Matematika 2 - Media Print

2- REALIZIMI I KUPTIMIT
Puna me tekstin mbështetet në të njëjtat veprimtari të zhvilluara gjatë evokimit. Qëllimi
është që nxënësit të punojnë të pavarur duke u mbështetur në kërkesat e ushtrimeve.
3- REFLEKTIMI
Në këtë fazë bëhet kontrolli i dijeve të marra gjatë orës së mësimit.
Për të kontrolluar njohuritë e marra mësuesja mund të përdorë forma të larmishme: mund
të paraqiten situata problemore të cilat zgjidhen në tabelë ose me dyshe nxënësish. E
rëndësishme është që gjithçka të jetë argëtuese dhe jo e lodhshme për nxënësit.
Detyrë shtëpie:
Mund të jepen ushtrime mbledhjeje dhe vargje numrash që, jo detyrimisht, mund të
nisin nga 1; p.sh: vargjet mund të nisin nga numri 6 dhe t’u kërkohet nxënësve të
formojnë vargje rritëse dhe zbritëse deri në një kufi të dhënë. P.sh nga 6 deri tek 12;
ose nga 9 deri tek 2 (varg zbritës). Gjithsesi mësuesja mund të jetë më e aftë të
përcaktojë ushtrime në përshtatje me nivelin e klasës së saj.
MËSIMI 1.2
Emërtimi i trupave dhe figurave gjeometrike
OBJEKTIVAT: Në fund të orës së mësimit nxënësi duhet të jetë i aftë:
Të emërtojë figurat ose trupat gjeometrike.
Të dallojë figurat gjeometrike nga trupat gjeometrikë.
Të lidhë trupat gjeometrikë me objektet sipas ngjashmërisë.
KONCEPTET KRYESORE: trupa gjeometrikë, figurat gjeometrike.
Zhvillimi i mësimit
1- EVOKIMI
Mësuesja zhvillon këtë veprimtari:
Përsëriten njohuritë mbi trupat dhe figurat gjeometrike. Dallohen figurat (të vizatuara)
nga trupat (që preken fizikisht). Mësuesja duhet të praktikojë punën me trupat të cilët
mund të jenë pjesë e kompletit të trupave gjeometrikë ose të mjeteve rrethanore të cilat
kanë ngjashmëri me ta.
2- REALIZIMI I KUPTIMIT
Në punën me librin mjafton që të kuptohen kërkesat (mësuesja duhet të fillojë punën
vetëm pasi të gjithë nxënësit të dinë se çfarë u kërkohet) dhe nxënësit të punojnë të
pavarur për të plotësuar ushtrimet.
21