í Serbíu Handbók - Land og saga

26 27
EM í Serbíu 2012 EM í Serbíu 2012
Einar Örn Jónsson hjá RÚV verður í
Serbíu og fangar stemninguna
EM viðtal við Einar Örn Jónsson
Einar Örn Jónsson, íþróttafréttamaður
á RÚV, og fyrrum landsliðsmaður
í handbolta, verður í eldlínunni
í Serbíu ásamt félaga sínum úr
íþróttadeildinni, Þorkeli Gunnari Sigurbjörnssyni,
og tæknikonunni Maríu
Björk Guðmundsdóttur.
Einar Örn er öllum hnútum kunnugur varðandi
það að spila á stórmóti með íslenska
landsliðinu, sem leikmaður, áhorfandi og nú
sem íþróttafréttamaður. Þeir félagar munu
lýsa leikjum Íslands, taka viðtöl við þjálfara
og leikmenn og vinna að alls konar áhugaverðu
efni sem tengist EM og fanga þannig
stemninguna sem myndast í kringum svona
stórmót. Senda þau stöðugt efni heim sem
verður tekið fyrir í EM-stofu sjónvarpsins og
á fleiri miðlum RÚV.
-Er þetta fyrsta stórmótið sem þú ert að fara
á sem íþróttafréttamaður?
„Nei, ég fór á HM í Svíþjóð í fyrra og var þá
með lýsingar fyrir útvarpið og sendi inn
fréttir, en við á RÚV vorum ekki með sýningarréttinn
í sjónvarpi. En þetta er fyrsta
mótið sem ég fer á sem sjónvarpsmaður.
Ég og Þorkell Gunnar förum saman ásamt
Maríu Björk „producent“ sem mun sjá um
að taka upp og klippa efni sem við síðan
sendum jafnóðum heim. Við verðum með
viðtöl í beinni útsendingu eftir leiki og eitthvað
í útvarpinu líka. Verðum t.d. með fullt af
efni bæði fyrir stóru fréttatímana í útvarpinu
sem og sjónvarpinu. Svo sendum við vonandi
líka eitthvað efni inn á vefinn hjá okkur.
Þá erum við að tala um viðtölin óklippt,
ekki þessar styttri útgáfur af viðtölunum. Við
verðum með viðtöl og efni frá Serbíu bæði
fyrir og eftir leiki og einnig á frídögunum
þegar Ísland er ekki að spila. Þetta fer náttúrulega
allt eftir því hversu mikið aðgengi
við höfum að liðinu. Það er ekki alltaf hægt
að vera í beinu sambandi við leikmenn, því
þeir verða að einbeita sér að leikjunum og
undirbúningnum fyrir þá. Svo verður María
stöðugt að taka upp eitthvað efni á meðan á
leikjunum stendur sem verður hægt að nota
í EM-stofunni hérna heima. Svo gerum við
einhver stemningsmyndbönd, sérstaklega
þegar vel gengur,“ segir Einar Örn Jónsson.
-Þið verðið sem sagt með stöðuga dagskrá
frá Serbíu til þess að fanga stemninguna?
„Já, við verðum að allan tímann og ef einhverjir
Íslendingar verða þarna, þá tökum við hús
á þeim og spjöllum við þá. Við gerum allt til
þess að ná fram þeirri miklu stemningu sem
er á svona stórmóti í handbolta eins EM er. Ég
veit ekki hvort það verða margir Íslendingar
á svæðinu, en almennt er mikill áhugi fyrir
mótinu og nánast uppselt á hvern einasta
leik. Það er svolítið langt að fara fyrir Íslendinga
til Serbíu. Það er öðruvísi en að fara t.d.
til Svíþjóðar eða Þýskalands sem hægt er að
fljúga til í beinu flugi. Það verða þó einhverjir
Íslendingar þarna, bæði fólk sem býr nálægt
Serbíu og svo fólk sem fer gagngert á mótið.
