Matematika 2 - Media Print

MËSIMI 5.1; 5.2
Dhjetëshet e plota. Njihu me numrin 100
OBJEKTIVAT: Në fund të orës së mësimit nxënësi duhet të jetë i aftë:
Të emërtojë numrat deri në 100 me dhjetëshe të plota.
Të klasifikojë përbërësit e numrave dyshifrorë në rendet përkatëse: njëshe
(kube), dhjetëshe (shufra), qindëshe (pllaka).
Të dallojë rendet në numrat dyshifrorë.
KONCEPTET KRYESORE: kube (njëshe), shufra (dhjetëshe), pllaka (qindëshe),
rende, numra njëshifrorë, numra dyshifrorë.
Zhvillimi i mësimit
1- EVOKIMI
Mësuesja zhvillon këtë veprimtari:
-Para se të kalohet në punën me librin, e gjithë veprimtaria e zhvilluar ka lidhje me
paraqitjen e kubeve, shufrave dhe rendeve që përfaqësojnë ata te numrat me dy shifra.
Mësuesja shkruan në tabelë numra njëshifrorë e dyshifrorë dhe kërkon që vetë nxënësit
të dallojnë dy llojet e bashkësive të formuara dhe cilësinë e tyre të përbashkët. Termat
njëshifrorë dhe dyshifrorë duhen shoqëruar me kubet dhe shufrat. Kryhen disa paraqitje
të numrave të ndryshëm, që nxënësit të dallojnë figurativisht ndryshimin e tyre.
Bashkohen 10 kube para se të jepet koncepti i shufrës; gjithashtu bashkohen 10 shufra,
që të jepet kuptimi i pllakës. Kjo veprimtari duhet zhvilluar me kujdes, që nxënësit të
kuptojnë paraqitjen e ushtrimeve të librit të tipit: 1 shufër=10 kube apo 1 pllakë=10
shufra për të arritur te barazimi 1 pllakë=100 kube.
2- REALIZIMI I KUPTIMIT
Hapet teksti dhe punohen ushtrimet që synojnë të bëhen këmbime të shufrave me
kubet, drejtshkrim të dhjetësheve të plota, mbledhje me to (të ndihmuar nga mbledhja e
numrave brenda dhjetëshes së parë). E rëndësishme është puna me boshtin numerik
(me dhjetëshe të plota), si dhe zgjidhja e situatave problemore (të shoqëruara nga
paraqitja me skemë).
3- REFLEKTIMI
Në këtë fazë bëhet kontrolli i dijeve të marra gjatë orës së mësimit.
Mund të punohen vargje numrash apo shkrimi i numërorëve, që mësuesja mund të japë
të paraqitur me shufra apo me kube.
Detyrë shtëpie:
Punohet fleta e punës e mësimit ose, si detyrë plotësuese për nxënësit e nivelit të parë,
mësuesja mund të kërkojë që të emërtohen numrat deri në 100 si shumë dy ose tre
mbledhorësh (sigurisht me dhjetëshe të plota).
43