NAI VOLA TABU - GospelGo

8. Sa Noqu o Kiliati;
Sa Noqu o Manasa;
O Efereimi nai sala ni Uluqu;
O Juta sa dau solia na Noqu lewa.
9. O Moapi sa dau savata na Noqu kuro;
Kei Itomi me raica na Noqu i vava;
Au na qaqa ena vuku i Filisitia.”
10. O cei ena kauti Au ki na koro kaukauwa?
O cei ena liutaki Au ki Itomi?
11. Sa sega beka ni Oi Kemuni ga, na Kalou?
Oi Kemuni ga, na Kalou, sa sega ni lako vata
kei ira na mataivalu?
12. Mo Ni solia vei keimami na veivuke, ni sa ka
wale na veivuke ni tamata.
13. Ena vuku ni Kalou, eda na gugumatua
Ni sai Koya ga sa butuki ira sobu na keda
meca.
Same109 Sa Masuti Me Ra Lewai Na
Dauveibeitaki Vakailasu
1. Mo Ni kakua ni galu tiko, na Kalou ni noqu
vakavinavinaka!
2. Era sa vosa tiko na tamata vakasisila,
Era sa vosa tiko na tamata dauveivakaisini.
Era sa vosa vakacacataki au tiko ena yame
lasulasu.
3. Era sa vakavolivoliti au tiko ena vosa ni
veicati, era sa veivala tiko kei au, ni sa sega na
vuna.
4. Mei sau ni noqu loloma, era sa beitaki au, io,
au sa soli au tikoga, ki na masu.
5. O koya oqo, era sa sauma vei au na ca mai na
vinaka, na veicati mai na veilomani.
6. Me lewai koya e dua na tamata ca,
Me dua na dauveibeitaki me tu ena yasana i
matau.
7. Ni sa lewai, me kilai ni sa cala, me sa valavala
ca tale na nona masu.
8. Me lekaleka na nona veisiga, ka me dua tale e
taura na nona i tutu.
9. Me ra luveniyali na luvena, ka me sa yada na
watina.
10. O ira na luvena, me ra sa gone vakaloloma ka
daukerekere; me ra sa dauvakasaqaqara ena
vanua sa sega kina.
11. Me sa vesuki kece na nona i yaya mai vei ira
na dauveivoli, kei ira sa lako tu, me ra tauca na
vua ni ka sa oca kina o koya.
12. Me kua ni dua e solia na loloma vei koya se
me dua e totaki ira na luvena era luveni yali.
13. Me ra musuki tani na nona kawa, mai na
veitabatamata kecega ka me bokoci tani talega na
yacadra.
14. Me nanuma tikoga o Jiova na nodra caka cala
kece na nodra qase, nai valavala ca talega nei
tinana me kua ni boko laivi.
15. Me ra sa tiko ga ena matai Jiova, ka me sa
tagutuva vakadua o Koya na kena vakanananu e
delai vuravura;
16. Baleta ni sa sega ni vinakata me vakaraitaka
520
SAME
na yalololoma, ia, sa vakasaurarataki ira ga na
dravudravua kei na vakaloloma, me yacova mada
ga na nodra vakamatei na yalomalumalumu.
17. Me vaka ni sa rekitaka o koya na ruru me lako
tale mai vei koya; ni sa sega ni rekitaka nai
veivakalouvinakataki, io, me sa ka e yawa sara
mai vua.
18. Ni sa vakaisulutaki koya ena ruru me vaka na
kote, io, me sa curuma na yagona me vaka na wai,
io, me vaka na waiwai ki na nona sui.
19. Me vakakina vei koya, me vaka na kote sa ubi
koya taucoko, me vakatalega na beleti sa vesuki
koya dina tiko ga.
20. Me sai koya oqo na Nona veisausaumi o Jiova
vei ira sa dau ruru vei au, kei ira sa dau vosavosa
ca vei au.
21. Ia, vei Kemuni na Kalou o Jiova, mo Ni
cakacaka vei au ena vuku ni Yacamuni; sa rui
vinaka na Nomuni yalololoma, mo Ni sereki au.
22. Au sa rui dravudravua ka vakaloloma, Sa
mavoa tiko na yaloqu e lomaqu.
23. Au sa yali me vaka e dua nai yaloyalo ni
tamata ni sa kala na siga: au sa cagina yani me
vaka na vodre.
24. Sa malumalumu na duruqu ena lolo, ka’u sa
lila mai.
25. Au sa vakalialiai mai vei ira sa raici au, era sa
kuretaka na uludra.
26. Mo Ni vukei au Jiova na Noqu Kalou!
Mo Ni vakabulai au me vaka na Nomuni
yalololoma,
27. Me ra kila, ni sa cakacaka tiko oqo na
ligamuni – ni sai Kemuni Jiova sa cakava oqo!
28. Me ra ruru o ira, ia oi Kemuni Mo ni
veivakalouvinakataki; ni ra sa tucake, me ra kune
madua, ia, me reki tiko ga na Nomuni tamata.
29. O ira sa beitaki au tiko, me ra vakaisulu ena
madua, me ra sa vakaisulutaki ira ena ka beci, me
vaka na salusalu.
30. Na gusuqu ena vakavinavinaka tiko ga
vakalevu vei Jiova, io, au na vakavinavinaka
tikoga vua ena kedra maliwa na lewevuqa.
31. E na tucake tu o Koya ena ligana i matau na
dravudravua. Me Vakabulai koya.
Same 110 Sa Vakarogoi Na Nona Veiliutaki
Na Mesaia
1. Sa tukuna o Jiova, vua na noqu Turaga, “Mai
dabe ena Ligaqu i matau, me yacova ni ra sa i
butubutu ni Yavamu na kemu meca.”
2. E na vakatala o Jiova nai titoko ni Nomuni
kaukauwa mai Saioni. Vakatulewa ena kedra
maliwa na kemu meca!
3. O ira na Nomuni tamata era sa soli ira mai ena
siga ni Nomuni veiliutaki; ena totoka ni Nomuni
savasava, mai na kete sa vakasucuma e dua na
mataka.
4. Sa yalataka o Jiova, ena sega ni
vakadredretaka, “O ni sa bete levu, me sega ni
mudu, me vaka nai lesilesi i Melekisateki.”
5. O Jiova sa tiko e Ligamuni i matau;