Það er líka oft þannig þegar fram í dregur -
og ég tala nú ekki um ef íslenska landsliðinu
vegnar vel og góður árangur er í sjónmáli - að
menn eru fljótir til og koma í hópum á svæðið,“
segir Einar Örn.
Eftir þá miklu sprengingu sem varð í Þýskalandi
á HM 2007, hefur áhugi fyrir stórmótum
í handbolta farið stigvaxandi. Þó það
hafi komið einstaka afturkippir síðan, þá
er áhuginn fyrir handboltanum alltaf að
aukast. Þegar stórmót eru, þá er verið að
tala um stórmót í orðsins fyllstu merkingu,
þar sem fleiri þúsund manns troðfylla hallirnar
og mikil stemning verður.
„Kröfurnar til stórmóta í handbolta eru orðnar
allt aðrar en þær voru. Ég var t.d. bæði á
EM í Portúgal og HM í Túnis 2005 og þar
voru ekki miklar kröfur gerðar miðað við þær
sem eru í dag. Íþróttahallirnar, aðstæðurnar
og öll umgjörðin voru svo allt öðruvísi og
vart bjóðandi í dag. Á mótinu núna í Serbíu
taka minnstu hallirnar um 5.000 manns og
þær stærstu 25.000. Þannig að þetta er orðið
allt annað, miklu stærra í allri umgjörð og
áhuginn eftir því. Þá má segja að stórmótin
í handbolta séu orðin alvöru mót og hafi
hækkað um nokkra flokka í allri umsýslu og
„standard“. Sjónvarpsútsendingar eru orðnar
miklu víðari, m.a. til fjölda landa sem eru
ekki einu sinni að keppa á mótinu og miklu
stærri sjónvarpssamningar eru gerðir. Þetta
er orðið virkilega fagmannlegt í allri framsetningu.
Þetta er alltaf að stækka, ár frá ári,“
segir Einar Örn.
-Hvernig verður þessu háttað með EM-stofuna
sem þið verðið með hérna heima?
„Baldvin Þór Bergsson sér um hana og
verður með góða gesti. Fastir sérfræðingar
verða þar með honum og kryfja leikina og
mótið. Það verða sérfræðingar eins og Hafrún
Kristjánsdóttir, Gunnar Berg Viktorsson
og Aron Kristjánsson. Svo verða einhverjir
gestir sem verða kallaðir til í hvert skipti
og fara yfir málin með Baldvin og félögum.
Það verða t.d. gamlir landsliðsmenn og
annað áhugavert fólk sem tengist handboltanum
á einhvern hátt, þó það sé ekki
nema að hafa áhuga á íslenska landsliðinu
og mótinu. Það er náttúrulega gríðarlegur
fjöldi sem hefur svo mikinn áhuga á þessum
mótum þegar íslenska landsliðið er að
spila. EM-stofan verður send út fyrir og eftir
leiki og svo seinna um kvöldið verður samantekt
yfir daginn. Það verður þetta hefðbundna
form í útfærslunni á EM-stofunni.
Leikirnir verða teknir fyrir, horft á þá frá ýmsum
sjónarhornum, bæði tæknilega sem og
fræðilega, ýmis atriði tekin fyrir úr leikjunum
og tölvutæknin verður notuð til þess að
útfæra áhugaverð atriði, eins og við vorum
með í EM-stofunni 2010 þegar við notuðum
leikgreiningarforrit landsliðsins til þess að
skýra kerfin og hvernig þau virka og varpa
ljósi á helstu atriði liða og leikja. Við verðum í
beinu sambandi við Baldvin Þór og sendum
honum stöðugt nýtt og nýtt efni sem hann
getur tekið fyrir í EM-stofunni.“
-Þið sýnið fleiri leiki en aðeins Íslands frá
mótinu?
„Já, við verðum með útsendingar frá sem
flestum leikjum, t.a.m. beinar útsendingar
frá öllum leikjunum í okkar riðli sem verður
lýst frá Serbíu og svo verðum við með útsendingar
frá öðrum áhugaverðum leikjum
í hinum riðlunum og verður þeim lýst hérna
heima. Við verðum líka með útsendingar frá
leikjum á netinu, þar sem við getum ekki alveg
tekið yfir alla aðra dagskrá sjónvarpsins.
