í Serbíu Handbók - Land og saga

EM í Serbíu 2012
Einblínum fyrst á það að komast upp úr riðlinum
EM viðtal við Guðmund Þ. Guðmundsson landsliðsþjálfara
UmhverfisvottUð
prentsmiðja
Íslenska landsliðið hefur spilað í úrslitakeppni
EM fimm sinnum í röð og er að fara
á sitt sjötta EM-mót. Árangurinn hefur verið
misjafn, allt frá því að komast í undanúrslitaleikinn
og ná 3. sæti, niður í 13. sæti. Eftir
þann frábæra árangur sem náðist á síðustu
Ólympíuleikum, EM og HM, eru menn mjög
spenntir að sjá hvernig íslenska liðið spjarar
sig. Það er engum blöðum um það að fletta
að við eigum frábært lið sem getur náð
góðum árangri og má telja það eitt af bestu
liðum Evrópu. En væntingar eru alltaf miklar
og getur brugðið til beggja vona, stöngin
inn eða stöngin út. Guðmundur Guðmundsson,
landsliðsþjálfari, hefur undirbúið
liðið vel fyrir EM og eru hann og hans menn
þekktir fyrir alla undirbúningsvinnuna sem
þeir vinna fyrir hvern leik. Hvernig þeir rannsaka
mótherjana og kortleggja þá á alla
máta með allskonar tæknivinnu. En hvernig
skyldi mótið í ár leggjast í Guðmund?
„Tilfinningin fyrir mótinu í ár er bara ágæt.
Þótt þetta sé mjög erfiður riðill og það sé
ákveðin óvissa hvað varðar hópinn hjá okkur,
þá þýðir ekkert annað en að vera bjartsýnn
og vona það besta. Það eiga sumir við
einhver meiðsli að stríða, eins og Alexander
sem er slæmur í öxl og Ingimundur sem er
slæmur í nára. Hvað riðilinn varðar, þá mætum
við mjög erfiðum andstæðingum, hvort
sem það er lið Króatíu, Noregs eða Slóveníu.
Þetta er erfitt verkefni og okkar fyrsta skref er
að einbeita okkur að því að komast upp úr
riðlinum. Þar spilar inn í að bæði Norðmenn
og Slóvenar fara á þetta mót til þess að ná
sér í þátttökurétt í forkeppni Ólympíuleikanna
sem gerir þetta enn erfiðara fyrir okkur.
Nú, svo eru Króatar og Slóvenar hálfpartinn
að spila á heimavelli og fjölmargir áhorfendur
á leikjunum munu styðja við bakið á
þeim. Við verðum að sjá þetta rökrétt fyrir
og gera okkur grein fyrir því að það er erfitt
mót sem bíður okkar. Ef okkur tekst að komast
upp úr riðlinum, þá tekur ekki betra við
í milliriðlinum. Frakkar og Spánverjar verða
þar örugglega og eru mjög sigurstranglegir
á þessu móti. Ég tek þann pólinn í hæðina
að einblína fyrst á það að komast í milliriðilinn,
áður en ég fer að velta því mikið fyrir
mér hvað mögulega bíði okkar þar. Það er
svo mikilvægt að taka þetta í réttum skrefum,
að við séum ekki að plana of langt
fram í tímann og jafnvel fara á undan sjálfum
okkur,“ segir Guðmundur Guðmundsson,
þjálfari íslenska liðsins, íbygginn á svip
og vill hafa vaðið fyrir neðan sig varðandi
möguleika Íslands á þessu móti.
-Nú hefur Ísland oft spilað gegn mörgum
þessara þjóða á síðustu stórmótum,
eins og Króatíu, Frakklandi og Noregi?
„Jú, vissulega. En það ber ýmislegt að varast.
Við höfum t.d. ekki riðið feitum hesti
frá viðureignum okkar við Króata í síðustu
mótum. Við höfum tapað fyrir þeim fimm
sinnum og aðeins einu sinni náð jafntefli
í síðustu sex leikjum á stórmótum. Þannig
að þeir hafa verið okkur erfiðir. Norðmenn
hafa alltaf reynst okkur erfiðir. Þetta eru alltaf
mjög jafnir leikir og hörku spennandi. Það
er engin spurning að Norðmenn verða með
mjög gott lið á þessu móti, þó einhverjir
hafi helst úr lestinni. Slóvenar eru líka með
mjög gott lið. Þetta verða allt erfiðir leikir og
við verðum að halda einbeitingunni,“ segir
Guðmundur og gerir sér grein fyrir því að
það verður allt að ganga upp ef Ísland á
komast upp úr riðlinum.
-Verðið þið með eitthvað nýtt á
prjónunum fyrir þetta mót, nýjar
áherslur og ný leikafbrigði?
„Já, það er alltaf eitthvað nýtt sem við komum
með. Varðandi sóknarleikinn erum við
alltaf að þróa einhverja nýja hluti. Áherslubreytingar
varnarlega eru alltaf til staðar, þó
við byggjum ávallt á ákveðnum grunni allt
frá síðustu Ólympíuleikum. Við höfum haldið
áfram að þróa þann grunn og hafa þannig
meira upp á að hlaupa. Við erum aðeins
að laga okkur að einu nýju varnarafbrigði og
svo verðum við með tvo nýja þætti í sókninni.
