Matematika 2 - Media Print

MËSIMI 16.1; 16.2
Rreshtimi
OBJEKTIVAT: Në fund të orës së mësimit nxënësi duhet të jetë i aftë:
Të dallojë mënyrën e vendosjes së numrave në një rreshtim.
Të lidhë përmasat e duhura me numrin e elementeve në çdo rresht.
Të përcaktojë përmasat e një rreshtimi të dhënë.
KONCEPTET KRYESORE: rresht, rreshtim, përmasë.
Zhvillimi i mësimit
1- EVOKIMI
Ky është momenti më i rëndësishëm i mësimit, ku nxënësit do t’i jepet koncepti i parë
mbi shumëzimin me anë të rreshtimit. Është menduar që ky koncept të jepet me një
skenë nga jeta e përditshme shkollore ku fëmijët, nisur edhe nga përvoja e tyre, dinë që
para se të futen në shkollë duhet të rreshtohen. Nga fjala rresht do të kalohet në fjalën
rreshtim. Këtë situatë mësuesja mund ta nënvizojë atë ditë qysh në momentin e
rreshtimit, para futjes në klasë. Nga figura dhe shpjegimi i librit duhet pasur kujdes që,
qysh në fillim, nxënësi ta ketë të qartë se çfarë tregojnë përmasat e rreshtimit (njëlloj si
tek thyesa); pra: cili numër tregon numrin e rreshtave dhe cili numrin e elementeve për
çdo rresht. Mund të kryhen disa veprimtari të tilla në tabelë.
2- REALIZIMI I KUPTIMIT
Mbështetet në punën me librin dhe sa të jetë e mundur, punën e pavarur të fëmijëve në
lidhje me caktimin e përmasave ose ushtrime të anasjella.
3-REFLEKTIMI
Duhet të rikujtohen njohuritë e dhëna mbi termat rreshtim dhe përmasa e sidomos
përkufizimi “Rreshtimi ka dy përmasa”, për të pasur më të lehtë dhënien e konceptit të
shumëzimit dhe dy faktorëve.
Detyrë shtëpie:
Punohet në fletë pune ose dhe ushtrime plus që mësuesja e gjykon të arsyeshme të japë
për nxënës të talentuar.
128