i MIAKA 50 YA UHURU MKOA WA KILIMANJARO UJUMBE WA ...

MIAKA 50 YA UHURU MKOA WA KILIMANJARO
UJUMBE WA MKUU WA MKOA
Mhe. Meja Jenerali (Mst.) Said S. Kalembo
Mkoa wa Kilimanjaro ni kati ya mikoa 21 ya Tanzania Bara, ambao ulioanzishwa
rasmi kwa Tangazo la Serikali Na.450 la mwaka 1963 ukiwa na Wilaya za
Kilimanjaro na Pare. Kabla ya hapo eneo hilo linaloitwa Mkoa wa Kilimanjaro
lilikuwa sehemu ya Jimbo la Kaskazini (Northern Province) lililokuwa linaundwa
pia na wilaya za Arusha na Mbulu; wakati wilaya ya Pare ilikuwa sehemu ya
Jimbo la Tanga (Tanga Province). Wakati nchi yetu inapata Uhuru tarehe
09.12.1961 Mkuu wa Jimbo la Kaskazini (Provisional Commissioner) alikuwa
Mheshimiwa PC Edward Barongo ambaye alitawala hadi 1963, na alipokelewa na
Mheshimiwa Peter Kisumo, Mkuu wa Mkoa wa kwanza wa Mkoa wa Kilimanjaro.
Kwa mantiki hiyo Mkoa umetimiza miaka 38 tangu kuanzishwa kwake ukiwa
umeongozwa na Wakuu wa Mkoa 18 hadi hivi sasa.
Mkoa wa Kilimanjaro una eneo dogo la utawala lenye kilomita za mraba 13,209,
lakini ukiwa na msongamano mkubwa wa watu, vivutio vingi vya utalii mojawapo
ukiwa mlima Kilimanjaro, wasomi wengi, miundombinu mizuri na ya uhakika,
wachapa kazi ambao wanajituma katika kazi za kitaalamu na ujasiriamali, vyote
hivi vikiwa ni vichocheo vikubwa vya maendeleo yake.
i

Napenda kuwapongeza viongozi wakuu wa mkoa huu 18 waliotangulia hadi
kufikia mwaka huu 2011; kwani ndio walioweka misingi bora na imara ya
maendeleo yaliyofikiwa hivi sasa, kama inavyoonyeshwa kwenye mafanikio kwa
kila sekta katika taarifa ya mkoa.
Shukrani za dhati kwa serikali katika jitihada zake za kufikisha huduma na
maendeleo kwa wananchi wa mkoa huu kupitia ngazi mbali mbali za kiutawala
kuanzia ngazi ya Mtaa/Kitongoji, Kijiji, Kata na Halmashauri/Wilaya.
Mkoa wa Kilimanjaro una fursa nyingi za kimaendeleo ambazo zinawezesha
uwekezaji unaotokana mazingira mazuri yaliyopo sasa hivi kama vile:-
(i) Miundombinu ya kuaminika na mawasiliano kama vile mtandao
mzuri wa barabara za lami na changarawe zinazopitika kwa vipindi
vyote vya mwaka;
(ii) Njia za mawasiliano ya Simu, Viwanja vya Ndege kikiwepo kiwanja
cha Kimataifa KIA na viwanja vidogo vya Moshi Mjini na kile cha
Utalii Same na njia ya Reli ya Moshi - Arusha – Dar es Salaam;
(iii) Upatikanaji wa kuridhisha wa huduma za tiba, maji, umeme na
elimu;
(iv) Upatikanaji wa huduma na vivutio vya utalii kama vile Mlima
Kilimanjaro, Hifadhi za Wanyamapori za Kilimanjaro na Mkomazi,
misitu ya asili, mazingira yanayovutia tamaduni za asili na
mapango ya kale;
(v) Uwepo wa vyombo vya kifedha kukidhi haja kama vile benki 13,
SACCOS 217, mifuko ya hifadhi ya jamii na asasi nyingine ndogo
ndogo za fedha kama vile vikoba;
(vi) Ulinzi na usalama wa kuridhisha.
ii

