Create successful ePaper yourself
Turn your PDF publications into a flip-book with our unique Google optimized e-Paper software.
Një pjesë e tyre, fisnikët nga gjaku (apo nga shpata), rridhnin nga familje të lashta fisnike. Të<br />
tjerë e kishin fituar titullin e fisnikërisë më vonë, pasi i kishin shërbyer shtetit si gjykatës,<br />
guvernatorë të provincave, furnizues me armë, se u kishin dhënë hua para sovranëve apo sepse e<br />
kishin paguar me çmim të kripur titullin e fisnikërisë: mbretërit dhe princat kishin gjithnjë nevojë<br />
për të holla dhe s’para ngurronin shumë kur qe fjala për të dhënë tituj me pagesë. Kjo aristokraci<br />
e vonë quhej në Francë fisnikëri e togës, nga emri i mantelit të gjatë që mbajnë gjyqtarët (toga).<br />
Jo të gjithë fisnikët ishin shumë të pasur, madje shumë prej tyre ishin të skamur dhe të mbytur në<br />
borxhe. Por që të gjithë ishin në garë kush e kush të binte më shumë në sy, në jetën e përditshme,<br />
nga masa e njerëzve të zakonshëm, që duhet të punonte për të jetuar. Shpalosnin pasuritë e tyre<br />
dhe e përbuznin punën e krahut, duke e quajtur diçka “të ulët”.<br />
Ata që punojnë për të siguruar jetesën: shtresa e tretë. Fisnikëria përbënte një përqindje të<br />
ulët të popullsisë (jo më shumë se 1% në Francë), ndërsa pjesa dërrmuese e njerëzve bënte pjesë<br />
në të ashtuquajturën shtresë e tretë. Këtu bënte pjesë një grup i vogël borgjezësh të pasur dhe të<br />
ditur (gjyqtarë, avokatë, financierë, tregtarë të mëdhenj, sipërmarrës) dhe të gjithë ata që jetonin<br />
me punën e krahut të tyre, fshatarë, zejtarë, punëtorë, punëtorë krahu.<br />
Ishin pastaj të emargjinuarit (të varfër, lypës, endacakë), që shpesh i mbyllnin në azile, ku<br />
jetonin bashkë pleq dhe fëmijë, të shëndetshëm dhe të sëmurë, të marrë dhe punëbosh.<br />
Uria, lufta, epidemitë përkeqësojnë kushtet e jetesës. Në shekulli XVII pati disa vite me<br />
prodhime të pakta bujqësore dhe zi buke, që dënonin me uri mbarë popullatën. Epidemitë ishin<br />
të shpeshta, sidomos murtaja, por edhe lija, tifoja apo gripi i thjeshtë, po aq i rrezikshëm për<br />
popullsinë e kequshqyer. Ekspeditat ushtarake plaçkitnin dhe vrisnin, shkatërronin fushat,<br />
përhapnin sëmundje infektive. Popullsive të sfilitura, qeveritë u vinin taksa përherë e më të rënda.<br />
Në tërë Evropën kushtet e jetës përkeqësoheshin dhe si në qytet ashtu dhe në fshat, shpërthyen<br />
kryengritje të dhunshme popullore.<br />
Për shkak të urisë, luftërave dhe epidemive, rritja demografike pësoi një ngadalësim: popullsia<br />
mbeti e pandryshuar në vendet mesdhetare (Spanjë, Itali, Francë), ra ndjeshëm në Gjermani (që<br />
siç do ta shohim u bë arenë e një lufte të gjatë e quajtur “lufta e tridhjetë vjetëve”), vazhdoi të<br />
rritet në vendet e veri-lindjes (Angli dhe Holandë), që ditën t’i bëjnë ballë me sukses vështirësive<br />
ekonomike të momentit.<br />
Shoqëria në shekullin XVII<br />
Shtresat e privilegjuara (fisnikëria, kleri) Shtresa e tretë (ata që punojnë për të jetuar) shtresa e lënë pasdore<br />
(lypësit, të çmendurit, endacakët).<br />
Uria, lufta, sëmundjet: plagët e shekullit<br />
Uria-dobëson organizmin-epidemitë-shkaktojnë vdekjen<br />
Zitë e bukës-janë shkak-i urisë-favorizojnë epidemitë-shkaktojnë vdekjen<br />
Ushtritë dhe luftërat—shkatërrojnë fushat-shkaktojnë vdekjen.<br />
2. Varfëria dhe rënia ekonomike në Spanjë, Itali dhe Gjermani<br />
Ekonomia e Spanjës në rënie. Rreth vitit 1550 Spanja ishte vendi më i pasur i Evropës. Por që<br />
në gjysmën e dytë të shekullit mbretërit spanjollë, duke u gjendur ngushtë me të holla, u detyruan<br />
t’i kërkojnë para bankierëve të gjysmës së Evropës dhe ndonjëherë nuk qenë në gjendje t’i<br />
shlyejnë borxhet që merrnin.<br />
Si ndodhi e gjithë kjo? Le të përpiqemi ta kuptojmë.<br />
Sasitë e mëdha të metalit të çmuar, që mbërritën në Spanjë nga kolonitë amerikane, nuk<br />
shpenzoheshin në dobi të bujqësisë, artizanatit, tregtisë, sepse fisnikët spanjollë e përbuznin<br />
punën dhe aktivitetet prodhuese, duke u përpjekur të bëjnë karrierë në ushtri dhe në rangjet e<br />
klerikëve.