Sangguniang Manwal ng Guro para sa Lumang Tipan

ANG MGA KAWIKAAN
Pambungad
Mga Kawikaan 1–31
Ang aklat ng Mga Kawikaan ay isang koleksyon ng maiikli
at siksik na mga pahayag na nagsasaad ng mga katotohanan
tungkol sa ugali ng tao. Ito ang pangatlo sa mga aklat na patula
sa Lumang Tipan. Ang mga aklat na Job, Mga Awit, Mga
Kawikaan, at Eclesiastes ay tinatawag kung minsan na literatura
ng karunungan. Kakaunti ang nilalaman nito na patungkol
sa banal na paghahayag at mas marami ang nauukol sa
karunungan ng tao kaysa sa Batas, Kasaysayan, o mga Propeta
(tingnan sa “Paano Isinaayos ang Lumang Tipan?” p. 9;
Gabay sa mga Banal na Kasulatan, “Kawikaan,” p. 125; pambungad
sa Proverbs sa Old Testament: 1 Kings–Malachi, p. 13).
Ang Mga Kawikaan karaniwan ay simple at tuwiran. Ang
mga halimbawa ng mga makabagong kawikaan ay “Kung
may isinuksok, may madudukot,” “Huwag bilangin ang mga
sisiw hangga’t hindi napipisa ang mga itlog,” at “Kung may
tiyaga, may nilaga.” Ang ilang kawikaan ay mas kumplikado
at malalim. Ang salitang kawikaan ay nagmumula sa salitang
Hebreong mashal at ang ibig sabihin nito ay “katawanin” o
“maging katulad ng.”
May ilang kawikaang matatagpuan sa ibang mga aklat ng banal
na kasulatan (tingnan sa I Samuel 24:13; Job 28:28; Ezekiel
18:2). Gumamit din ng mga kawikaan ang Tagapagligtas sa
kanyang pagtuturo (tingnan sa Lucas 4:23; Juan 16:25). Ang
mga kawikaang matatagpuan sa Lumang Tipan ay maaaring
pagmulan ng inspirasyon, payo, at tagubilin sa mga yaong
nagbabasa at nagbubulay-bulay ng mga mensahe ng karunungan
dito. Sa pag-aaral ninyo ng Mga Kawikaan, pagbulayan
kung paano maiaangkop ang mga turo nito sa buhay natin
ngayon. Kung papalitan ng makabago ang mga sinaunang
paghahambing, matutuklasan natin na ang karunungan dito
kadalasan ay angkop pa rin ngayon katulad noon.
Ilang Mahahalagang Alituntunin ng
Ebanghelyo na Hahanapin
• Dapat ay masigasig tayong maghangad ng karunungan mula
sa Diyos para mabigyan ng direksyon ang ating buhay (tingnan
sa Mga Kawikaan 1:1–7; 2:1–12; 3:13–20; 4:7–8; 16:16).
• Gagabayan ng Panginoon ang buhay ng mga yaong nagtitiwala
sa kanya (tingnan sa Mga Kawikaan 1:24–33; 3:5–7).
• Nasisiyahan ang Panginoon sa mga yaong nagpipitagan sa
kanya nang may kabanalan, karunungan, at kasigasigan
(tingnan sa Mga Kawikaan 31:10–31).
187
Mga Mungkahi sa Pagtuturo
Ang Video ng Lumang Tipan pagtatanghal 19, “Magtiwala
sa Panginoon,” ay gumagamit ng tatlong analohiya
para ipakita ang kahalagahan ng pagtitiwala sa Panginoon
(tingnan sa Gabay sa Video ng Lumang Tipan para sa mga
mungkahi sa pagtuturo).
Mga Kawikaan 1–31. Ang karunungang matatagpuan sa
aklat ng Mga Kawikaan ay makakatulong sa ating mga
pagpapasiya, pagsagot sa mga tanong, at pag-unawa sa
mahahalagang katotohanan. (25–30 minuto)
Ipaisip sa mga estudyante ang malalaking krisis, desisyon, o
problemang kinailangan nilang harapin. Pagkatapos ay itanong:
• Mas gusto ba ninyong haraping mag-isa ang gayong klaseng
mga problema o makakatulong ang humingi ng payo
o patnubay sa iba?
• Sino ang pinagtitiwalaan ninyo ng ilan sa pinakamabibigat
ninyong problema? Bakit?
• Sinisikap ba ninyong sundin ang kanilang payo o binabalewala
lang ninyo ito?
Ipaunawa sa mga estudyante na ang aklat ng Mga Kawikaan ay
koleksyon ng matatalinong kasabihan, na ang marami ay binigyang-inspirasyon
ng Panginoon, na makakatulong sa maraming
problema natin. Basahin ang Mga Kawikaan 1:1; 10:1; 25:1; 30:1;
at 31:1 at hanapin kung sino ang sumulat ng karamihan sa aklat
ng Mga Kawikaan. Basahin ang I Mga Hari 4:29–34 at alamin
kung ilang kawikaan ang isinulat ni Solomon.
Ibahagi sa inyong mga estudyante ang impormasyong nasa
pambungad at talakayin kung paano naging mahalaga ang
pag-aaral ng aklat ng Mga Kawikaan. Ipabasa sa kanila ang
Mga Kawikaan 1:1–7; 2:1–12; 3:13–20; 4:7–8; at 16:16. Itanong:
• Ano ang sinasabi sa mga talatang ito tungkol sa kahagalahan
ng karunungan?
• Bakit mahalagang gumamit ng karunungan sa araw-araw
nating mga pagpapasiya?
• Bakit laging magiging matalinong payo ang mga tagubilin
ng Panginoon tungkol sa ating mga problema?
Ang aklat ng Mga Kawikaan ay naglalaman ng maraming karunungan.
Papiliin ang bawat estudyante ninyo (o maaari kayong
mag-atas) ng ibang kabanatang babasahin sa Mga Kawikaan
at papiliin siya ng isang kawikaang may makakatulong
na ideya o doktrinang maibabahagi sa klase. Ipabasa nang malakas
sa kanila ang kawikaan at ipalahad kung paano sa palagay
nila nauugnay ito sa atin at ang mga pagpapalang maaaring
dumating kung susundin natin ang kawikaang iyon.
Mga Kawikaan 1–31. Lahat ay may kaunting karunungang
sapat ang kahalagahan para ibahagi sa ibang tao.
(25–30 minuto)