakabulai au, ni’u sa
vakasaqara na Nomuni vunau.
95. Era sa waraki au na tamata ca me ra vakarusai
au, ia au sa nanuma ga na Nomuni tukutuku.
96. Au sa raica na vakataudeitaki ni veika kece e
taucoko, ia, na Nomuni vakaro sa uasivia na veika
kece.
Memi – M – 13
Lomana Na Vosa Ni Kalou
97. Au sa lomana dina na Nomuni vunau! Sa dau
noqu vakanananu ena siga taucoko.
98. Oi Kemuni, ena Nomuni vakaro, sa vakavuna
na noqu yalomatua cake mai vei ira na meca, Ni
ra sa tiko ga kei au.
99. Sa levu na noqu kila vinaka sara mai vei ira
kece na qasenivuli; baleta na Nomuni tukutuku sa
veika ga au dau vakanananu kina.
100. Au sa kila na veika sa oti, na veika mai liu
sara, baleta ni’u sa maroroya tikoga na Nomuni
tukutuku.
101. Au sa tarova na yavaqu mai na veika kecega e
ca, me’u maroroya ga kina na Nomuni vosa.
102. Au sa sega ni lako tani mai na Nomuni lewa,
baleta ni Oi Kemuni ga sa vakavulici au.
103. Au sa tovolea oti na Nomuni vosa ka sa
kamikamica dina, sa kamikamica cake mai na oni
ena gusuqu!
104. Mai na Nomuni vosa, au sa rawata kina na
kena kilai deivaki na ka; o koya oqo au sa besetaka
kina na veika kecega e lasu.
Nuni - N - 14
E Veivakararamataki Na Vosa Ni Kalou
105. Na Nomuni vosa sa cina ki na yavaqu ka sa
rarama ki na noqu gaunisala.
106. Au sa yalataka ka vakadeitaka ni’u na
maroroya na Nomuni lewa dodonu.
107. Au sa vakararawataki vakalevu; Mo Ni
vakabulabulataki au, Jiova, me vaka na Nomuni
vosa.
108. I Jiova, Mo Ni ciqoma na vakavinavinaka ni
gusuqu, ka Mo Ni vakavulica vei au na Nomuni
vunau.