Matematika 2 - Media Print

MËSIMI 4.8
Krahasimi i gjatësive (me sy)
OBJEKTIVAT: Në fund të orës së mësimit nxënësi duhet të jetë i aftë:
Të dallojë ndryshimet e trupave në gjatësi.
Të përdorë fjalët më i/e gjatë apo më i/e shkurtër për të krahasuar gjatësitë e trupave.
Të vërë në dukje karakteristikën e veçantë të një trupi, krahasuar me trupat e tjerë.
Të përshkruajë mënyrën e krahasimit të gjatësisë së trupave.
KONCEPTET KRYESORE: gjatësi, më i/e gjatë, më i/e shkurtër.
Zhvillimi i mësimit
1- EVOKIMI
Mësuesja zhvillon këtë veprimtari:
-Nxjerr para klasës 3-4 fëmijë të gjatësive të ndryshme (vajza dhe djem) dhe u kërkon
të gjejnë ndryshimet e tyre pa e përmendur fjalën gjatësi. Nxënësit mund të sugjerojnë
ndryshimet në ngjyrën apo modelin e flokëve, shëndetin apo bukurinë e tyre. Aq më
mirë! Në këtë mënyrë dallimet do të jenë në funksion të mësimit të ditës. Mësuesja
ndalon në çastin kur fillon të krahasohet gjatësia dhe duhet pasur shumë kujdes në
përdorimin e saktë të fjalëve krahasuese më i/e gjatë apo më i/e shkurtër, sepse shpesh
nxënësit kanë vështirësi në përdorimin e tyre. (Përdoren më i lartë apo më i ulët dhe
anasjelltas për sende dhe njerëz.)
2- REALIZIMI I KUPTIMIT
Hapet teksti. Njihen nxënësit me temën.
Nxënësit nxiten të mendojnë për figurat e paraqitura dhe të dallojnë gjatësitë e
fëmijëve apo të sendeve në figurë. Duhen pyetur sa më shumë nxënës, në mënyrë që të
përdorin fjalët krahasuese edhe me saktësi gjuhësore.
Ushtrimi 2,3,4 krahason gjatësinë e segmenteve duke përdorur termat e njohur: më i
gjatë se…..më i shkurtër se…..po aq…..sa. Duhet theksuar se ky dallim mund të bëhet
vetëm DUKE KRAHASUAR apo duke vendosur pranë njëri-tjetrit segmentet ose
objektet për krahasim.
Në ushtrimin 6 bëhet një ripërsëritje e fakteve të mbledhjes deri në 20.
3- REFLEKTIMI
Në këtë fazë bëhet kontrolli i dijeve të marra gjatë orës së mësimit.
Mësuesja mund t’i nxitë nxënësit që ata, vetë, të dallojnë objekte për krahasim gjatësish duke
përdorur mjetet e punës apo objektet e ndryshme në klasë. Në këtë çast mund të përdoret
puna në grupe dyshe, që nxënësit, nëpërmjet punës ndërvepruese, të ndihmojnë njëri-tjetrin.
Detyrë shtëpie:
Jepet fletorja e punës ku nxënësit duhet të vizatojnë segmente sipas kërkesës dhe të
krahasojnë gjatësinë e objekteve. Kjo fletë pune duhet të korrigjohet për të gjithë
klasën që mësuesja të ketë të qartë shkallën e përvetësimit të krahasimit të objekteve,
kuptimin e segmentit, drejtëzës apo gjysmëdrejtëzës nga të gjithë nxënësit.
40