NAI VOLA TABU - GospelGo

3. Na neimami Kalou sa tiko mai lomalagi; Sa
cakava ga na ka sa vinakata.
4. Ia, na nodra matakau e siliva ka koula, e ka ga
sa bulia na tamata.
5. Era vakagusuna, ia era sega ni vosa rawa;
Era vakamatana, ia era sega ni rai rawa;
6. Era vakadaligana, ia era sega ni rogo rawa;
Era vakaucuna, ia era sa sega ni boi rawa;
7. Era sa vakaligadra, ia era sa sega ni taura
rawa;
Era vakayavadra, ia era sa sega ni lako rawa;
Se me rorogo na vosa mai na nodra i tagitagi.
8. O ira sa buli ira, sa vakataki ira ga;
Sa vaka kina o ira sa vakabauti ira.
9. Isireli, mo ni vakararavi vei Jiova, sa nodra i
vukevuke, sa nodra i sasabai.
10. Na vale nei Eroni, vakadinati Jiova, sa nona i
vukevuke, sa nona i sasabai.
11. Oi kemudou sa rerevaka na Kalou, vakadinati
Jiova, o Koya na nomuni vukevuke kei
na nomuni sasabai.
12. Sa dau nanumi keda o Jiova;
Ena vakalouvinakataki keda;
Ena vakalouvinakataki Isireli;
Ena vakalouvinakataka na vale i Eroni.
13. Ena vakalouvinakataki ira sa rerevaki Jiova,
io, o ira na qase kei ira na gone.
14. Me vakalewevuqataki kemuni o Jiova Oi
kemuni kei ira na luvemuni.
15. Me vakavinavinakataki kemuni o Jiova, o
Koya sa bulia na lomalagi kei vuravura.
16. Na lomalagi kei na lomalagi e cake sa nei
Jiova, ia, na vuravura, sa solia vei ira na luve ni
tamata.
17. Na mate era na sega ni vakavinavinakataki
Jiova, se dua sa lako vei ira na galu.
18. Ia, Oi keda, eda na vakacaucautaki Jiova, mai
na gauna oqo, ka yacova na gauna kecega. Me
vakavinavinakataki o Jiova!
Same 116 Sa Vakavinavinakataki Na
Veivakabulai Mai Na Mate
1. Au sa taleitaki Jiova, ni sa rogoca na domoqu,
na domo ni noqu kerekere.
2. E na Nona sa vakarogoca, au na masuti Koya
tikoga ena noqu bula taucoko.
3. Na rerevaki ni mate sa lako siviti au,
Na mosi vakararawa kei bulu sa vesuki au;
Au sa kune leqa kei na rarawa.
4. Au sa qai masuta na Yaca i Jiova: “I Jiova, au
sa kerei Kemuni, mo Ni vakabulai au!”
5. Sa rui vinaka o Jiova, ka yalododonu; ia, sa
yalololoma na noda Kalou.
6. O Jiova, sa maroroi ira na yalodina; au a
vakamalumalumutaki, ka sa vakabulai au o Koya.
7. Na yaloqu, mo lesu ki na nomu i
vakavakacequ.
Na Kalou sa rui levu na Nona vinaka vei iko
8. O Ni sa vakabula na yaloqu mai na mate;
Na mataqu mai na wai ni mata, na yavaqu me
kakua ni bale.
522
SAME
9. Au na lako voli ena mata ni Kalou ena vanua
ni bula.
10. Au sa vakadinata, au sa qai vosa, “au sa
vakararawataki vakalevu.”
11. Au sa tukuna ena noqu vakatotolo,
“Sa lasulasu kecega na tamata.”
12. Na cava me’u cakava vei Jiova, ena vuku ni
cakacaka vinaka sa cakava vei au?
13. Au na taura na bilo ni bula, ka masuta na Yaca
i Jiova.
14. Au na cakava mada na ka au sa yalayala kina
vei Jiova, oqo, ena matadra na tamata kecega.
15. Sa ka taleitaki ena mata i Jiova, na nodra mate
na Nona tamata.
16. Sa dina Jiova, au sa Nomuni tamata;
Au sa Nomuni tamata, na luvena na Nomuni
vada; o ni sa sereka na kequ i vesu.
17. Au na vakacabora vei Kemuni nei soro ni
vakavinavinaka, Au na masuta talega na Yaca i
Jiova.
18. Au na cakava mada na ka au sa yalayala kina
vei Jiova, oqo, ena matadra na tamata kecega,
19. E na loma ni bai ni vale i Jiova, ena loma ni
koro, io, e Jerusalemi. Mo ni vakavinavinaka vei
Jiova!
Same 117 Me Ra Vakavinavinaka Vei Jiova
Na Tamata Kecega
1. Mo ni vakavinavinaka vei Jiova, Oi kemuni
na kai tani kecega!
Mo ni vakavinavinakataki Koya, Oi kemuni
na tamata kecega!
2. Na nona yalololoma levu kei na dina i Jiova sa
rui talei vei keda, kei na dina i Jiova sa tudei ka
sega ni mudu. Mo ni vakavinavinaka vei Jiova!
Same 118 Me Vakacerecerei Na Kalou Ni Sa
Sega Ni Mudu Na Nona Yalololoma
1. Me vakavinavinakataki o Jiova, ni sa vinaka o
Koya! Kei na Nona yalololoma sa tudei ka Sega ni
mudu.
2. Me ra tukuna tikoga na Isireli, “Ni sa tudei ka
sega ni mudu na Nona yalololoma.”
3. Me ra tukuna tikoga na vale nei Eroni, “Ni sa
tudei ka sega ni mudu na Nona yalololoma.”
4. Me ra tukuna o ira sa rerevaki Jiova, “Ni sa
tudei ka sega ni mudu na Nona yalololoma.”
5. Au a kacivi Jiova ena gauna dredre, sa rogoci
au o Jiova, ka sa vakadaberi au ena vanua vinaka.
6. Sa totaki au o Jiova, au na sega ni rere, Na
cava ena rawa ni cakava vei au na tamata?
7. Na Kalou sa tiko ena kedra maliwa sa dau
vukei au; o koya oqo au na raica na ka au gadreva
vei ira sa cati au.
8. Sa vinaka na vakararavi vei Jiova, ka ca vei ira
na tamata.
9. Sa vinaka na vakararavi vei Jiova, ka ca, vei
ira na ravouvou.
10. E ra sa vakavolivoliti au na veimatanitu, ia,
ena Yaca i Jiova, au na vakarusai ira.
11. E ra sa vakavolivoliti au, io, era sa