Sangguniang Manwal ng Guro para sa Lumang Tipan

Ang Aklat ng Exodo
Exodo 3:1–10. Ang pagpipitagan ay nag-aanyaya ng paghahayag.
(15–20 minuto)
Hilingin sa mga estudyante na tumahimik nang husto at pakinggan
ang mga tunog na karaniwan ay hindi nila mapapansin.
Makalipas ang isang minuto itanong sa kanila kung ano
ang narinig nilang mga tunog. Ituro na noon pa man ay naroon
na ang mga tunog na iyon, ngunit kinailangan ng espesyal
na atensyon upang marinig ang mga ito. Ihambing ang karanasan
ng matamang pakikinig sa mga pangkaraniwang tunog
sa kahalagahan ng pakikinig sa mga bulong ng Espiritu. Tulad
ng kailangan tayong tumahimik para marinig ang ilang
pangkaraniwang mga tunog, kailangan tayong magpitagan
para madama ang komunikasyon ng Espiritu Santo.
Sa pagsasalita tungkol sa kahalagahan ng pagpipitagan sa
ating mga pulong sa Simbahan, sinabi ni Elder Boyd K. Packer:
“Ang pagpipitagan ay nag-aanyaya ng paghahayag.
“Ang pagpipitagang binabanggit natin ay hindi nangangahulugan
ng lubusang katahimikan” (sa Conference
Report, Okt. 1991, 28; o Ensign, Nob. 1991, 22).
Isulat sa pisara ang salitang pagpipitagan at ipalista sa mga estudyante
ang mga elemento ng pagpipitagan na nag-aanyaya
sa diwa ng paghahayag (tulad ng malilinis na kaisipan, kababaang-loob,
pag-iwas sa mga panggagambala, sagradong musika,
at pagbubulay ng banal na kasulatan). Itanong sa mga
estudyante kung paano tayo tinutulungan ng pagpipitagan
na tumanggap ng inspirasyon mula sa ating Ama sa Langit.
Si Moises ay nagpakita ng malaking pagpipitagan sa Panginoon
nang siya ay umakyat sa bundok. Ipabasa sa mga estudyante
ang Exodo 3:1 at 19:18 at tukuyin ang dalawang pangalan ng
bundok na ito ng Panginoon. Ipabuklat sa kanila ang bahaging
“Mga Mapa at Talatuntunan ng mga Pangalan ng Lugar” sa
Gabay sa mga Banal na Kasulatan at ipahanap ang kinaroroonan
ng Bundok ng Sinai (“Sinai, Bundok ng [Horeb]”).
Basahin ang Exodo 3:2–6. Sabihin sa mga estudyante na pinalitan
ni Propetang Joseph Smith ang salitang anghel sa talata 2
kung kaya’t mababasa itong: “At ang presensya ng Panginoon
ay nagpakita sa kanya.” Ipaunawa sa kanila na kailangang
magpitagan sa Panginoon sa pamamagitan ng pagtatanong
kung ano ang ipinagawa kay Moises nang papalapit na siya
sa nagliliyab na palumpong. Ipaisip sa kanila ang isang sandali
sa kanilang buhay na nadama nila na tila nakatuntong
sila sa banal na lupa. Anyayahan ang ilan na sabihin kung
saan sila naroon noon at ano ang nadama nila.
Magturo ng pagpipitagan sa Panginoon kapag nasa klase ng
seminary sa pamamagitan ng pagbabahagi ng sumusunod na
payo mula kay Elder Packer:
76
“Kapag nagtitipon tayo para pag-aralan ang mga doktrina
ng ebanghelyo, ito ay dapat gawin sa diwa ng
pagpipitagan” (sa Conference Report, Okt. 1991, 27; or
Ensign, Nob. 1991, 21).
Ipagunita sa mga estudyante ang mga aktibidad ng klase na
nakatulong sa kanilang madama na napakalapit nila sa kanilang
Ama sa Langit. Purihin sila sa mga pagsisikap nila noon
na anyayahan ang Espiritu sa klase sa pamamagitan ng kanilang
pagpipitagan. Magpatotoo na kailangang gawin palagi
ang bagay na lubos na nag-aanyaya sa diwa ng pagpipitagan
habang pinag-aaralan nila ang ebanghelyo.
Exodo 3:7–10. Ang buhay ng mga matwid ay madalas magpaalala
sa atin ng buhay ng Tagapagligtas. (10–15 minuto)
Nang tawagin si Moises na maging propeta sinabi sa kanya
ng Panginoon, “Ikaw ay kawangis ng aking Bugtong na
Anak; at ang aking Bugtong na Anak ay at ang magiging Tagapagligtas,
sapagkat siya ay puspos ng biyaya at katotohanan”
(Moises 1:6). Basahin ang Deuteronomio 18:15 at ipaliwanag
na ang Propetang ipinropesiya ni Moises ay si
Jesucristo. Ang pagkakatulad ng buhay ni Moises at ng buhay
ni Jesucristo ay kapukaw-pukaw at kapupulutan ng aral. Isiping
maghanda ng handout ng tsart sa bandang huli ng
mungkahing ito sa pagtuturo. Iwanang blangko ang hanay na
“Mga Pagkakatulad” at papunan ito sa inyong mga estudyante
habang pinag-aaralan ninyo ang mga reperensya ng banal
na kasulatan.
Ang mungkahing ito sa pagtuturo ay maaaring gamitin sa
iba’t ibang paraan:
• Gamitin ito rito bilang buod ng buhay ni Moises.
• Gamitin ito sa Exodo 17 bilang pagrerepaso ng mga himalang
ginawa ni Moises.
• Hatiin ang inyong klase sa maliliit na grupo at iatas sa kanila
ang mga bahagi ng tsart. Ipabasa sa kanila ang mga reperensya
ng banal na kasulatan ukol kay Moises at sa Tagapagligtas
at ipalarawan ang nakita nilang mga pagkakatulad.
• Magdispley ng malaking tsart sa silid. Basahin ang unang
dalawa o tatlong set ng mga reperensya ng banal na kasulatan
at tulungan ang mga estudyante na tuklasin ang mga
pagkakatulad. Hikayatin silang tuklasin ang iba pang mga
pagkakatulad sa sarili nilang pag-aaral. Padagdagan ang
tsart sa kanila, na ibinabahagi sa iba pang mga estudyante
ang mga banal na kasulatan at mga pagkakatulad kapag
nakita nila ang mga ito sa pag-aaral nila ng mga aklat ng
Exodo hanggang Deuteronomio.
Mahalagang maunawaan ng mga estudyante na ang lahat ng
bagay, pati na ang buhay at mga turo ng mga propeta, ay nagpapatotoo
kay Jesucristo (tingnan sa Jacob 7:10–11; Moises 6:63).