En sem fyrr segir, þá byggjum við fyrst
og fremst á okkar fyrri grunni og reynum að
bæta hann enn frekar.“
-Eru ekki strákarnir ekki vel stemmdir
og alltaf jafn hungraðir í það að ná
góðum árangri á svona stórmótum?
„Jú, hungrið er alveg til staðar, en það er bara
oft þannig að það kemur ekki í ljós fyrr en
á hólminn er komið hvernig menn standa.
Strákarnir eru búnir að æfa mjög vel og hafa
lagt sig alla fram og tekið vel á því, þannig
að þeir ættu að hafa alla burði til þess að
vera í góðum gír og rétt stemmdir þegar
mótið byrjar. Ég er mjög ánægður með það
hvað strákarnir leggja mikið í þetta. Þeir vita
líka að hverju þeir eru að ganga, hafa spilað
mikið saman og þetta er mjög leikreynt
lið. En það verður að gefa allt í þetta í leikjunum
á mótinu til þess að árangur náist. Ég
er auðvitað búinn að leggja fyrir þá línurnar
og þeir hafa alveg gefið sig í það að samæfa
hlutina til þess að láta allt smella saman. Að
menn stilli sig inn í liðið, fínpússi hlutina og
gangi að því vísu hvernig liðið eigi að virka
til þess að það geti náð góðum árangri. Þó
margir leikmanna landsliðsins séu búnir að
vera saman þetta lengi, þá er það alltaf mikilvægt
atriði að allt smelli rétt saman þegar
mætt er til leiks,“ segir Guðmundur Guðmundsson
landsliðsþjálfari sem hefur staðið
í ströngu við að undirbúa íslenska liðið sem
best fyrir mótið.
Áfram Ísland!
Oddi er stoltur styrktaraðili
íslenska handboltalandsliðsins
Hvernig fara leikirnir?
Ísland - Króatía
Ásbjörn
Sveinbjörnsson:
Guðríður
Guðjónsdóttir:
Ingi Þór
Guðmundsson:
Logi Geirsson:
Ásbjörn Sveinbjörnsson: Þetta byrjar með látum. Þetta eru tvö af fjórum bestu liðum
heims í dag. Ég hallast að því þetta verði svakalegur leikur, þar sem íslenska liðið nái sigri
í síðustu sókn. Það verður ekki mikið skorað í þessum leik og jafnt á allflestum tölum. Ég
spái 23 - 22 fyrir Ísland.
Guðríður Guðjónsdóttir: Sagan segir okkur að Króatíu gangi oft illa í fyrsta leik, en þetta
árið spila þeir nánast á heimavelli. Þetta verður eflaust erfiður leikur og sennilega okkar
eina tap í riðlinum, 26 - 28.
Ingi Þór Guðmundsson: Fyrsti leikur Íslands í riðlakeppninni er við Króatíu. Króatía er
með ungt lið en hefðin og reynslan er gífurleg sem skilar Króatíu einhvern veginn oft
ágætis árangri á stórmótum. Ég geri ráð fyrir því að Króatía vinni leikinn með tveim mörkum,
38 - 36.
Logi Geirsson: 29 - 26 fyrir Ísland. Króatar verða ekki jafn góðir og þeir hafa verið á undanförnum
mótum. Við mætum sterkir og náum að leggja sigurinn upp með góðum hraðaupphlaupum.
Það verður erfitt fyrir skytturnar að skora á sterka 6-0 vörn þeirra.
Páll Ólafsson: Siggi Sveins: Valdimar
Grímsson
Páll Ólafsson: Ég hef trú á því að það sé gott fyrir okkur að byrja á Króötum. Við í fyrsta
stórmóti sem Óli Stef. er ekki með í langan tíma, þannig að væntanlega eiga fæstir von
á einhverju stórkostlegu frá okkar mönnum. En við eigum sem betur fer fullt af góðum
mönnum, þó þeir séu kannski ekki alveg komnir á þann stað sem Óli er. En mín spá er
sú að við byrjum á glæsilegum sigri á Króötum. Það verður leikinn frábær sóknarleikur í
þessum leik.
Siggi Sveins: Það verður nokkuð gott að fá Króatana í fyrsta leik og má búast við hörkuleik,
eins og svo oft á milli þessara þjóða. Við eigum að eiga góða möguleika ef við náum
upp sterkri vörn og fáum í kjölfarið nokkur eitruð hraðaupphlaup. Króatarnir eru með gífurlega
reynslumikið lið, enda margir af þeim að spila í Þýskalandi. Þeirra aðalmenn eru
„Hamborgararnir“ Vori, Duvnjak, Lackovic og ekki má gleyma gömlu „moppunni“ Ivano
Balic, sem reyndar spilar í heimalandinu og hefur þar tekist með ágætum að standa í fæturna.
Hann er reyndar notaður í dag sem einskonar jóker. Ég held að úrslit leiksins ráðist á
lokamínútunum þar sem Aron Pálmarsson jafnar leikinn með skoti af 10 metrum og vonandi
verður það til þess að hann komi til með að blómstra á mótinu.
Valdimar Grímsson: Opnunarleikur á móti Króatíu verður mjög skemmtilegur og hér
vinnum við leikinn með einu marki 32-31.
P11.00.036
Oddi fyrir þig, þegar hentar, eins og þér hentar.
Oddi – umhverfisvottuð prentsmiðja.
höfðabakka 7, 110 reykjavík, sími 515 5000. www.oddi.is
prentun frá a til Ö