Sangguniang Manwal ng Guro para sa Lumang Tipan

Ang mga Aklat ng Genesis, Moises, at Abraham
Ibahagi ang sumusunod na pahayag ni Elder Neal A. Maxwell,
miyembro ng Korum ng Labindalawa, nang magsalita
siya tungkol sa pagkakataong makabalik sa piling ng Panginoon:
“Huwag gumawa ng anumang ikasisira ng sandaling
iyon. Huwag hayaang malihis kayo mula sa matuwid
at makipot na landas, kundi sikaping makarating sa
pagtatagpong iyon na espirituwal kayong mapupuspos
ng galak at makikilala ang haplos ng mga bisig na iyon,
sapagkat ang Kanyang mga bisig ng awa at pagmamahal
ay nakaunat sa inyo. Pinatototohanan ko sa inyo na
ang pagtatagpong iyon ay totoo. Para sa ilan sa inyo,
darating ito kaagad at sa iba ay paglaon pa, ngunit darating
ito, kung kayo ay tapat. Iyan ay pinatototohanan
ko!” (“The Education of Our Desires,” [debosyonal sa Salt
Lake Institute of Religion, 5 Ene. 1983], 11).
Pambungad
Genesis 34–41
Sa Genesis 34–41 ang tuon ay nalipat mula kay Jacob, o Israel,
papunta sa kanyang mga inapo. Nabasa natin ang tungkol sa
kabutihan ni Jose at ang dinanas niya dahil sa kasamaan ng
iba. Nabasa rin natin kung paano ginawang malalaking pagpapala
ng Panginoon ang mga pagsubok ni Jose na nakatulong
upang mailigtas niya ang kanyang buong pamilya mula
sa pagkagutom, at sa gayon ay naipreserba ang pinagtipanang
inapo ni Abraham.
Ang kuwento tungkol kay Jose ay nagtuturo ng maraming magagandang
aral. Sabi ni Elder Hartman Rector Jr., dating miyembro
ng Pitumpu, “Ang kuwento tungkol kay Jose, ang
anak ni Jacob na tinawag na Israel, ay malinaw na representasyon
ng dakilang katotohanan na ‘lahat ng mga bagay ay nagkakalakip
na gumagawa sa ikabubuti ng mga [yaon]’ na nagmamahal
sa Diyos. (Tingnan sa Rom. 8:28.) Parang laging tama
ang ginagawa ni Jose; magkagayunman, ang mas mahalaga, ginawa
niya ito para sa tamang dahilan. At talagang napakahalaga
nito! Si Jose ay ipinagbili ng sarili niyang mga kapatid bilang
alipin at binili ni Potiphar, na kapitan ng bantay ni Faraon.
Ngunit kahit bilang isang aliping obligadong magsilbi nang
ilang panahon, ang bunga ng bawat karanasan at lahat ng sitwasyon,
gaano man kahirap, ay ginawang mabuti ni Jose” (sa
Conference Report, Okt. 1972, 170; o Ensign, Ene. 1973, 130).
Habang pinag-aaralan ninyo ang kuwento tungkol kay Jose,
pansinin kung paano naging isang “uri” o pahayag ng buhay
60
ng Tagapagligtas ang kanyang buhay. Ang ideyang ito ay tatalakayin
nang detalyado sa scripture block ng Genesis 42–50.
Ilang Mahahalagang Alituntunin ng
Ebanghelyo na Hahanapin
• Ang paghahangad na makaganti ay kasalanan (tingnan sa
Genesis 34:1–31; tingnan din sa Genesis 49:5–7; Levitico
19:18).
• Ibinibigay ng Panginoon ang mga pagpapala ni Abraham
sa mga tapat na gumagawa at tumutupad ng mga sagradong
tipan (tingnan sa Genesis 35:2–4, 6–7, 9–15; tingnan
din sa D at T 84:33–34; Abraham 2:11).
• Ang pagseselos at inggit ay pagpapamalas ng kapalaluan.
Ito ang dahilan kaya lumalayo ang Espiritu at maaaring
humantong sa mas mabibigat na kasalanan (tingnan sa Genesis
37:1–28; tingnan din sa Mga Kawikaan 6:34–35; 2 Nephi
26:32).
• Sa buhay na ito kung minsan ay dumaranas ng matinding
hirap ang mabubuti, ngunit kung sila ay tapat makakapiling
nila ang Panginoon at magiging dakilang mga pagpapala
ang kanilang mga pagsubok (tingnan sa Genesis
37:1–28; 39:1–23; 41:1–45; tingnan din sa Alma 36:3; D at T
98:3; 122:9).
• Ang paglabag sa batas ng kalinisang-puri ay kasalanan sa
Diyos (tingnan sa Genesis 39:7–9; tingnan din sa Alma 39:5;
Jacob 2:28).
• Kapag iginagalang at sinusunod natin ang Diyos at ginagawa
siyang pinakamahalagang impluwensya sa ating buhay,
tumatanggap tayo ng lakas para mapaglabanan ang tukso
at masunod ang lahat ng kautusan (tingnan sa Genesis
39:9; tingnan din sa Mateo 22:35–40; Moroni 10:32).
• Madalas tayong balaan ng Panginoon tungkol sa mga
mangyayari sa hinaharap sa pamamagitan ng kanyang
mga propeta. Sinusunod ng taong matalino ang kanilang
payo (tingnan sa Genesis 41:28–57; tingnan din sa Amos
3:7; Mateo 25:1–13).
Mga Mungkahi sa Pagtuturo
Ang Video ng Lumang Tipan pagtatanghal 11, “ ‘Sapagka’t
Sinugo Ako ng Dios,’” ay inihahambing ang buhay
ni Jose sa isang tapestriya at ang tagahabi sa Ama sa Langit
(tingnan sa Gabay sa Video ng Lumang Tipan para sa mga
mungkahi sa pagtuturo).
Genesis 35:1–5. Dapat nating ihanda ang ating sarili
sa espirituwal at pisikal para makapasok sa templo.
(10–15 minuto)
Magpakita sa mga estudyante ng dalawang larawang katulad
ng nasa pahina 61 (tingnan din sa p. 262).