LIGJI nr.9010, datë 13.02.2003 “PER ... - chemicals.al

administrimi i kimikateve toksike, i kimikateve që përdoren për mbrojtjen e bimëve
dhe i mbetjeve të tyre, hartimi i legjislacionit përkatës, kontrolli dhe bashkëpunimi
ndërkombëtar.
Komisioni Parlamentar i Shëndetësisë dhe Mjedisit shqyrton projekt-ligjet dhe
marrëveshjet ndërkombëtare të paraqitura nga Qeveria dhe të përgatitura nga
ministritë përkatëse, përpara kalimit të tyre për miratim në Kuvend.
Ministria e Mjedisit, Pyjeve dhe Administrimit të Ujërave harton strategjitë
dhe politikat kombëtare në mbrojtje të mjedisit. Ajo bashkëpunon me ministritë e
linjës dhe merr në konsideratë mendimin e tyre përpara paraqitjes në qeveri për
miratim të propozimeve të ndryshme. Zbatimi i legjislacionit dhe i standardeve
mjedisore është detyrë e të gjithë aktorëve shtetërorë dhe joshtetërorë, si edhe e
publikut. Monitorimi dhe detyrimi janë funksione të Ministrisë së Mjedisit, Pyjeve
dhe Administrimit të Ujërave.
Inspektorati i Mjedisit pranë Ministrisë së Mjedisit, Pyjeve dhe Administrimit
të Ujërave kontrollon zbatimin e legjislacionit mjedisor. Aktualisht, ky Inspektorat
përbëhet nga 5 inspektorë në qendër dhe 12 inspektorë të vendosur pranë Agjencive
Rajonale të Mjedisit, çka nxjerr në pah nevojën për ngritje kapacitetesh dhe shtim të
personelit të kësaj strukture. Inspektorët mjedisorë kanë autoritet për të marrë dhe
analizuar kampione si edhe për të kontrolluar proceset e punës, me qëllim që të
sigurohen dhe kontrollojnë sa janë marrë masat në zbatim të legjislacionit për
mbrojtjen e mjedisit. Ndërkohë, Inspektorati i Mjedisit ka nënshkruar një mori
memorandumesh bashkëpunimi me inspektoratet e tjera në nivel kombëtar,
nëpërmjet të cilave synohet fuqizimi dhe ngritja e kapaciteteve të tij gjatë ushtrimit të
kontrolleve të aktiviteteve lidhur me zbatueshmërine nga ana e tyre të legjislacionit
mjedisor.
Ministria e Shëndetësisë është përgjegjëse për përgatitjen e rregulloreve për
menaxhimin e lëndëve helmuese. Ajo merr pjesë edhe në menaxhimin e substancave
për mbrojtjen e bimëve, në procedurat për klasifikimin e lëndëve (kimikateve të reja)
që bëjnë pjesë në grupin e helmeve dhe në përfshirjen e tyre në listën e kimikateve të
miratuara. Ministria e Shëndetësisë merr pjesë edhe në kontrolle përmes
Inspektoratit Sanitar, ndërsa analizat kryhen nga Instituti i Shëndetit Publik, i cili
është në varësi të kësaj ministrie.
Drejtoria e Përgjithshme e Doganave, në varësi të Ministrisë së Financave,
është e ngarkuar me kontrollin e zbatueshmërisë së legjislacionit në fushën e tregtisë,
eksportit dhe importit të mallrave. Ministria e Mjedisit, e Pyjeve dhe e Administrimit
të Ujërave ka organizuar kohët e fundit një varg veprimtarish për të paraqitur
legjislacionin e ri për mbrojtjen e mjedisit, seminare të cilët kanë rezultuar shumë të
vlefshëm dhe me një frymë të mirë bashkëpunimi.
Për kontrollin e import/eksportit të ushqimeve, pesticideve dhe të produkteve
për mbrojtjen e bimëve, janë të ngarkuar inspektorët përkatës të Inspektoratit të
Ushqimit dhe të Drejtorisë së Mbrojtjes së Bimëve pranë Ministrisë së Bujqësisë,
Ushqimit e të Mbrojtjes së Konsumatorit.
Pritet që të ngrihet së shpejti Zyra e Regjistrimit të Kimikateve, në përputhje
me kërkesat e Ligjit Nr. 9108, datë 17.07.2003 “Për substancat dhe preparatet kimike”.
Të tjera institucione qendrore që veprojnë në fushën e kimikateve janë edhe: