Matematika 2 - Media Print

MËSIMI 10.1; 10.2; 10.3
Numrat nga 10 deri në 100
OBJEKTIVAT: Në fund të orës së mësimit nxënësi duhet të jetë i aftë:
Të riprodhojë emërtime të numrave deri në 100.
Të zbatojë faktet e emërtimit të numrave deri në 100, në forma të ndryshme (si shumë).
Të hartojë paraqitje të numrave deri në 100 si vargje numerike.
Të interpretojnë numërorin e plotë si numëror të zbërthyer.
KONCEPTET KRYESORE: shufra, kube, numra një dhe dyshifrorë, varg numrash.
Zhvillimi i mësimit
1- EVOKIMI
Para se të kalohet në punën me librin, e gjithë veprimtaria e zhvilluar ka lidhje me
paraqitjen e kubeve, shufrave dhe rendeve që përfaqësojnë ata te numrat me dy shifra.
Mësuesja shkruan në tabelë numra një e dyshifrorë dhe kërkon që vetë nxënësit të
dallojnë dy llojet e bashkësive të formuara dhe cilësinë e tyre të përbashkët. Termat
njëshifrorë dhe dyshifrorë duhen shoqëruar me kubet dhe shufrat. Jepen zbërthime të
ndryshme të numrave ose me shufra + kube, ose me DH + NJ. Nxënësit nxiten të
punojnë në grupe dyshe për të kontrolluar dhe për të korrigjuar njëri-tjetrin. Puna në
bankë duhet të shoqërohet me paraqitjen e ushtrimeve në tabelë:
2 shufra + 3 kube = 23 kube ose 2 DH +3 NJ = 20 + 3 = 23 etj.
Mund të zhvillohen veprimtari edhe për vargjet e numrave, duke nisur nga brenda 10,
duke kaluar në vargjet brenda 100 (me dhjetëshe të plota), në mënyrë që klasa të jetë e
përgatitur për vargjet me njëshe brenda 100.
2- REALIZIMI I KUPTIMIT
Puna me librin fillon me paraqitjen e shufrave dhe të kubeve. Nxënësit janë të
familjarizuar tashmë me këtë punë dhe vështirësia e vetme është për nxënësit e nivelit
të ulët, që mund të ngatërrojnë paraqitjen e numrave si shumë mbledhorësh.
Ushtrimet e këtyre mësimeve synojnë të plotësohen paraqitjet e numrave në forma të
ndryshme: si shumë dymbledhorësh dhe në tri format përkatëse: me shufra+kube; me
DH+NJ, si dhe në formën klasike p.sh.: 35=30+5.
Puna më e vështirë mbetet në ushtrimin që u kërkohet nxënësve të plotësojë vargjet e
numrave ku janë dhënë vetëm disa pika orientimi. Nxënësit që kanë vështirësi, mund
të orientohen drejt tabelës, ku paraqitet vargu i numrave deri në dhjetë, i cili mund të
përdoret për plotësimin e këtyre vargjeve.
3- REFLEKTIMI
Në këtë moment nxënësve mund t’u jepen ushtrime rikrijuese për të kthyer paraqitjet e
shumës së numrave në forma të ndryshme:
10 + 3 = 13 → 1 DH + 3 NJ = 13 ose 10 + 3 = 13 → 1 shufër + 3 kube = 13 kube
Gjithashtu nxënësve mund t’u jepen vargje numrash në tabelë për plotësim individual
ose në formë konkursi.
76