Sangguniang Manwal ng Guro para sa Lumang Tipan

ANG AKLAT NI JOEL
Pambungad
Joel 1–3
Malamang ay nabuhay ang propetang si Joel sa pagitan ng
850 at 740 b.c., ngunit hindi tiyak ang mga petsang ito (tingnan
sa “Ang mga Hari at Propeta ng Israel at Juda,” p. 257).
Ang alam natin ay ipinadala si Joel sa katimugang kaharian
ng Juda na may mensahe para sa kanila na magsisi o malipol
(tingnan sa Gabay sa mga Banal na Kasulatan, “Joel,” p. 96). Inilarawan
din ni Joel ang mga tagpo mula sa ating panahon, at
angkop din sa atin ang mensaheng hatid niya sa sinaunang
mga Judio (tingnan sa pambungad sa Joel sa Old Testament:
1 Kings–Malachi, p. 83).
Sa pag-aaral ninyo ng aklat ni Joel, hanapin ang mga turong
makakatulong sa paghahanda ninyo para sa mga dakilang
kaganapan sa mga huling araw.
Ilang Mahahalagang Alituntunin ng
Ebanghelyo na Hahanapin
• Ang kahindik-hindik na mga digmaan, kapanglawan, at
kalamidad ay lilipol sa mga yaong hinog na sa kasamaan
bago ang at pagsapit ng Ikalawang Pagparito ni Jesucristo
(tingnan sa Joel 1; 2:1–11, 28–32; 3:1–16).
• Dapat tayong bumaling sa Panginoon para mapaghandaan
ang kanyang Ikalawang Pagparito (tingnan sa Joel 1:13–15,
19; 2:12–18, 32; tingnan din sa D at T 133:10–19).
• Darating sa mabubuti ang malalaking pagpapalang espirituwal
at pisikal pagsapit at pagkatapos ng mga pagkalipol
na kaakibat ng Ikalawang Pagparito (tingnan sa Joel
2:28–32; 3:15–21).
235
Mga Mungkahi sa Pagtuturo
Ang Video ng Lumang Tipan pagtatanghal 21, “Ang Ikalawang
Pagparito,” ay gumagamit ng dalawang analohiyang
nagpapakita ng kahalagahan ng paghahanda para sa
Ikalawang Pagparito ni Cristo (tingnan sa Gabay sa Video ng
Lumang Tipan para sa mga mungkahi sa pagtuturo).
Joel 1–3. Nakita ni Joel ang mga araw bago ang Ikalawang
Pagparito ni Jesucristo at nagpayo siya kung paano
maghanda para dito. (20–25 minuto)
Sabihin sa mga estudyante na nang magpakita si Moroni kay
Propetang Joseph Smith, binanggit niya ang Joel 2:28–32 at sinabing
“hindi pa ito natutupad, ngunit malapit na” (Joseph
Smith—Kasaysayan 1:41). Ipabasa sa kanila ang Joel 2:28–32 at
itanong sa kanila kung ano ang pakiramdam nila tungkol sa
Ikalawang Pagparito ni Jesucristo at sa mga mangyayari bago
ito dumating. Basahin ang Joel 2:11. Ipahiwatig sa mga estudyante
na ang salitang dakila ay malamang na tumutukoy sa
matinding kaluwalhatian ng Ikalawang Pagparito, ngunit ang
kaganapang ito ay maaaring kapwa masaya at kakila-kilabot.
Ipasaliksik sa mga estudyante ang Joel 2–3 at ipatukoy kung
ano ang makabuluhan o makakatulong sa paghahanda para
sa mga dakilang kaganapan sa mga huling araw (halimbawa,
tingnan sa Joel 2:12–13; 3:16–21). Basahin ang Doktrina at mga
Tipan 38:30 sa inyong mga estudyante at talakayin ang kaibhang
magagawa ng pagiging handa sa Ikalawang Pagparito.
Kung may oras pa, maaari ninyong isipin na ihambing ang
Joel 2–3 sa Doktrina at mga Tipan 43:17–30 at 45:39–59.
Para maipaunawa sa mga estudyante na kailangang ipamuhay
kaagad ang mga turo ni Joel, isaalang-alang ang sumusunod
na mga tanong:
• Anong bahagi ng huling labanang iyon ng mabuti at masama
ang pinaglalabanan na ngayon? (tingnan sa D at T
76:25–30).
• Paano naging katulad ng Armagedon ang labanang iyon?
• Sino ang mga bayani ng labanang ito?
• Sino ang mga nasawi?
• Dapat ba tayong sumalakay o magtanggol sa labanang ito?
(tingnan sa Mga Taga Efeso 6:10–18).
• Paano tayo natutulungan ng payo ni Joel na makapaghanda
para sa labanang ito?