Sangguniang Manwal ng Guro para sa Lumang Tipan

ANG AKLAT NI JOSUE
Pambungad
Josue 1–24
Ang aklat ni Josue ay nagtataglay ng pangalan ng pangunahing
propeta at tauhan nito. Malamang na si Josue ang sumulat
o nangasiwa sa karamihan ng nakasulat sa aklat na ito,
ngunit hindi maaaring siya ang sumulat ng lahat ng ito dahil
binanggit din dito ang kanyang pagkamatay at libing. Sa
Hebreo, ang ibig sabihin ng Josue ay “ang Panginoon ay nagliligtas”
o “ang Panginoon ay nagbibigay ng tagumpay.” Ang
salitang Griyego ng pangalang ito ay Jesus.
Sinasabi sa aklat ni Josue kung paano tinulungan ng Panginoon
ang mga Israelita na makamtan ang lupang pangako. Sa
mga kuwento ng pananakop ay kitang-kita na ang Panginoon
ang nagpapanalo sa kanila. Sa maraming paraan ang kuwento
tungkol sa Josue na ito ay katulad ng sa Josue ng hinaharap, si
Jesucristo, na nagtagumpay laban sa ating mga kaaway—pati
na sa diyablo, “ang kaaway ng lahat ng kabutihan” (Moroni
9:6)—at inaakay tayo tungo sa lupang pangako ng kahariang
selestiyal matapos tayong maglakbay sa ilang ng buhay.
Ang aklat na ito ay nagpapatotoo na tinutupad ng Panginoon
ang kanyang mga pangako. Nakipagtipan ang Panginoon na
makakamtan ng mga inapo ni Abraham ang lupain ng Canaan.
Bagama’t hindi naangkin ng mga Israelita ang lahat ng lupang
ipinangako kay Abraham dahil sa kanilang pagsuway, ang kapanahunan
ni Josue ang unang pagkakataon na talagang namuno
ang mga inapo ni Abraham sa lupain ng Canaan.
Ang aklat ni Josue ay maaaring isaayos sa tatlong pangunahing
bahagi:
1. Ang pananakop sa Canaan (mga kabanata 1–12)
2. Ang paghahati ng lupain sa mga lipi ni Israel (mga kabanata
13–22)
3. Ang mga huling tagubilin at patotoo ni Josue bago siya
mamatay (mga kabanata 23–24)
Para sa karagdagang impormasyon, tingnan sa Gabay sa mga
Banal na Kasulatan, “Josue,” (p. 97–98).
Ilang Mahahalagang Alituntunin ng
Ebanghelyo na Hahanapin
• Kung tayo ay tapat tutulungan tayo ng Panginoon na malampasan
ang ating mga hamon, na kung minsan ay sa
mahimalang paraan, at pagpapalain tayo na gawin ang lahat
ng kanyang hinihiling (tingnan sa Josue 1:1–9; 3–4;
122
6:1–20; 8:1–22; 10:5–21, 40–42; 11:1–10, 15–16; 21:43–45;
23:1–11; 24:1–24).
• Ang araw-araw na pag-aaral ng banal na kasulatan ay tumutulong
sa atin na maunawaan at ipamuhay ang ebanghelyo
upang makamtan natin ang mga pagpapala ng Panginoon
(tingnan sa Josue 1:7–8; 8:32–35; tingnan din sa
D at T 33:16–17).
• Pinadadakila ng Panginoon ang kanyang mga pinuno sa
paningin ng mga tao (tingnan sa Josue 1:16–18; 4:14).
• Ang pagsunod at kadalisayan ng sarili ay nagpapaibayo ng
ating pananampalataya at tinutulungan tayong umasa sa
mga kapangyarihan ng langit na tulungan tayong malampasan
ang mga hamon na ating kinakaharap (tingnan sa
Josue 6:1–20; 7:1–26; 10:8–16; 11–12).
• Ang ating mga kilos ay umaapekto sa buhay ng mga nasa
paligid natin para sa kabutihan o sa kasamaan (tingnan sa
Josue 7:1–5, 10–21).
• Kung minsan ay pinatitigil ng Panginoon ang mga tao sa
kanilang kasamaan, at nililipol sila kapag sila ay “hinog na
sa kasamaan” (tingnan sa Josue 8:1–29; 10–11; tingnan din
sa Deuteronomio 20:16–18; 1 Nephi 17:32–35; Moises
8:20–22, 28–30).
• Laging tinutupad ng Panginoon ang kanyang mga pangako
(tingnan sa Josue 21:45; 22:1–4; tingnan din sa D at T
1:37–38; 82:10).
• Binigyan ng Diyos ang kanyang mga anak ng kalayaang
pumili, at malaya silang piliing mahalin at paglingkuran
ang Panginoon o ang mga huwad na diyus-diyusan ng
mundo (tingnan sa Josue 22:5; 23:11–16; 24:14–25; tingnan
din sa Alma 5:38–42; D at T 1:16).
Mga Mungkahi sa Pagtuturo
Ang Video ng Lumang Tipan pagtatanghal 17, “ ‘Walang
Ibang mga Diyos sa Harap Ko,’ ” ay gumamit ng analohiya
ng carbon monoxide upang ipakita ang epekto ng pagsamba
sa mga diyus-diyusan (tingnan sa Gabay sa Video ng Lumang
Tipan para sa mga mungkahi sa pagtuturo).
Josue 1. Ang araw-araw na pag-aaral ng banal na kasulatan
ay tumutulong sa atin na maunawaan at ipamuhay
ang ebanghelyo upang makamtan natin ang mga pagpapala
ng Panginoon. (30–40 minuto)
Upang maihanda ang mga estudyante para sa Josue 1, basahin
ang sumusunod na pakunwaring liham mula kay Josue
na humihingi ng payo:
Sa kinauukulan:
Ang pangalan ko ay Josue. Ako ang nahirang na bagong pinuno ng
mga anak ni Israel bilang kapalit ng dakila nating pinunong si Moises,
na umakay sa atin palabas ng Egipto at hindi na natin kapiling nga-