Sangguniang Manwal ng Guro para sa Lumang Tipan

Ang mga Aklat ng Genesis, Moises, at Abraham
Talakayin sa mga estudyante ang materyal sa bahaging
“Points to Ponder” sa kabanata 5 ng Old Testament: Genesis–
2 Samuel (mga pahina 70–72). Ipaunawa sa kanila kung paano
umaangkop sa kanila ang bawat pagpapala.
Ipaunawa sa mga estudyante na hindi nila kaagad-agad matatanggap
ang ipinangakong mga pagpapala ng tipan dahil sa
liping kanilang pinagmulan (tingnan sa 2 Nephi 30:1–2). Ipabasa
sa kanila ang Genesis 17:1 at ipatukoy kung ano ang sinabi
ng Panginoon na kailangang gawin ni Abraham upang
matanggap ang lahat ng pagpapala ng tipan. Maaari ninyong
ituro kung ano pa ang ginawa ni Abraham para ihanda ang
sarili sa pagtanggap ng mga tipan at kung paano niya tinupad
ang kanyang mga tipan bago naganap ang mga pangyayari
sa Genesis 17.
Tulungan ang mga estudyante na maipamuhay ang natutuhan
nila sa pamamagitan ng pagbasa sa kanila ng sumusunod
na mga pahayag na maaaring matagpuan sa isang patriarchal
blessing:
“Pinagpala kang mapunta sa buhay na ito bilang miyembro ng
sambahayan ni Israel at sa gayon ay matanggap ang lahat ng
pagpapalang ipinangako kay Abraham. Dahil diyan, ikaw ay
binigyan ng mga responsibilidad at may karapatan sa lahat ng
pagpapala at pangakong ibinigay sa pamilyang ito sa Israel.”
Pasulatin sila ng liham sa isang taong maaaring nakatanggap na
ng gayong pagpapala, na ipinaliliwanag ang kahalagahan ng
pahayag na ito. Ipapaliwanag sa kanila sa liham kung ano ang
kahulugan ng maging tagapagmana ng propetang si Abraham
at ang mga responsibilidad ng manang ito, lalo na ang kaugnayan
nito sa ideya ng pamilya. Ipabahagi sa ilang estudyante ang
kanilang isinulat.
Pambungad
Genesis 18–23
Noong 1833 sinabi ng Panginoon na dahil sa kanilang mga
paglabag, ang mga Banal sa mga Huling Araw ay “kinakailangang
parusahan at subukan, maging gaya ni Abraham”
(D at T 101:4). Muling isinalaysay sa Genesis 18–23 ang ilan sa
matitinding pagsubok na dinanas ni Abraham at inilarawan
doon ang kanyang katapatan. Kabaligtaran ng kay Abraham
ang sinapit ng Sodoma at Gomorra. Habang pinag-aaralan
ninyo ang mga kabanatang ito, isipin si Abraham. Paano niya
natiis ang kanyang mga pagsubok? Anong mga pagpapala
ang dumating dahil tapat niyang sinunod ang Panginoon? Sa
anong mga paraan natin masusundan ang kanyang halimbawa
sa paghahangad natin sa mga pagpapala ring iyon?
Iningatan ni Abraham ang mga pangako sa kanya ng Diyos
(na kalaunan ay tinawag na tipang Abraham) at tinawag siyang
“ama ng matatapat” (D at T 138:41). Tumulong siyang
50
gawing posible para sa atin na matanggap ang mga pagpapala
ng ebanghelyo (tingnan sa D at T 84:33–34; 124:58). Ang
mga mamamayan ng Sodoma at Gomorra, sa kabilang banda,
ay nilipol ng Diyos dahil sa kanilang kasamaan.
Ilang Mahahalagang Alituntunin ng
Ebanghelyo na Hahanapin
• Ang mga pangako ng Diyos ay matutupad, sa pamamagitan
man niya o sa pamamagitan ng kanyang mga lingkod
(tingnan sa Genesis 18:2, 9–15; 21:1–2; tingnan din sa Genesis
17:15–19; D at T 1:38).
• Ang Panginoon ay nagbibigay ng espesyal na mga pagpapala
sa mga taong tapat na tinitiis ang mga pagsubok (tingnan
sa Genesis 18:1–19; 20:1–3, 14–18; 22:1–19; tingnan din
sa D at T 58:4).
• Itinuturo ng Genesis ang sumusunod tungkol sa ating kaugnayan
sa Panginoon:
a. Magagawa ng Panginoon ang tila imposible sa atin. Dahil
dito, kailangan tayong sumampalataya at magtiwala
sa kanya (tingnan sa Genesis 18:9–14; 21:1–8; tingnan din
sa Mga Taga Roma 4:16–22; 1 Nephi 4:1).
b. Maaaring pansamantalang mailigtas ng mabubuting tao
sa isang komunidad o bansa ang iba pang mga tao mula
sa buong epekto ng kahatulan ng Diyos sa masasama
(tingnan sa Genesis 18:23–32; tingnan din sa Alma
10:22–23; 62:40; Helaman 13:13–14).
c. Ang pagpapasiyang patuloy na makianib sa masasama
ay maaaring makapinsala kapwa sa pisikal at sa espirituwal
(tingnan sa Genesis 19).
d. Sinusubukan tayong lahat ng Panginoon, at dapat nating
sundin ang kanyang iniuutos, gaano man ito kahirap.
Kung susunod tayo, lahat ay magiging para sa ating
ikabubuti, sa buhay mang ito o sa kabilang buhay (tingnan
sa Genesis 21:9–21; 22:1–19; tingnan din sa Mga
Taga Roma 8:28; D at T 90:24).
• Kung talagang mahal natin ang Panginoon nang buong
puso, kusang-loob nating gagawin ang lahat ng hinihiling
niya (tingnan sa Genesis 22:1–12; tingnan din sa Juan 14:15;
Omni 1:26).
Mga Mungkahi sa Pagtuturo
Genesis 18:1–15. Ang Panginoon ay nagbibigay ng maluwalhating
mga pangako sa kanyang matatapat na alagad.
May kapangyarihan siyang tuparin ang kanyang mga pangako
at gagawin niya ito “sa kanyang sariling panahon,
at sa kanyang sariling pamamaraan, at alinsunod sa kanyang
sariling kalooban” (D at T 88:68). (20–25 minuto)
Bigyan ng isang papel ang bawat estudyante na sinulatan ng
sumusunod:
Sabi ng inyong guro, “Nangangako ako sa iyo na
___________________________.”