Sangguniang Manwal ng Guro para sa Lumang Tipan

ANG UNANG AKLAT NG MGA HARI
Sa teksto ng Hebreo, ang I at II Mga Hari ay isang aklat na tinatawag
na Mga Hari. Ang paghahati ng aklat na ito sa dalawang
aklat ay unang ginawa sa Septuagint (ang pagsasalin ng
Lumang Tipan sa Griyego) at sinundan sa pinakahuling mga
bersyon ng Biblia. Ang dalawang aklat na ito ay karugtong ng I
at II Samuel (makikita sa mga subtitle na ang mga ito ay “karaniwang
tinatawag” na ikatlo at ikaapat na aklat ng Mga Hari)
at naglalaman ng kasaysayan ng mga hari ng Israel mula sa
pagmiministeryo ni Samuel (mga 1095 b.c.) hanggang sa pagkabihag
sa Babilonia (mga 587 b.c.). Sinuman ang sumulat ng
Mga Hari ay tinipon ang kasaysayan mula sa mga talaang hindi
na makita, tulad ng “aklat ng mga gawa ni Solomon” (I Mga
Hari 11:41) at ng aklat ng mga cronica ng mga hari ng Israel at
Juda (tingnan sa I Mga Hari 14:19, 29; tingnan din sa Gabay sa
mga Banal na Kasulatan, “Mga Hari,” p. 156–57).
Nasa unang kalahati ng I Mga Hari ang kuwento tungkol kay
Solomon—una bilang lider ng Israel sa panahon ng walang-katulad
na tagumpay at kalaunan ay bilang isang lider na bumagsak
ang espirituwalidad na nag-akay sa kanyang mga tao sa
landas ding iyon. Sa pagtatapos ng paghahari ni Solomon, bumagsak
sa temporal at espirituwal ang Israel na nauwi sa paghahati
ng kanyang kaharian sa loob ng isang taon pagkamatay
niya. Habang nagbabasa kayo, tukuyin at isipin ang mga dahilan
ng kalunus-lunos na pagbagsak ni Solomon at ng Israel.
Ikinuwento sa huling kalahati ng I Mga Hari ang nahating kaharian
ng Israel. Inilalahad dito ang ilang kasaysayan ng pulitika
ngunit mas maituturing itong kasaysayan kung paano tinupad
ng mga lider sa pulitika ang mga tipan ng Diyos sa Israel.
Ang pangunahing tuon ay nasa mga haring iyon na
pinakatanyag sa pagtupad o hindi pagtupad sa mga tipan at
sa mga propetang nangaral sa kanila. May mga aral tayong
matututuhan kapwa sa mabubuti at sa masasamang halimbawa
sa I Mga Hari.
Pambungad
I Mga Hari 1–10
Inilarawan sa unang sampung kabanata ng I Mga Hari kung
paano nakinabang si Solomon, anak ni David, sa mga tagumpay
ng kanyang ama sa digmaan. Namana niya ang kapayapaan,
kaunlaran, at seguridad at ipinagpatuloy ang matatawag
na “Ginintuang Panahon” ng Israel. Bilang isang tao, pinangakuan
at tumanggap si Solomon ng karunungan, yaman,
karangalan, at mahabang buhay. Ang mga lalaki at babae
mula sa lahat ng antas ng lipunan at sa maraming bansa ay
naghangad ng karunungan mula sa kanya.
Maaaring ituring na pinakadakilang nagawa ni Solomon ang
pagtatayo at paglalaan ng isang templo ng Diyos. Mga
153
200,000 kalalakihan at pitong taon ang kinailangan para matapos
ito. Kagila-gilalas ang mga nakita sa paglalaang ito.
Kalaunan ay tinalikuran ni Solomon ang Panginoon. Habang
pinag-aaralan ninyo ang mga kabanatang ito, alamin kung
bakit matagumpay siya noong kabataan niya—kapwa sa espirituwal
at sa temporal. Ihambing ang mga ito sa mga taon ng
kanyang katandaan at sa mga ginawa niya na humantong sa
kanyang pagbagsak at pagbagsak ng kanyang mga tao.
Ilang Mahahalagang Alituntunin ng
Ebanghelyo na Hahanapin
• Ang mga tawag na maglingkod sa kaharian ng Diyos ay
dumarating sa pamamagitan ng inspirasyong natatanggap
ng mga may wastong awtoridad (tingnan sa I Mga Hari
1:5–10, 28–31).
• Nasisiyahan ang Panginoon kapag masigasig nating hinahangad
ang kabutihan at pagpapalain tayo dahil dito (tingnan
sa I Mga Hari 2:1–4; 3:5–15; 4:29–30; 10:14–23; tingnan
din sa Alma 29:4).
• Iniutos ng Panginoon sa kanyang mga tao na magtayo ng
mga templo dahil mahalaga ang mga ito sa dakilang plano
ng kaligayahan at dito ibinubuhos ng Diyos ang mga pagpapala
niya sa kanyang mga tao (tingnan sa I Mga Hari 5;
6:14–38; 7:13–51; D at T 132:19–20).
Mga Mungkahi sa Pagtuturo
I Mga Hari 3. Tumatanggap tayo alinsunod sa ating mga
hangarin, mabuti man ang mga ito o masama. Dapat nating
iayon ang ating mga hangarin sa kalooban ng Panginoon.
(25–35 minuto)
Itanong sa mga estudyante:
• Ano ang hihilingin ninyo kung pumunta sa inyo ang Panginoon
o ang kanyang sugo at sabihin sa inyo na maaari
ninyong makamtan ang anumang gusto ninyo? Bakit?
• Basahin ang I Mga Hari 3:3–5. Sino ang tumanggap ng gayong
alok?
• Sino ang nag-alok niyon kay Solomon?
• Basahin ang I Mga Hari 3:6–9. Ano ang hiningi ni Solomon
sa Panginoon?
Isulat sa pisara ang maunawaing puso o karunungan at talakayin
kung ano ang hiningi ni Solomon. Ipatukoy sa mga estudyante
ang mga salita at katagang nagpapakita ng pag-uugali
ni Solomon noon. Ihambing ang pagtatapat niya na isa siyang
“munting bata” sa Mateo 18:1–5; Mosias 3:19; o 3 Nephi
11:37–38. Ipabasa sa kanila ang I Mga Hari 3:10–14 at itanong
sa kanila kung bakit nasiyahan ang Panginoon sa hiling ni
Solomon.
Sabihin sa mga estudyante na isipin kung paano maihahambing
ang hiling ni Solomon sa hihilingin nila. Itanong: