NAI VOLA TABU - GospelGo

Same 102 Na Loloma Sega Ni Mudu I Jiova
1. Mo Ni rogoca na noqu masu Jiova, na noqu
tagi me lako yani vei Kemuni.
2. Mo Ni kua ni vunitaki Kemuni mai vei au ena
siga ni noqu rarawa; mo Ni vakarorogo mai ena
siga au kaci yani kina, mo Ni rogoci au mai
vakatotolo.
3. Na noqu veisiga sa vesuki oti me vaka na
kubou, Na noqu sui kece sa kama oti me vaka na
matadravu,
4. Sa valuti oti na yaloqu ka sa vaka na co sa
malai mai, au sa guilecava kina me’u kania na
kequ madrai.
5. Sa rui rogo levu na noqu vutugu, sa lili tiko na
suiqu ena kuliqu.
6. Au sa vaka na belo ena vanua lala, sa vaka
talega na lulu ena vanua mamaca.
7. Au sa davo ka yadra tiko, sa vaka na kakabace
ena dela ni vale.
8. Era sa torovi au mai na meca ena siga taucoko,
o ira na dauveibutakoci, era sa yalayala mera caka
ca vei au.
9. Au sa kania tiko na dravusa me vaka na
madrai. Sa veiwaki na mequ gunu vata kei na wai
ni mata,
10. Baleta na Nomuni rarawataka na ca kei na
Nomuni cudru katakata, o Ni sa laveti au ka
viritaki au tani.
11. Na noqu veisiga sa vaka na yaloyalo sa
vakabalavutaki ka sa malai tani me vaka na co.
12. Oi Kemuni Jiova sa tudei ka sega ni mudu, kei
na nanumi ni yacamuni ki nai taba tamata kecega.
13. Mo Ni tucake ka yalololoma vei Saioni; ni sa
kena gauna me tokoni ka totaki,
Io, sa kena gauna sara ga oqo.
14. O ira na Nomuni tamata era sa marautaka na
kena veivatu, ka ra sa tokona na kena kuvu ni
soso.
15. Me ra rerevaka kina na Yaca i Jiova na
veimatanitu, kei ira kece na tui ni veivanua mera
rerevaka na Nomuni Ukuuku.
16. O Jiova ena tarai Saioni cake tale. O Saioni ena
basika ena i Ukuuku i Jiova.
17. Ena rogoca o Koya na nodra masu na
dravudravua, ena sega ni vakawaletaka na nodra
masu.
18. Oqo ena volai tu me baleti ira nai taba tamata
ena muri mai, me ra vakacerecerea kina na Kalou,
o ira nai taba tamata era na qai basika mai.
19. Ni sa rai sobu mai o Koya mai na dela ni nona
Vale Tabu, mai Lomalagi sa vakaraici vuravura
sobu mai na Kalou,
20. Me rogoca na domodra na kaivesu sa vutugu
tiko, me ra sereki o ira sa lesi oti tu me ra
vakamatei,
21. Me kacivaki yani na Yaca i Jiova e Saioni kei
na nona vakacaucautaki e Jerusalemi,
22. Ni ra sa vakasoqoni mai o ira na tamata kei ira
na veimatanitu me ra qaravi Jiova.
23. Sa vakamalumalumutaka o Koya na noqu
515
SAME
kaukauwa ena sala, sa vakalekalekataka na noqu
veisiga.
24. Au sa tukuna kina, “Na Noqu Kalou, me’u
kakua ni kautani mai na loma ni noqu veisiga. Na
Nomuni veiyabaki sa yacova nai taba tamata
kecega.
25. Mai liu sara o Ni sa biuta na yavu kei
vuravura, kei na lomalagi sa cakacaka ga ni
Ligamuni.
26. Era na rusa kece, Ia oi Kemuni o Ni na tudei
ga, na ka kece era na qase mai me vaka nai sulu,
o Ni na veisautaki ira, era na qai veisau.
27. O Ni sai Koya koya tikoga, na Nomuni
veiyabaki ena sega ni oti.
28. Na luvedra na Nomuni tamata era na
vakakuria kei ira na nodra kawa ena vakadeitaki e
Matamuni.”
Same 103 Me Vakacaucautaki Na Yalololoma
I Jiova
1. Vakacaucautaki Jiova, na yaloqu, kei na ka
kecega sa tu e lomamu, mo vakacaucautaka na
Yacana Tabu!
2. Vakacaucautaki Jiova, na yaloqu, kakua ni
guilecava na ka vivinaka kecega sa cakava vei iko
o Koya:
3. Sa vosota na nomu caka cala kecega,
Sa vakabulai iko mai na kemu mate kecega,
4. Sa vakabulai iko mai na veivakarusai,
Sa vakaisalataki iko ena yalovinaka kei na
Nona yalololoma kecega,
5. Sa vakamamautaka na gusumu ena ka vinaka
kecega, o koya oqo sa vakavoutaki tale kina na
nomu tubu cake me vaka na ikeli.
6. Sa cakava na ka dodonu o Jiova kei na lewa
dodonu vei ira sa vakabobulataki.
7. Sa vakatakila vei Mosese na Nona sala, kei na
Nonai valavala vei ira na luvei Isireli.
8. O Jiova sa rui yalololoma ka yalovinaka ka sa
cudru vakamalua, sa levu na Nona yalololoma.
9. Ena sega ni veivala tiko vata kei keda, se
cudruvi keda tiko me sega ni mudu.
10. Sa sega ni cakacaka vei keda me vaka na noda
i valavala ca, se vunauci keda me vaka na noda
caka cala.
11. Me vaka sa rui cecere o lomalagi mai ki
vuravura, sa vaka kina na Nona yalololoma vei ira
sa rerevaki Koya;
12. Me vaka mai nai cabecabe ki nai dromudromu
sa vaka kina, na Nona vakayawataka na noda caka
cala mai vei keda.
13. Me vaka sa lomana na luvena e dua na tama,
sa lomani ira vakakina o ira sa rerevaki Koya.
14. Sa kila vinaka o Koya na keda i bulibuli Sa kila
o koya ni da sa kuvu ni soso ga.
15. Io, na tamata, na nona siga sa vaka ga na
veisiga ni co; sa vaka ga na vei senikau ni vanua,
era seraka tu.
16. Sa liwa ga yani na cagi, sa yali tale,
Sa guilecavi tale na vanua e toka kina.
17. Ia, na yalololoma i Jiova sa ka mai na sega ni