Matematika 2 - Media Print

Zhvillimi i mësimit
1- EVOKIMI
Mësuesja zhvillon këtë veprimtari:
Para se të kalohet në punën me librin, e gjithë veprimtaria e zhvilluar ka lidhje me
paraqitjen e kubeve, shufrave dhe rendeve që përfaqësojnë ata te numrat me dy shifra.
Mësuesja shkruan në tabelë numra një e dyshifrorë dhe kërkon që vetë nxënësit të dallojnë
dy llojet e bashkësive të formuara dhe cilësinë e tyre të përbashkët. Termat njëshifrorë dhe
dyshifrorë duhen shoqëruar me kubet dhe shufrat. Kryhen disa paraqitje të numrave të
ndryshëm, që nxënësit të dallojnë figurativisht ndryshimin e tyre. Bashkohen 10 kube, para
se të jepet koncepti i shufrës. Kjo veprimtari duhet zhvilluar me kujdes, që nxënësit të
kuptojnë paraqitjen e ushtrimeve të librit të tipit: 1 shufër =10 kube.
2- REALIZIMI i KUPTIMIT
Hapet teksti. Në fillim është dhënë paraqitja e disa numrave dyshifrorë të “përkthyer” në kube.
Ushtrimet e para në mësim synojnë të japin figurativisht përbërjen e numrave brenda
20, formimin e tyre duke i dhënë herë si numërorë të zbërthyer e herë si numërorë të
plotë. Do të ngulmohet në përdorimin e termave matematikorë si: rendi i dhjetësheve,
boshti numerik.
Ushtrimet për renditjen e numrave në vargje numerike do të ndihmojnë mësuesen si një
lloj matjeje diagnostike për të ndihmuar nxënësit që akoma kanë vështirësi në dallimin
e numrave më të vegjël apo më të mëdhenj.
3- REFLEKTIMI
Në këtë fazë bëhet kontrolli i dijeve të marra gjatë orës së mësimit.
Mund të punohet me vargje numrash apo shkrim të numërorëve, që mësuesja mund t’i
japë të paraqitur me shufra apo me kube.
Detyrë shtëpie:
Punohet fleta e punës e mësimit ose, si detyrë plotësuese për nxënësit e nivelit të parë,
mësuesja mund të kërkojë që vetë nxënësit të krijojnë vargje numrash dhe të argumentojnë
se çfarë llojesh kanë krijuar. Problemat duhen argumentuar të nesërmen në klasë për të
dalluar nëse nxënësit përdorin me qartësi dijet e tyre në zgjidhjen e situatave të përditshme.
MËSIMI 4.3
Vijat dhe llojet e tyre (drejtëz, gjysmëdrejtëz, segment)
OBJEKTIVAT: Në fund të orës së mësimit nxënësi duhet të jetë i aftë:
Të emërtojë vijat sipas llojit të tyre.
Të dallojë segmentet nga drejtëzat e gjysmëdrejtëzat.
Të vizatojë segmente, drejtëza e gjysmëdrejtëza duke i emërtuar.
KONCEPTET KRYESORE: drejtëz, gjysmëdrejtëz, segment, vijë e lakuar e hapur (e
mbyllur), vijë e drejtë.
37