Dagskráin er alltaf fastmótuð eftir ákveðinni
áætlun, þar sem hver þáttur og dagskrá
verður að hafa sinn tíma. Handboltanum
verður veglega sinnt bæði í sjónvarpinu,
útvarpinu sem og vefmiðlinum okkar,“ segir
Einar Örn fullur tilhlökkunar að fara til Serbíu
og takast á við þetta verkefni sem íþróttafréttamaður,
bæði fyrir sjónvarp, útvarp og
vefmiðla.
-Ef þú horfir á þetta bæði útfrá því að vera
fyrrum landsliðsmaður sem hefur tekið þátt
í fjölda stórmóta og svo núna sem íþróttafréttamaður,
sérðu ekki muninn, eins og þú
viljir nú fara inn á og „redda þessu“ og taka
þátt í leiknum í orðsins fyllstu merkingu?
„Nei, ég reyni nú að passa mig á því að gera
það ekki. Ég geri mér alveg grein fyrir því að
ég get ekki haft nokkur áhrif á gang leikjanna.
Auðvitað upplifir maður leikina svolítið
öðruvísi sem fyrrum leikmaður og þekkir
hvernig það er að taka þátt í sjálfum leiknum.
Það er gaman að dvelja í minningunni
um það þegar maður var á fullu í allri hringiðunni
með tilheyrandi keppnisskapi og
stemningu, bæði á bekknum sem og inni á
vellinum. Nú er ég þó í allt öðru hlutverki og
nálgast leikina á allt annan hátt og þá sem
íþróttafréttamaður en ekki leikmaður,“ segir
Einar.
-Er engin hætta á því að þú gætir misst þig
í beinni útsendingu, þegar þér finnst dómararnir
fara yfir strikið og látir til þín heyra,
eins og í stemningunni á bekknum þegar þú
varst að spila?
„Nei, nei, ég passa mig á því líka, þótt ég sé
óhjákvæmilega meira tengdur leikjunum
tilfinningalega vegna fyrri reynslu, því ég
hef spilað með flestum af þessum strákum
og þekki stemninguna frá báðum hliðum,
sem leikmaður og íþróttafréttamaður. Það
má alveg búast við því að maður fari að
svitna yfir spennuni í leikjunum og verði
stundum heitt í hamsi. Maður verður þó að
halda haus og einblína á það að vera fyrst
og fremst íþróttafréttamaður. Ég er alveg
búinn að setja mig í það hlutverk.“
Einar Örn hefur spilað á sjö stórmótum með
íslenska landsliðinu og hefur tekið alla flóruna,
hvort sem er á EM, HM eða á Ólympíuleikum.
Síðast lék hann á HM í Þýskalandi
árið 2007. Hann getur nýtt sér þá reynslu í
starfi sínu sem íþróttafréttamaður sem hefur
mikið að segja.
„Það er svo algengt víða um heim að fyrrum
handboltamenn séu farnir að starfa sem
íþróttafréttamenn og þá sérstaklega þegar
um handboltann er að ræða. Það verður
gaman að hitta gamla félaga frá ýmsum
löndum, sem nú eru í hlutverki íþróttafréttamanna,
rifja upp gömul kynni og leikina
sem við spiluðum gegn hver öðrum hér
áður fyrr á ýmsum mótum,“ segir Einar.
-Ef við snúum okkur að mótinu sjálfu. Hvernig
sérð þú íslenska liðið í dag og hvernig er
tilfinning þín fyrir mótinu?
„Tilfinningin er mjög góð. Við erum með frábært
lið, það verður ekki framhjá því horft.
