Matematika 2 - Media Print

Detyrë shtëpie:
Punohet fleta e punës e mësimit ose, si detyrë plotësuese për nxënësit e nivelit të parë,
mësuesja mund të kërkojë që vetë nxënësit të krijojnë vargje numrash dhe të argumentojnë
se çfarë llojesh i kanë krijuar. Tabela që kërkon shkrimin e numrave në forma të ndryshme,
duhet korrigjuar për të parë se ku kanë vështirësi nxënësit, në cilën nga paraqitjet e
ndryshme të numrit. Është për t’u pasur parasysh që vështirësia më e madhe qëndron në
shkrimin e numrave me fjalë sepse edhe në shqiptimin e tyre vërehen pasaktësi.
MËSIMI 10.4; 10.5
Njësi të matjes. Metri. Matje me metër
OBJEKTIVAT: Në fund të orës së mësimit nxënësi duhet të jetë i aftë:
Të matë me njësi standarte segmentin.
Të vizatojë segmente me gjatësi të ndryshme.
Të gjejë perimetrin e figurave gjeometrike.
KONCEPTET KRYESORE: matje, gjatësi, perimetër, metër, centimetër.
Zhvillimi i mësimit
1- EVOKIMI
Në të dy mësimet evokimi përfshin veprimtari praktike që rikujtojnë matjen si veprim;
matjen me njësi jostandarte dhe kalimi në njësitë standarde. Në njësitë e dhëna
m=metri dhe cm=centimetri nxënësit duhet të shohin praktikisht gjatësitë e tyre dhe të
arrijnë vetë në përfundimin se metri përdoret për të matur gjatësi të mëdha, ndërsa cm
për të matur gjatësi të vogla. Rëndësi ka përdorimi i vizores dhe vendosja e saj në
numrin zero kur të fillojë matja.
2- REALIZIMI I KUPTIMIT
Puna me librin fillon me ushtrimet e dhëna, ku nxënësit do të gjejnë gjatësitë e segmenteve
të dhëna dhe do të familjarizohen me gjetjen e perimetrit dhe vendosjen e të dhënave në
tabelë. Gjithashtu do të zbatohen njohuritë mbi matjen duke krahasuar gjatësitë e fëmijëve
të figurës. Gjithashtu një moment i rëndësishëm është edhe këmbimi i njësive të matjes së
m=100 cm. Në këtë moment shfrytëzohen njohuritë e nxënësve mbi zbërthimin e numrave
në dhjetëshe dhe njëshe (përkatësisht në metra+centimetra).
3- REFLEKTIMI
Në momentin e reflektimit mund të ripërsëriten njohuritë mbi matjen dhe do të
punohen ushtrime mbi zbërthimin e njësive të matjes.
Detyrë shtëpie:
Punohet fleta e punës së mësimit, e cila duhet të kontrollohet në klasë për të gjithë
nxënësit, si dhe në tabelë.
77