NAI VOLA TABU - GospelGo

12. Kei na droini ni veika kecega e tukuna vua na
Yalo, na rara vakabai ni vale i Jiova, na veivale
kecega e vakavolivolita, na veivale ni yau kecega
ni vale ni Kalou, kei na veivale kecega ni yau
vakatabui;
13. Ena vuku ni nodra i wasewase kece talega na
bete kei na Livai, ena vuku ni cakacaka ni
veiqaravi ni vale i Jiova, kei nai yaya ni veiqaravi
kecega ena vale i Jiova.
14. E solia o koya na koula sa vakarautaki na kena
bibi me baleta nai yaya koula, ena vuku ni yaya
taucoko e vakayagataki ki na veimataqali
veiqaravi kecega; na kena bibi talega na siliva me
baleta nai yaya siliva kecega, ena vuku ni yaya
taucoko e yaga ki na veiqaravi kecega;
15. Na bibi ni tutu ni cina koula, kei na kena kena
cina koula, na kena bibi nai tutu ni cina yadua kei
na kena veicina; e na vuku ni tutu ni cina siliva sa
vakarautaki na kena bibi, na bibi ni tutu ni cina kei
na kena cina, me vaka na kena vakayagataki na
veitutu ni cina yadua.
16. Sa solia talega o koya na koula sa vakarautaki
na kena bibi me baleta na teveli ni madrai
dauraici, ena vuku ni teveli yadua; kei na siliva me
baleta na teveli siliva;
17. Na koula dina talega me baleta nai cula, na
beseni, na bilo e koula dina kei na sedre koula —
sa solia o koya nai vakarau koula me baleta na
sedre yadua; kei na sedre siliva, me baleta na
sedre siliva yadua;
18. Kei na koula sa vakatovolei oti sa
vakarautaki na kena bibi me baleta nai cabocabo
ni ka boi vinaka, kei na kena caka na qiqi, o ya, na
jerubimi koula e rau tevuka na tabadrau me
vakaruguta na kato ni veiyalayalati i Jiova.
19. “Na veika kecega oqo, “sa tukuna o Tevita, “O
Jiova sa vakatakila vei au e nai vola, ni sa tabaki
au ena Ligana, na cakacaka ni droini kecega oqo.”
20. Ka sa tukuna o Tevita vei Solomoni na luvena,
“Mo kaukauwa ka mo yalo doudou, ka cakava;
kakua ni o rere se taqaya: O Jiova na Kalou —
noqu Kalou — ena tiko vata kei iko. O Koya ena
sega ni biuti iko se lako tani mai vei iko, me
yacova sara ni o sa vakaotia na cakacaka kecega ni
veiqaravi ena vale i Jiova.
21. “Oqo na nodra i wasewase yadua na bete kei
na Livai ena vuku ni veiqaravi kecega ena vale ni
Kalou; ia o ira kecega na matai yalodina era na tu
vata kei iko ena vuku ni cakacaka vakamatai
kecega, ena vuku ni veiqaravi kecega; o ira talega
nai liuliu kei ira na tamata taucoko era na
vakarorogo vakatabakidua ki na nomui vakaro.”
Na I Solisoli Me Tara Kina Na Vale Ni Soro
29. Sa tukuna talega o Tevita na tui kivei ira
nai soqosoqo taucoko: “Na luvequ o Solomoni, o
koya taudua ga sa digitaki koya na Kalou, e se
gone ga ka lecaika; ia na cakacaka oqo sa rui ka
vakaitamera, baleta na vale oqo e sega ni nona na
tamata ia sa nei Jiova ga na Kalou.
387
1 VEIGAUNA
2. “Ia oqo na vale ni noqu Kalou au a
vakarautaka e na noqui gu taucoko: na koula me
baleta nai yaya e caka ena koula, siliva me baleta
nai yaya siliva, varasa me baleta nai yaya varasa,
kaukamea me baleta nai yaya kaukamea, kau me
baleta nai yaya kau, na vatu onikisa, na vatu me
vonoti, vatu tatalivaliva ena kena duiroka, na
veimataqali vatu talei, kei na vatu mavolo e ka
levu sara.
3. “O koya oqo, ni’u a gadreva dina e yaloqu na
vale ni noqu Kalou, au sa solia kina ki na vale ni
noqu Kalou e levu ka sivia na ka au vakarautaka
me tara kina na vale tabu, na noqu koula kei na
siliva vakamareqeti:
4. “E tolu na udolu na taledi na koula, [dua na
drau ka mani tinikarua na tani] na koula mai
Ofira, kei na vitu na udolu na taledi na siliva sa
vakatovolei [rua na darau onosagavulu na tani],
me botani kina na lalaga ni veivale;
5. “Na koula me baleta nai yaya koula kei na
siliva cakava na ligadra na matai. Ia o cei mada
ena yalo me baleta nai yaya siliva, kei na cakacaka
kecega e rawarawa me vakacabori koya ena siga
oqo vei Jiova?”
6. Era sa qai yalo rawarawa mera vakacabori ira
nai liuliu ni vei vuvale i tamadra, liuliu ni vei
yavusa e Isireli, kavetani ni lewe udolu kei na
veiyadrau, vata kei ira sa lewa na nona cakacaka
na tui.
7. Era sa solia ki na cakacaka ni vale ni Kalou e
lima na udolu na taledi [dua na drau
walusagavulu ka vitu na tani] kei na tini na udolu
na darika na koula, e tini na udolu na taledi [tolu
na drau vitusagavulu ka lima na tani] na siliva, e
tinikawalu na udolu na taledi [ono na drau
vitusagavulu ka lima na tani] na varasa, kei na
dua na drau na udolu na taledi [tolu na udolu vitu
na drau limasagavulu na tani] na kaukamea.
8. Ia o koya ga sa tu vua na vatu talei sa solia ki
na vale ni yau ni vale i Jiova, ki na ligai Jeieli na
luve i Keresoni.
9. Era sa qai reki na tamata, ni ra soli ena yalo
vinaka, ena yalo e dina era sa solia kina e na yalo
rawarawa vei Jiova; ia o Tevita na tui sa reki
vakalevu talega.
Sa Vakacaucautaka Na Kalou O Tevita
10. O koya oqo sa ia o Tevita na vakavinavinaka
vei Jiova ena matadra nai soqosoqo taucoko; ka sa
tukuna o Tevita:
“O ni sa kalouvinaka, i Jiova na Kalou i Isireli, na
tamai keimami, me sega ni mudu.
11. Sa Nomuni, i Jiova, na cecere,
Na Kaukauwa kei na Lagilagi,
Na qaqa kei na ka vaka-Turaga;
Ni sa Nomuni na ka kecega mai Lomalagi kei
Vuravura;
Sa Nomuni na Matanitu, i Jiova,
Ka o Ni sa laveti cake me ulu ni veika kecega.
12. E rau sa lako mai vei Kemuni nai yau kei na
vakarokoroko,