NAI VOLA TABU - GospelGo

mudu, kei na Nona i tikotiko vakaturaga me vaka
na veisiga vakalomalagi.
30. “Kevaka era sa besetaka na luvena na Noqu i
vunau ka ra sa sega ni muria na noqu lewa,
31. Kevaka era sa voroka na Noqu i lesilesi ka
sega ni maroroya na Noqu i vunau,
32. Io, Au na totogitaka na nodra talaidredre ena
kuita, kei na nodra caka cala e nai wau.
33. Sa dina sara na Noqu yalovinaka, Au na sega
sara ni kauta tani mai vua, se vakatara na Noqu
yalodina me yali vua.
34. Au na sega ni voroka na Noqu veiyalayalati se
veisautaka na vosa sa lako oti mai na Gusuqu.
35. Na ka Au sa yalayala oti kina ena Noqu
savasava e tabu sara; Au na sega ni lasu vei Tevita.
36. Na nona kawa ena tudei ka sega ni mudu, Na
nona i tikotiko vakaturaga, ena vaka na
matanisiga e Mataqu;
37. E na vakataudeitaki me sega ni mudu me vaka
na vula, ia me vaka nai vakadinadina daudina ni
lomalagi.” Sela
38. Ia, o ni sa biuti au ka sega ni taleitaki au, o Ni
sa cudruva na Nomuni lumuti.
39. O Ni sa cata na veiyalayalati kei koya na
Nomuni tamata; o Ni sa vakawaletaka na nona i
sala vaka Tui, ena Nomuni viritaka ki na qele.
40. O Ni sa basuka kece na nona bai kei na nona
bai vakaivalu kaukauwa o Ni sa vakacacana kece.
41. O ira kece sa lako sivia, e ra sa butakoci koya,
e sa ka ni veiwali o koya vei ira na kai nona.
42. O Ni sa laveta cake na ligadra i matau na kena
meca; o Ni sa vakamarautaki ira na meca.
43. O Ni sa vukica lesu na nona i seleiwau ka sega
ni vukei koya e nai valu.
44. O Ni sa vakaotia na nona lagilagi, na nona i
sala vakatui, o Ni sa viritaka ki na qele.
45. O Ni sa vakalekalekataka na nona yabaki
vakacauravou; o Ni sa ubi koya ena madua.
Sela.
46. Me cava soti na kena dede, Jiova? Mo Ni
vunitaki Kemuni tiko me sega ni mudu? Me kama
tiko li, vakabukawaqa na Nomuni cudru?
47. O Ni sa kila, sa lekaleka na noqu bula, sa ka
wale beka na nodra bula na luve ni tamata?
48. Na tamata cava e rawa ni bula me sega ni
raica na mate? E rawa beka vua me drotaka na
kaukauwa ni bulubulu? Sela.
49. I Jiova, sa E vei na Nomuni yalovinaka sa dau
tu e liu? O koya o Ni yalataka vei Tevita ena
Nomuni yalodina?
50. Mo Ni nanuma Jiova, na nodra sa beitaki
vakaca na Nomuni tamata ― ena noqu vosota na
kena mosi na nodra veivakacacani o ira na tamata
kece oqo,
51. O koya era sa veibeitaki vakaca tiko kina na
kemuni meca, i Jiova, ka ra sa vakacacana na
kalawa ni nomuni lumuti e duabau ga.
52. Me vakacaucautaki na Turaga o Jiova me sega
ni mudu! Emeni. Emeni.
511
Nai Ka Va Ni Wasewase Ni Same 90 – 106
SAME
Same 90 Na Sega Ni Mudu Ni Kalou Kei Na
Malumalumu Ni Tamata
1. I Jiova, o Ni sa neimami tikotiko ena i
tabatamata kecega.
2. Ni se bera ni toso mai na veiulunivanua
Ni se bera ni buli na vuravura
Mai na Sega ni mudu ki na sega ni mudu,
O Ni sa bula, o Ni sa Kalou.
3. O Ni sa vakarusa na tamata, ka tukuna, “Lesu
mai oi kemudou na luve ni tamata.”
4. Na dua na udolu na yabaki e Matamuni, sa
vaka ga ena noa ni sa oti yani, sa vaka ga na yadra
ena dua na tiki ni bogi.
5. O Ni sa kauti ira yani me vaka e dua na
ualuvu; era sa vaka ga e dua sa moce, ena mataka
era sa vaka na co sa tubu cake:
6. Ena mataka sa bulabula ka tubu cake; ena
yakavi sa lauta ka malai.
7. Sa kani keimami na Nomuni yalo katakata
Ena Nomuni cudru katakata keimami sa rere
vakalevu.
8. Na neimami caka cala sa tu e Matamuni. Na
neimami valavala ca se vuni tu sa tu ena rarama ni
Matamuni.
9. Na neimami veisiga kece sa lako yani ena
Nomuni cudru; Keimami sa vakayalia na neimami
veiyabaki me vaka ga e dua na tadra.
10. Na veisiga ni neimami bula, sa vitusagavulu
ga na yabaki; Sa ka ga ni kaukauwa kevaka sa
walusagavulu na yabaki, io, na nodra
dokadokataka sa basika ga kina na oca kei na
rarawa; vakasauri sa oti yani, eda sa yali yani.
11. O cei sa kila na kaukauwa ni Nomuni cudru?
Me vaka na rere vei Kemuni Sa vaka kina na
Nomuni cudru.
12. Mo Ni vakavulici veikeimami ena wilika na
neimami veisiga, me tubu kina na neimami
yalomatua.
13. Mo Ni lesu mai Jiova! E sa cava soti na kena
dede? Mo Ni lomani ira mai na Nomuni tamata.
14. Io, mo Ni vakacegui keimami vakatotolo ena
Nomuni yalololoma, me keimami reki kina ka
marau ena veisiga kece!
15. Mo Ni vakamarautaki keimami me vaka na
levu ni siga keimami vakararawataki tiko kina, me
vaka na veiyabaki keimami raica tiko kina na ca.
16. Me basika mai na Nomuni cakacaka vei ira na
Nomuni tamata, kei na Nomuni lagilagi vei ira na
luvedra.
17. Na totoka kei nai taucoko ni Kalou me sa tu
vei keda, me vakataucokotaka na cakacaka ni
ligada vei keda; Io, me vakataucokotaki na
cakacaka ni ligada.
Same 91 Na Maroroi Ni Tiko Vata Ena Mata
Ni Kalou
1. O koya sa tiko ena yasana vuni nei Koya sa
Cecere sara, ena vakarurugi tikoga ena yaloyalo i
Koya sa Kaukauwa.