Marrëveshja CEFTA - Dogana e Kosovës

Me dëshirën për të krijuar kushte të favorshme për zhvillimin dhe
diversifikimin e tregtisë ndërmjet palëve dhe për nxitjen e bashkëpunimit
tregtar dhe ekonomik në fushat me interes të përbashkët në bazë të
barazisë, përfitimit reciprok, mos-diskriminimit dhe të drejtës
ndërkombëtare;
Të bindur që kjo marrëveshje do të nxisë intensifikimin e marrëdhënieve
ekonomike të përfitimit reciprok ndërmjet palëve dhe të kontribuojë në
procesin e integrimit në Evropë;
Me dëshirën për të kontribuar në zhvillimin e marrëdhënieve të secilës
palë me Bashkimin Evropian dhe integrimin në sistemin tregtar
shumëpalësh;
Të vendosur për të zhvilluar marrëdhëniet e tyre reciproke tregtare në
përputhje me rregullat dhe disiplinat e OBT-së, pavarësisht nëse ata janë
apo jo anëtarë të OBT-së;
Duke konsideruar që asnjë dispozitë e kësaj marrëveshjeje nuk mund të
interpretohet sikur i përjashton palët nga detyrimet e tyre në
marrëveshjet e tjera ndërkombëtare, veçanërisht të OBT-së,
Kanë vendosur sa më poshtë vijon:
Neni 1
Objektivat
1. Palët do te krijojnë një zonë të tregtisë së lirë në përputhje me
dispozitat e kësaj marrëveshjeje dhe në përputhje me rregullat dhe
procedurat përkatëse të OBT-së. Zona e tregtisë së lirë do te krijohet
gjatë një periudhe transitore që do të përfundojë jo më vonë se 31
dhjetori 2010.
2. Objektivat e kësaj marrëveshjeje janë të:
a. Konsolidojë në një marrëveshje të vetme nivelin ekzistues të
liberalizimit të tregtisë të arritur nëpërmjet rrjetit të
marrëveshjeve bilaterale të tregtisë së lirë tashmë të lidhura
ndërmjet palëve;
b. Përmirësojë më tej kushtet për nxitjen e investimeve, duke
përfshirë investimet e huaja direkte;
c. Zgjerojë tregtinë e mallrave, shërbimeve dhe të forcoje investimet
me anë të rregullave të drejta, të qarta, të qëndrueshme dhe të
parashikueshme;
d. Eliminojë barrierat dhe deformimet e tregtisë dhe të lehtësojë
lëvizjen e mallrave në transit dhe lëvizjen ndërkufitare të mallrave
dhe shërbimeve ndërmjet territoreve të palëve;
6