Sangguniang Manwal ng Guro para sa Lumang Tipan

Ituro kung ilang taon ang pagitan nina Ciro at Isaias. Ipabasa
sa mga estudyante ang Ezra 1:1–4 at ipatuklas kung naniwala
si Ciro sa propesiya. Basahin ang natitirang bahagi ng kabanata
at ipatukoy sa mga estudyante kung anong klaseng tao
si Ciro. Ipasaliksik sa kanila ang Ezra 2:1, 64–70 at ipahanap
kung ilang Judio ang nakauwi.
Basahin ang sumusunod na mga banal na kasulatan at ipatukoy
sa mga estudyante ang tao o mga taong ipinahihiwatig sa
propesiya:
• 2 Nephi 3:6–15 (si Propetang Joseph Smith)
• 2 Nephi 27:12 (ang tatlong saksi sa Aklat ni Mormon)
• Isaias 29:11 (sina Martin Harris at Charles Anthon)
Itanong sa mga estudyante kung paano nakapagpaibayo ng
pananampalataya ng mga taong iyon ang pagbasa sa mga
propesiyang iyon. Ipabasa sa kanila ang Joel 2:28; Mormon
8:34–41; Moroni 10:24–27; at Moises 1:7–8 at ipatukoy kung
ano ang nakita ng mga sinaunang propetang iyon.
Basahin ang Mga Taga Efeso 1:4–5 at talakayin kung paano
inorden noon pa man ang bawat isa sa atin na tanggapin ang
ebanghelyo at kung paano nagpatotoo ang mga propeta na patuloy
na lalaganap ang gawain sa mga huling araw sa pamamagitan
natin (tingnan sa D at T 121:25–29). Itanong sa mga estudyante
kung paano sila tatapang na piliin ang tama sa pagkaalam
na nakita ng mga sinaunang propeta ang ating panahon.
Magtapos sa pagkanta o pagbasa ng mga salita ng isang himnong
nagtuturo na ang mga kabataan ay marangal at may kakayahang
magtagumpay, tulad ng “Tapat sa Pananampalataya”
(Mga Himno, blg. 156), “Adhikain Ninyo’y Ituloy” (Mga Himno,
blg. 157), o “Bilang mga Kabataang Sion” (Mga Himno, blg. 158).
Ezra 3:3–13; 6:16–22. Tuwing titipunin ng Panginoon ang
kanyang mga tao inuutusan niya silang magtayo ng mga
templo. (20–30 minuto)
Magdispley ng mapa ng mundo at ipatukoy sa buong klase
ang kinaroroonan ng lahat ng templo ng Simbahan hanggang
kaya ninyo. Talakayin kung ano kaya ang pakiramdam ng
mga miyembro ng Simbahan kapag may templong malapit sa
kanila. Talakayin kung paano maaapektuhan ng pahayag ni
Pangulong Gordon B. Hinckley tungkol sa pagtatayo ng mas
maliliit na templo ang buhay ng mga miyembro ng Simbahan
sa iba’t ibang panig ng mundo (tingnan sa Conference Report,
Okt. 1997, mga pahina 68–69).
Basahin ang Ezra 1:1–3 at itanong sa mga estudyante kung
ano kaya ang pakiramdam ng mga Judio nang tulutan silang
makabalik sa Jerusalem at muling itayo ang kanilang templo,
matapos mawalan ng templo nang halos pitumpung taon.
Ipabasa sa kanila ang Ezra 1:4–11 at 2:64–3:7 at ipahanap ang
katibayan na maraming taong sabik tumulong na maitayo
ang templo. Basahin ang Ezra 3:11–13 at talakayin kung ano
ang nadama ng mga tao nang mailatag na ang pundasyon ng
templo. Basahin ang Ezra 6:16–22 at talakayin kung ano ang
nadama nila nang ilaan ang templo.
173
Itinayo ang mga templo ayon sa takdang panahon ng Panginoon.
Repasuhin ang Ezra 1:1–2; 4:23–24; at 6:1–15 sa klase
at pansinin ang impluwensya ng mga lider sa pulitika kung
maaari o hindi maaaring itayo ang templo. Itanong: Kapag
handa na ang Panginoon maiimpluwensyahan ba niya ang
mga lider sa pulitika na tumulong na isakatuparan ang kanyang
mga layunin?
Ituro sa mga estudyante na ang pagtatayo ng mga templo ay
naiimpluwensyahan din ng kabutihan ng mga miyembro ng
Simbahan. Para mailarawan ito, paghambingin ang Doktrina
at mga Tipan 57:3; 58:57; 88:119; at 95:1–14. Pansinin ang mga
petsa kung kailan ibinigay ang mga utos na iyon at ihambing
ang mga ito sa petsa ng paglalaan sa Kirtland Temple (tingnan
sa D at T 109). Itanong: Paano kaya nakakaimpluwensya
sa pagtatayo ng mga templo sa hinaharap ang espirituwal nating
paghahanda ngayon?
Basahin ang Ezra 5:1–2 at itanong sa mga estudyante kung
sino ang may pinakamalaking impluwensya sa pagsisimula
ng pagtatayo ng templo at ano ang itinuturo ng mga talatang
iyon tungkol sa pagsunod sa mga propeta (tingnan din sa
Hagai 1:1–8; 2:12–18; Zacarias 1:12–17). Basahin ang sumusunod
na pahayag ni Pangulong Gordon B. Hinckley:
“Nag-aalab ang hangarin kong magkaroon ng templo
na madaling mararating ng mga Banal sa mga Huling
Araw sa iba’t ibang panig ng mundo” (sa Conference
Report, Set.–Okt. 1995, 77; o Ensign, Nob. 1995, 52).
Ezra 1–10
Itanong sa mga estudyante kung ano ang magagawa natin
para matulungan si Pangulong Hinckley na isakatuparan ang
kanyang hangarin.
Ezra 7. Kumikilos ang Panginoon sa pamamagitan ng
mga yaong ang puso ay handang tumanggap ng kanyang
payo. (10 minuto)
Ipagawa sa mga estudyante ang aktibidad A para sa Ezra 7 sa
kanilang gabay ng estudyante sa pag-aaral.
Ezra 9–10. Ang matuto sa mga karanasan ng iba ay makakatulong
sa atin na sundin ang Panginoon. (15–20 minuto)
Magdala ng bagong pahayagang lokal sa klase at pahapyaw
itong basahin sa inyong mga estudyante. Kapag ginawa ninyo
ito, talakayin kung bakit nagkakasala ang mga tao kahit
nakikita nila na madalas ay nakalulunos ang mga bunga nito.
Mabilis na repasuhin ang kasaysayan ng pagkabihag ng Juda
sa Babilonia (tingnan sa II Mga Hari 24–25). Basahin ang
II Mga Hari 21:13–16 at itanong sa mga estudyante kung bakit
sa palagay nila tinulutan ng Panginoon na masakop ang mga
ito. Ipabasa sa mga estudyante ang Ezra 9:1–2 at ipatukoy
kung anong mga kasalanan ang ginawa ng mga ipinatapon
na nagsibalik sa Jerusalem. Itanong: Paano naging katulad ng
mga kasalanan ng kanilang mga ninuno ang mga kasalanang