Og þótt að Óli Stefáns sé ekki með, þá er
þetta alveg frábær hópur. Það má reikna
með því að það veiki liðið aðeins að hann
sé ekki með núna, en það má líka líta á það
frá öðru sjónarhorni, að þetta sé upphafið
PI PAR SÍA 82289
að einhverju öðru nýju sem muni koma
fram á mótinu. Óli getur auðvitað ekki spilað
handbolta endalaust og það kemur að
þeim tímapunkti að hann leggi skóna á
hilluna. Það verður því ágætis reynsla sem
menn fá að spila á stórmóti án Óla, eins og
það kemur til með að verða í framtíðinni. Íslenska
landsliðið er búið að ná þeim áfanga
að keppa um Ólympíusæti, þannig að það
vakir ekki fyrir þeim á þessu móti og þeir
eru ekkert að stressa sig á því. Eigi að síður
er alltaf til staðar sama stemningin, baráttuandinn
og metnaðurinn í liðinu um að
ná mjög góðum árangri. Það gildir annað
fyrir þjóðir eins og Þýskaland, Serbíu, Noreg
og Rússland sem keppa að því að ná inn í
forkeppni Ólympíuleikanna, en þar eru enn
tvö sæti laus.“
-En hvað með riðilinn okkar, förum við ekki
með fjögur stig út úr honum í milliriðilinn?
„Það verður mjög erfitt. Sum lið eins og lið
Króatíu eru algjörlega óútreiknanleg, en ef litið
er á leikmannahóp Króata, þá eru þeir með
eitt af bestu liðum Evrópu. Maður veit aldrei
í hvernig stemningu þeir eru. Þeir geta verið
sínir verstu óvinir sjálfir sem gæti reynst gott
fyrir okkur. Í viðtali sem ég heyrði um daginn
við liðsmann Króatíu, þá fannst mér hann
tala mest um Ólympíuleikana, en Króatar eru
öruggir með sæti þar í forkeppninni. Það er
eins og svo margir einblíni mjög mikið á Ólympíuleikana.
Að því leyti til verða bæði Noregur
og Slóvenía mjög erfiðir andstæðingar,
þar sem bæði liðin hafa að Ólympíusætinu að
keppa. Að leika við Króatíu í fyrsta leik getur
bæði verið mjög gott og slæmt. Það fer svo
mikið eftir því hvernig þeir eru stemmdir. Sem
dæmi má nefna að þeir urðu heimsmeistarar
2003, þrátt fyrir að hafa tapað óvænt sínum
fyrsta leik sem var gegn Argentínu. Þannig
að það er engin leið að sjá hvernig þeir koma
til með að spila í sínum fyrsta leik nú. Ef þeir
spila af eðlilegri getu, þá verður þetta mjög
erfiður leikur fyrir Ísland. Eins er það þannig
að ef við spilum af eðlilegri getu, þá eigum
við hæglega að geta unnið þá. Við höfum
spilað við þá á síðustu tveimur stórmótum
og í bæði skiptin vorum við með unninn leik
í höndunum. Við leiddum leikinn nánast allan
tímann á HM í fyrra en töpuðum svo með
einu marki, sem var mjög svekkjandi. Svo
misstum við niður unninn leik í jafntefli á EM
2010. Leikurinn gegn Króatíu gæti reynst úrslitaleikur
riðilsins og ég vona það. Það yrði
mjög sterkt að byrja mótið með sigri á þeim.
Norðmenn eru þó alltaf erfiðir og hafa góðu
liði á að skipa sem er með frábæra heimsklassa
leikmenn nánast í hverri stöðu. Á móti
kemur að einhvern veginn hefur þeim ekki
alveg tekist að stilla þennan góða hóp sinn
rétt saman, svo úr verði virkilega gott lið sem
hefði burði til þess að ná verulega góðum árangri.
Svo hefur eitthvað týnst úr hópnum og
einn þeirra besti maður verður ekki með, sem
eru reyndar mjög góðar fréttir fyrir okkur. Að
öllu jöfnu eigum við að vinna Norðmenn, en
það er alltaf sérstök stemning sem myndast
þegar þessar þjóðir eigast við. Lið Íslands
og Noregs hafa oft leikið gegn hvort öðru
á stórmótum síðustu ára. Leikirnir hafa alltaf
verið mjög spennandi og sem betur fer hefur
Ísland oftar en ekki haft betur. Lið Slóveníu er
svo nánast á heimavelli og verður erfitt viðureignar.
