NAI VOLA TABU - GospelGo

Sai kemuni ga na noqui vukevuke kei na noqu dau
ni veisereki; I Jiova mo ni vakatotolo.
Same: 71 Na Kalou Na Vatu Dei Ni
Veivakabulai.
1. Vei Kemuni Jiova, au sa vakararavi kina; Me’u
kakua ni vakamaduataki.
2. Mo Ni vakabulai au ena Nomuni yalododonu,
Me’u dro rawa; Mo Ni vakarorogo tiko ga mai vei
au ka vakabulai au.
3. Mo Ni sa noqui tikotiko kaukauwa, me rawa
ni’u ravi tikoga kina ena vei gauna; o Ni sa solia
nai vakaro ni noqu vakabulai; Ni sai Kemuni na
noqu Vatudei ka kaukauwa.
4. Mo Ni sereki au na Kalou, mai na ligadra na
tamata ca, mai na ligadra na tamata sega ni
vakabulai kei ira na tamata i valavala kaukauwa.
5. Sai Kemuni ga na noqui nuinui, Jiova na
Kalou; sai Kemuni nai vakadei ni noqu bula ni’u
sa cauravou.
6. Ni’u se qai sucu, sa tiko vei au na Nomuni
veitokoni; sai Kemuni ga, sa kauti au tani mai na
ketei tinaqu, Na noqu veivakacecerei me sa tiko
ga vei Kemuni.
7. Au sa vaka ga na ka wale vei ira e so, Io, oi
Kemuni sa noqui drodro kaukauwa.
8. Me sa sinai tikoga na gusuqu ena Nomuni
vakacerecerei kei na Nomuni vakaiukuukutaki
ena siga taucoko.
9. Me’u kakua ni’u biu tani ni’u sa qase mai,
me’u kakua ni guilecavi ni sa malumalumu mai na
noqui cegu.
10. Era sa vosacataki au na kequ meca; kei ira na
vuni tiko me vesuki au, era sa bosebose vata tiko,
11. E ra sa tukuna tiko “Na Kalou sa biuti koya;
ciciva ka kauti koya, ni sa sega e dua me vukei
koya.”
12. Na Kalou, mo Ni kakua ni yawa mai vei au;
Na Noqu Kalou, mo Ni totolo mai ka vukei au!
13. Me ra sa vakataqayataki, ka vakayali, o ira na
meca, ni noqu bula, me ra sa ubi ena veibeitaki kei
na madua o ira sa vinakata na noqu
vakamavoataki.
14. Io, au na vakanuinui tikoga vei Kemuni ka mo
ni vakacerecerei tikotikoga.
15. Na gusuqu ena tukuna tikoga na Nomuni
yalododonu, kei na Nomuni veivakabulai ena
veisiga kece, ni’u sa sega ni kila na kenai yalayala.
16. Au na lako ena kaukauwa i Jiova na Kalou; au
na cavuta tikoga na Nomuni yalododonu, io na
Nomuni yalododonu.
17. Na Kalou, o Ni sa vakavoliti au mai na gauna
ni cauravou; ka yacova na siga oqo, au se tukuna
tikoga na Nomuni cakacaka vinaka.
18. Oqo au sa qase mai ka sikoa na uluqu, Na
Kalou, mo Ni kua ni biuti au, me yacova ni’u sa
tukuna na Nomuni kaukauwa ki na i matai ni taba
tamata, na Nomuni kaukauwa ki vei ira kecega
era na lako tiko mai.
19. Na Nomuni yalododonu talega, na Kalou, sa
502
SAME
rui cecere, o Ni sa cakava na vei ka lelevu; Na
Kalou, o cei sa tauyavutaka kei kemuni?
20. O Ni sa vakaraitaka vei au na leqa lelevu ka
bibi, o Ni na vakabulabulataki au tale, ka kauti au
cake tale mai na boto ni sauloa kei vuravura.
21. O Ni na vakatubura na noqu dokai, ka
vakacegui au ena veiyasana kecega.
22. Ena wa ni vaka tagi, au na vakacecerei
kemuni― kei na Nomuni daudina, na noqu Kalou!
Vei kemuni au na sere ena Api, ia na lewe duabau
ni Isireli.
23. Na tebenigusuqu ena reki vakalevu, ni’u sa
sere vei kemuni, kei na yaloqu o Ni sa vakabula
lesu mai.
24. Na yamequ ena tukuna tikoga na Nomuni
yalododonu ena siga taucoko; Ni ra sa
veivakamaduataki ka veivakarogorogocataki o ira
sa qara na noqu ca.
Same 72 Na Cecere Kei Sega Ni Yalani Ni
Nona Veiliutaki Na Mesaia
1. Na Kalou, Mo ni solia vua na Tui na Nomuni
lewa, na Nomuni yalododonu vua na luveni tui.
2. E na lewai ira na Nomuni tamata ena
yalododonu, kei ira na Nomuni dravudravua e na
lewa dodonu.
3. Na veiulunivanua ena kauta mai na sautu vei
ira na tamata kei na vei delana na dodonu.
4. E na kauta mai na lewa dodonu mai vei ira na
dravudravua; ena vakabulai ira na luvedra na
vakaloloma, ena vakamavoataka vaka ca sara na
dauveivakaisini.
5. Era na rerevaki Kemuni, ena gauna kecega e
tiko kina na siga kei na vula, ena i taba tamata
kecega.
6. Ena lako sobu mai o Koya me vaka na uca ena
co sa wereci oti, me vaka na uca tau vakamalua sa
vakasuasuataka na qele.
7. Ena Nona veisiga, o ira na yalododonu era na
sereki, ena levu talega na sautu, me yacova ni sa
sega na vula.
8. Ena lewa mai na wasawasa e dua ki na
wasawasa ka dua, mai na uciwai ki nai yalayala
kei vuravura.
9. O ira sa lako ena Nona lewa, era na cuva vua,
o ira na meca, era na kania na kuvu ni soso.
10. O ira na tui mai Tasisi, kei na veiyanuyanu era
na tiko, o ira na tui mai Seba kei Siba, era na solia
nai loloma.
11. Io, o ira na tui kecega era na cuva e Matana; na
veivanua era na qaravi Koya.
12. Ena veivakataucokotaki vei ira na vakaloloma
sa dau tagi, na dravudravua, kei ira talega sa sega
vei ira na veivukei.
13. Ena vakavotaki ira na dravudravua kei ira na
vakaloloma; ena vakabula na yalodra sa
vakalolomataki.
14. Ena vakabula na yalodra mai na
vakararawataki kei nai valavala kaukauwa; ena ka
taleitaki na nodra dra e matana.