Sangguniang Manwal ng Guro para sa Lumang Tipan

Ang Aklat ni Jeremias
• Jeremias 31:31–34. Ang ibig sabihin ng kilalanin ang Panginoon
ay unawain at sundin ang kanyang mga batas
at ordenansa at mapasaatin ang Espiritu Santo. Itinuro
ni Propetang Joseph Smith:
“Saliksikin ang mga paghahayag na inilalathala namin,
at hilingin sa inyong Ama sa Langit, sa pangalan ng
Kanyang Anak na si Jesucristo, na ipakita ang katotohanan
sa inyo, at kung gagawin ninyo ito nang nakatuon
ang mata sa Kanyang kaluwalhatian nang walang
pag-aalinlangan, sasagutin Niya kayo sa pamamagitan
ng kapangyarihan ng Kanyang Banal na Espiritu. Sa
gayon ay malalaman ninyo ito para sa inyong sarili at
hindi para sa iba. Sa gayon ay hindi kayo aasa sa tao
para sa kaalaman tungkol sa Diyos; ni walang magiging
puwang para sa haka-haka. Wala; sapagkat kapag
tumanggap ang mga tao ng tagubilin mula sa Kanya
na lumikha sa kanila, alam nila kung paano Niya sila
ililigtas” (Teachings of the Prophet Joseph Smith, 11–12).
Kahit maaari nating makilala ang Diyos ngayon, mukhang
sa Milenyo ganap na matutupad ang mga talatang
ito, kapag kapiling na natin ang Panginoon (tingnan sa
D at T 84:96–100). Sinabi ni Pangulong Joseph Fielding
Smith, patungkol sa Jeremias 31:31–34:
“Para matupad ang propesiyang ito, maraming miyembro
ng Simbahan ang kailangang magsisi at mas
magsumigasig sa pag-aaral ng mga banal na kasulatan
at sa kanilang pagdarasal at pagsunod sa mga batas at
kautusan ng ebanghelyo. Kung bigo silang gawin ang
mga bagay na ito ihihiwalay sila sa kinaroroonan ng
Panginoon sa dakilang araw na iyon na bababa siya bilang
Panginoon ng mga panginoon at Hari ng mga
hari upang angkinin ang kanyang lugar at umupo sa
kanyang luklukan para mamuno at maghari” (sa
Conference Report, Okt. 1963, 21–22).
Pambungad
Jeremias 34–52
Ang Jeremias 34–52 ay pagpapatuloy ng mga propesiya ni
Jeremias laban sa Juda at sa mga lider nito, na naging dahilan
upang siya ay usigin at ibilanggo (tingnan sa Jeremias
34–38). Natupad ang mga propesiyang ito nang bumagsak
ang Jerusalem sa kamay ng mga taga-Babilonia. Maraming
Judio ang dinalang bihag sa Babilonia, samantalang may
214
ilang nakatakas patungong Egipto at isinama nila si Jeremias
(tingnan sa mga kabanata 39–45).
Tulad ng ibang mga propetang Israelita, nagpropesiya si Jeremias
tungkol sa mga bansang gentil sa paligid ng Israel. Nagsimula
siya sa isang propesiya laban sa Egipto sa kanluran
(tingnan sa Jeremias 46), pagkatapos ay nagpasilangan, na
nagpopropesiya laban sa mga bayang mas malapit sa Israel
(tingnan sa Jeremias 47–49), at nagtapos sa mga propesiya laban
sa Babilonia sa silangan (tingnan sa Jeremias 50–51). Ang
Egipto at Babilonia ang dalawang pinakamapangyarihang
bansa na nagtunggalian sa pagkontrol sa Jerusalem noong panahon
ng kanyang ministeryo.
Nagtapos ang aklat ni Jeremias sa mga detalye ng pagkabihag
at pagkawasak ng Jerusalem (tingnan sa Jeremias 52). Para sa
iba pang impormasyon, tingnan sa Gabay sa mga Banal na Kasulatan,
“Jeremias” (p. 89).
Ilang Mahahalagang Alituntunin ng
Ebanghelyo na Hahanapin
• Inihahanda at pinagpapala ng mga paghahayag ng Panginoon
sa kanyang mga propeta yaong mga nakikinig
(tingnan sa Jeremias 42–44).
• Tinatanggap ng Panginoon ang nagsisisi ngunit pinarurusahan
ang mapaghimagsik, anumang angkan o lahi ang kanilang
pinagmulan (tingnan sa Jeremias 46:1–2, 27–28; 47:1;
48:1–2, 47; 49:1–8, 23–39; 50:1–3, 17–19, 33–34; 51:5).
Mga Mungkahi sa Pagtuturo
Jeremias 34–52. Inihahayag ng Panginoon ang hinaharap
sa kanyang mga propeta upang ihanda at pagpalain yaong
mga makikinig. (40–60 minuto)
Itanong sa mga estudyante kung may narinig na silang mga
taong humihingi ng payo sa mga manghuhula, psychic, astrologer,
at kung sinu-sino pa tungkol sa kanilang hinaharap.
Itanong:
• Ano ang ipinahayag ng Panginoon tungkol sa gayong mga
gawain? (tingnan sa Deuteronomio 18:10–14).
• Anong mga tulong ang naibigay na sa atin ng Panginoon
na pinakamainam kaysa mga maling gawaing iyon? (Panalangin,
mga banal na kasulatan, mga patriarchal blessing,
at lalo na ang mga propeta.)
Sabihin sa mga estudyante na ibinadya sa ilan sa mga propesiya
ni Jeremias ang mga bagay na matagal pang mangyayari
kaya nakamatayan na ng maraming tao ang katuparan ng
mga ito. Gayunman, marami sa kanyang mga propesiya ang
natupad noong nabubuhay pa siya. Dahil ibinigay ang mga
propesiya ayon sa kaalaman ng Diyos sa mula’t mula pa, makatitiyak
tayo na lahat ng ito ay matutupad.
Ipabasa sa mga estudyante ang Jeremias 34:1–3; 37:1–10; at
38:17–23 at ipalista kung ano ang sinabi ni Jeremias na
mangyayari sa Jerusalem at sa mga lider nito. Sabihin sa