Það mæta án efa margir Slóvenar í
höllina og hvetja sína menn þegar þeir spila
gegn íslenska liðinu. Slóvenar eru með mjög
skeinuhætt lið og þetta gæti reynst mjög
örlagaríkur leikur. Bæði hvað varðar það að
komast áfram upp úr riðlinum og það hversu
mörg stig íslenska liðið tæki með í milliriðilinn
ef það markmið næðist. Það getur allt gerst í
þessum riðli og hef ég trú á því að það skýrist
ekki fyrr en á síðustu mínútum leikja riðilsins
hverjir komist áfram og með hvað mörg stig,“
segir Einar.
-En ef við gerum ráð fyrir því að Ísland komist
áfram, bíða okkar þá ekki verulega verðugir
andstæðingar?
… við íslenskan vetur. Þú vaknar að morgni og
sérð á hrímuðum gluggunum að í nótt hafi Vetur
konungur gengið um ríki sitt. Frostrósirnar minna
þig á landið þitt, ísinn og jöklana sem hafa mótað
líf þitt og forfeðra þinna.
ICECOLD – falleg íslensk hönnun innblásin
af fegurð íslenskrar náttúru.
„Jú, svo sannarlega! Það yrðu auðvitað gífurleg
vonbrigði ef Ísland kæmist ekki áfram
í keppninni, en það hefur aðeins einu sinni
gerst á EM. Ef íslenska liðið kemst áfram
í milliriðil má fastlega gera ráð fyrir því að
það muni leika við lið Frakklands og Spánar,
sem sumir spá að muni komast í undanúrslit.
Það er vissulega okkar verkefni að
reyna að komast þangað á kostnað a.m.k.
annars þeirra. Frakkar eru alltaf Frakkar og
hafa borið höfuð og herðar yfir aðrar þjóðir
í handboltanum og munu eflaust gera það
áfram og eru mjög sigurstranglegir á EM.
Spánverjar eru að koma til aftur, en þeir
urðu heimsmeistarar árið 2005, svo kom
smá lægð hjá þeim, en nú eru þeir að koma
aftur með látum og eru með mjög gott lið
sem er líklegt til afreka.“
-Ef við göngum út frá því að Frakkland sé í
sérflokki í milliriðlinum, getum við þá ekki
séð þetta fyrir okkur sem baráttu þriggja
þjóða, Spánar, Króatíu og Íslands, um annað
sætið í riðlinum og að komast í undanúrslitin?
„Ja, hvað skal segja? Það getur náttúrulega
allt gerst og er jafnvel hægt að reikna með
Ungverjalandi líka í þeirri baráttu. Þeir eru
með mjög sterkt og skemmtilegt lið. Við
töpuðum nokkuð sanngjarnt fyrir Frakklandi
og Spáni eftir skellinn gegn Þýskalandi
á HM í fyrra. Við getum þó alveg unnið
þessar þjóðir hvenær sem er á góðum degi.
EM er miklu sterkara mót en HM, þar sem öll
liðin eru góð og allir geta sigrað alla þegar
þannig ber undir. Það er ekki svo ýkja mikill
munur á getu liðanna. Þótt menn tali um
Frakka í einhverjum sérflokki, þá geta þeir
tapað leikjum eins og öll hin liðin á þessu
móti. Það er allt undir í hverjum einasta leik
á EM,“ segir Einar Örn Jónsson, fyrrum landsliðsmaður
og nú íþróttafréttamaður á RÚV,
og mun ekki láta sitt eftir liggja í allri stemningunni
á EM og vonandi sendir hann okkur
hér á Íslandi ekkert nema góðar fréttir..
Laugavegur / Smáralind / Kringlan
Jón & Óskar Laugavegi 61, Kringlunni og Smáralind // Sími 552 4910 // www.jonogoskar.is // www.icecold.is