Sangguniang Manwal ng Guro para sa Lumang Tipan

Ang Aklat ng Exodo
Ipabasa sa mga estudyante ang Exodo 4:27–31 upang matuklasan
kung paano tumugon ang mga anak ni Israel kay Moises
nang siya ay magbalik. Itanong sa mga estudyante:
• Ano ang mga tungkulin o responsibilidad na maaaring katakutan
ng isang tao o kaya’y atubili niyang tanggapin?
(Halimbawa, asaynment na magsalita, mga proyektong
pang-serbisyo, o pagmimisyon.)
• Paano tayo pinalalakas at tinutulungan ng Panginoon na
madaig ang mga damdaming ito? (tingnan sa 1 Nephi 3:7;
D at T 60:2–4).
Basahin ang Doktrina at mga Tipan 6:14, 20–24 o Moroni
10:3–5 at talakayin ang mga pagpapalang natanggap ng iba
mula sa Panginoon. Magpatotoo na susuportahan at palalakasin
tayo ng Panginoon kapag kailangan natin ito at, tulad ng
pinatotohanan ni Pangulong Thomas S. Monson, “Siya na tinawag
ng Diyos, ay pinagigindapat ng Diyos” (sa Conference
Report, Abr. 1987, 54; o Ensign, Mayo 1987, 44).
Pambungad
Exodo 5–10
Habang inihahanda si Moises sa kanyang misyon, nalaman
niya na wala nang hihigit pa sa kapangyarihan ng Diyos (tingnan
sa Moises 1:10, 13–15, 20–22, 33). Ang kaalamang ito ay nakatulong
upang magkaroon siya ng pananampalatayang gawin
ang lahat ng ipinagagawa sa kanya ng Panginoon. Kinailangan
ng mga anak ni Israel na magkaroon ng gayunding pananampalataya
upang makapagtiwala sa Diyos na ligtas na aakay sa
kanila palabas ng Egipto tungo sa lupang pangako. Sa pamamagitan
ng napakalaking pagpapamalas ng kanyang kapangyarihan,
binigyan ng Panginoon ng pagkakataon ang mga Israelita
na magkaroon ng gayong pananampalataya. Nang lisanin
nila ang Egipto, nagkaroon sila ng maraming pagkakataon
upang malaman na ang kanilang Diyos ang tunay at buhay na
Diyos at siya ay may kapangyarihan sa lahat ng bagay.
Nang ipanumbalik ang Simbahan nitong mga huling araw sinabi
ng Panginoon na “ang mahihinang bagay ng sanlibutan
ay magsisilabas at bubuwagin ang mga makapangyarihan at
ang malalakas [ipinapakitang] ang tao ay hindi dapat magpayo
sa kanyang kapwa tao, ni magtiwala sa bisig ng laman”
(D at T 1:19). Ito ang huwaran ng Panginoon sa simula pa lamang.
Noong panahon ni Moises, ang Egipto ang pinakamalakas
na bansa sa mundo sa aspetong tulad ng yaman, edukasyon,
teknolohiya, matematika, at astronomiya. Sa kabaligtaran,
ang mga Israelita ay mga alipin noon na nagtatrabaho nang
mabigat. Nang harapin niya ang faraon, gumugol na ng apatnapung
taon si Moises sa disyerto bilang pastol. Wala siyang
mga alagad, mataas na katayuan, o kapangyarihan. Ngunit
78
nasa panig niya ang Panginoon at ang lubos na pagtitiwala sa
kapangyarihan ng Diyos sa lahat ng bagay. Ang mga Egipcio
ay maraming diyus-diyusan at itinuring pang diyos si faraon,
ngunit ipinakita ng Panginoon na walang kapangyarihang
magligtas ang mga diyus-diyusan at tanging ang mga nagtitiwala
sa kanya ang malakas at makapangyarihan.
Ilang Mahahalagang Alituntunin ng Ebanghelyo na
Hahanapin
• Maaari tayong iligtas ng Panginoon mula sa ating mga
pagsubok at pagdurusa o bibigyan tayo ng lakas upang
matiis ang mga ito (tingnan sa Exodo 6:6–7; tingnan din sa
Mosias 24:13–14).
• Ang Diyos ay may kapangyarihan sa lahat ng bagay (tingnan
sa Exodo 7:3–5, 10–12, 20; 8:5, 16, 24; 9:6, 10, 23; 10:13,
22; tingnan din sa Exodo 11:4–7; 12:22–30).
• May mga huwad na himala na hindi sa Diyos (tingnan sa
Exodo 7:10–12, 22; 8:7, 18).
• Ang mga himala ay dumarating bilang bunga ng pananampalataya;
hindi ito ang lumilikha ng pananampalataya
(tingnan sa Exodo 8:19, 31–32; 9:7, 11, 34–35; 10:19–20; tingnan
din sa Exodo 4:31; 11:10; D at T 63:7–12).
Mga Mungkahi sa Pagtuturo
Exodo 5. Bakit dumaranas tayo kung minsan ng maraming
oposisyon kapag sinisikap nating gawin ang tama?
(30–35 minuto)
Itanong sa mga estudyante kung naranasan na ba nila ang tila
masasamang bungang dulot ng paggawa ng tama. Anyayahan
ang isa o dalawa na maikling ibahagi ang kanilang karanasan
sa klase. Ipabasa sa mga estudyante ang Exodo 5 at ipaulat
kung ano ang sinikap gawin nina Moises at Aaron at ano ang
nangyari dahil dito. Ipalahad sa kanila sa sarili nilang mga salita
kung ano ang sinabi ng mga tao kay Moises at ano ang sinabi
ni Moises sa Panginoon (tingnan sa mga talata 21–23).
Itanong sa mga estudyante kung bakit sa palagay nila maaaring
pinahintulutan ng Panginoon ang Faraon na pahirapan
si Moises sa pagsasakatuparan ng kanyang misyon. Ipaunawa
sa kanila ang sumusunod na dalawang dahilan:
• Ginamit ni Faraon ang kanyang kalayaan sa pagpili. Patuloy
siyang nagrebelde hanggang sa ang mga bunga ng kanyang
mga desisyon ang kumumbinsi sa kanyang sundin ang salita
ng Panginoon, tulad ng ipinropesiya sa Exodo 3:19–20.
• Ipinakita ng Panginoon sa mga anak ni Israel na tanging sa
kapangyarihan niya sila naligtas mula sa Egipto (tingnan
sa Exodo 6:6–8). Kung nagawa ang exodo mula sa Egipto
sa pamamagitan ng simpleng kasunduan sa pagitan ni
Moises at ni Faraon, marahil kaunti lang ang magiging
pang-unawa ng mga Israelita sa kapangyarihan at karunungan
ng Diyos. Nang lisanin sa wakas ng Israel ang Egipto,
walang duda kung sa anong kapangyarihan sila naligtas,