LIGJI nr.9010, datë 13.02.2003 “PER ... - chemicals.al

qytete të Shqipërisë, MMPAU dhe pushteti vendor kanë zhvilluar aktivitete në
bashkëpunim me OJF-të lokale, veçanërisht në ditët kombëtare dhe ndërkombëtare
mjedisore. E drejta e publikut për të marrë informacion mjedisor, është e sanksionuar
në kushtetutën e Republikës së Shqipërisë. Në këtë kuadër, përmirësimi i ligjit “Për
mbrojtjen e mjedisit”, në vitin 2001, siguroi më konkretisht të drejtën e të gjithëve për
t’u informuar në fushën e mjedisit. Ndonëse mjetet e komunikimit e kanë rritur
gjithnjë e më shumë vëmendjen ndaj temave problematike mjedisore, zhvillimet dhe
arritjet në fushën e ndërgjegjësimit të publikut, të qenit i informuar dhe pjesëmarrja e
tij në aktivitetet dhe politikat mjedisore ende mund të konsiderohen modeste. Një
fushë tjetër e cila duhet mbështetur dhe nxitur janë edhe trajnimet e gazetarëve për të
trajtuar më mirë dhe më shumë problemet mjedisore.
Pjesëmarrja e publikut
Zgjidhja e problemeve të lidhura me NOQ-të mund të ketë sukses me rritjen e
pjesëmarrjes së publikut, në përgjithësi, dhe komuniteteve të interesuara, në veçanti.
Përgatitja e PKV ka hedhur tashmë hapat për të mundësuar pjesëmarrjen e publikut
në proceset e marrjes së vendimeve edhe për problemet qe lidhen me zgjidhjen e
qëndrueshme të menaxhimit te NOQ-ve.
Gjatë rishikimit të përgjegjësive ekzistuese të agjencive shtetërore, duhet bërë
kujdes që ato të mund të krijojnë marrëdhënie të rregullta me publikun, takime me
grupet e interesit, paraqitje zyrtare në mjetet masive të komunikimit dhe shërbime
konkrete. Ky objektiv mund të realizohet përmes trajnimeve të grupeve të ndryshme
të lidhura me problemet e NOQ-ve, ndër të cilët edhe agjenci shtetërore, OJF,
institucionet e edukimit, grupet e biznesit, konsumatorët, etj.
Shkëmbimi i informacionit
Shkëmbimi i informacionit lidhur me çështjen e NOQ-ve, është i rëndësishëm
si për rritjen e ndërgjegjësimit ashtu edhe për përhapjen e njohurive të reja. Më të
rëndësishme duhet të jenë aktivitetet ndërsektoriale dhe takimet midis disiplinave të
ndryshme, takimet mes përfaqësuesve të brezave të ndryshëm, mbështetje për
përdorimin e rrjeteve të nevojshme, informacion për gjendjen e mjedisit në çdo
komunitet dhe në tërësi për tërë vendin. Mjeti më i rëndësishëm për shkëmbimin e
informacionit duhet të jetë buletini informativ periodik i NOQ-ve, në formë të
printuar ose në internet. Këtij qëllimi duhet t’i shërbejnë edhe konferencat dhe
simpoziumet e grup-moshave të përziera dhe takimet midis aktorëve të
ndërgjegjësimit për NOQ-të (inspektorët e mjedisit, studiuesit, përfaqësuesit e
shoqërive me aktivitete që ndotin mjedisin, fizikanët dhe përfaqësuesit e agjencive
përgjegjëse për administrimin e burimeve natyrore). Duhet të hartohen të dhëna
vendore për burimet e NOQ-ve, të cilat duhet t’i vihen në dispozicion publikut.
Në planin ndërkombëtar, duhet shkëmbyer Informacion lidhur me zgjidhjen e
çështjes së NOQ-ve edhe me partnerë të tjerë të konventës ndërmjet partneriteteve
dypalëshe dhe shumëpalëshe, rrjeteve të NOQ-ve, konferencave, simpoziumeve,
diskutimeve, dhënies së alternativave për NOQ-të, projekteve për zgjidhjen e
problemeve të lidhura me NOQ-të.
Aktivitet kryesore që janë bërë në lidhje me NOQ-të në Shqipëri
Është kryer investigimi i medias së shkruar dhe asaj elektronike në lidhje me
informacionin publik mbi ndikimin e NOQ-ve në shëndetin e njeriut dhe mjedisin në
Shqipëri, si dhe janë analizuar pikat pozitive dhe negative të këtij informacioni.