Nina uhakika tukiweza kuimarisha mazingira haya mazuri ya uwekezaji na
kuboresha miundombinu iliyopo sasa, Mkoa unayo nafasi nzuri ya kupiga
hatua kubwa zaidi ya kimaendeleo katika miaka 50 ijayo. Hii ikiwa ni
pamoja na kutumia ardhi ndogo tuliyo nayo kikamilifu kwa kujenga majengo
kwa kwenda juu (vertical expansion) badala ya ujenzi wa kusambaa
(horizontal development);
Mafanikio haya yamepatikana kutokana na ushirikiano na mshikamano kati
ya viongozi mbali mbali wakiwemo viongozi wa serikali, chama, dini na
wananchi wa mkoa wetu wa Kilimanjaro. Tutaendelea kuwategemea kwa
miaka 50 ijayo Inshaalah Mwenyenzi Mungu akitujalia.
“TUMETHUBUTU, TUMEWEZA, TUNAZIDI KUSONGA MBELE”
Said S. Kalembo
Meja Jenerali (Mst)
Kaimu MKUU WA MKOA
KILIMANJARO
iii

NENO LA SHUKRANI KUTOKA KWA
KATIBU TAWALA MKOA KILIMANJARO
Taarifa hii ya mafanikio ya Miaka 50 (Jubilee) ya Uhuru ya Mkoa wa
Kilimanjaro imetayarishwa/andaliwa na kamati maalum ya wataalam kutoka
Ofisi ya Mkuu wa Mkoa, Ofisi za Wakuu wa Wilaya na Wakurugenzi wa
Halmashauri za Mkoa wa Kilimanjaro. Licha ya kuandaa taarifa hii, kamati
imejihusisha kikamilifu na maandalizi ya maadhimisho ya miaka 50 ya Uhuru
wa Tanzania Bara ambapo mkoa wa Kilimanjaro umepangiwa tarehe 21/8 –
24/8/2011. Kazi hii imefanyika katika mazingira ya kujituma na kujitolea
kwa hali ya juu na hivyo sina budi kuwashukuru wote kwa bidii na moyo
wao wa kujituma ambao kwa pamoja umewezesha kukamilika kwa taarifa
hizi na maadhimisho katika mkoa wetu na wilaya zake zote sita.
Napenda kuunga mkono ujumbe wa Mkuu wa Mkoa, katika maadhimisho
haya kwamba japo mkoa wa Kilimanjaro una eneo dogo la ardhi, mkoa una
fursa nyingi za kuwezesha kuinua hali ya uchumi kwa wakazi wake. Fursa
hizo ni pamoja na mlima Kilimanjaro, barabara zinazopitika wakati wote wa
mwaka, hifadhi za wanyama na miundombinu ya kutolea elimu kuanzia
elimu ya awali hadi chuo kikuu. Uwezo wa wakazi wake kielimu pamoja na
miundombinu iliyowekezwa katika eneo hili dogo tangu kupatikana kwa
Uhuru, fursa na rasilimali muhimu sana katika kupiga hatua ya kimaendeleo
kwa kuwekeza zaidi katika ardhi ndogo iliyoko ili iweze kuzalisha zaidi
(intensive agriculture), kuwekeza zaidi katika viwanda kwani hakuna
uwezekano wa kupanua ardhi iliyoko kwa kilimo na mwisho kuwekeza zaidi
katika elimu na kuufanya mkoa kuwa “centre for excelency” katika Elimu.
Yote haya yatawezekana endapo kila mwananchi atatimiza wajibu wake
pale alipo kwa kutumia fursa na rasilimali zilizopo.
iv

Napenda kuzishukuru Taasisi za Dini Mkoani Kilimanjaro na wananchi kwa
ujumla kwa michango mikubwa waliyotoa na wanayoendelea kutoa katika
maendeleo ya mkoa wa Kilimanjaro hususan katika huduma za kijamii.
Mafanikio na changamoto zilizojitokeza katika miaka hii 50 ya Uhuru wa
Tanzania Bara katika mkoa wetu ziwe ni chachu ya kutafuta maendeleo
zaidi katika miaka 50 ijayo katika mkoa wetu wa Kilimanjaro.
“TUMETHUBUTU, TUMEWEZA NA TUNAZIDI KUSONGA MBELE”
Hassan M. Bendeyeko
KAIMU KATIBU TAWALA WA MKOA
KILIMANJARO
v